काठमाडौं– गायक उदित नारायण ६८ वर्षका भए। नेपालमा जन्मिएका उदितले थुप्रै नेपाली गीत गाएका छन्। बलिउड जगतमा प्रवेश गरेपछि उनको गायन कलाले संसारभर प्रसिद्धी पायो।
झाको जन्म १ डिसेम्बर १९५५ मा एक मध्यमवर्गीय ब्राह्मण परिवारमा भएको थियो। उनको बाल्यकालदेखि नै संगीतप्रति झुकाव थियो।
उदितले गायकको रूपमा आफ्नो करिअरको सुरुवात लोक संगीत कार्यक्रममार्फत् गरे। नेपालको आकाशवाणी मञ्चमा करिब आठ वर्ष आबद्ध रहेपछि सन् १९७८ मा मुम्बई गएर भारतीय विद्या मन्दिरमा छात्रवृत्ति पाएपछि उनले शास्त्रीय संगीतको पाठ लिन थाले।
सन् १९८० मा, उदित नारायणले प्रसिद्ध संगीतकार राजेश रोशनलाई भेटे जसले उनको प्रतिभालाई चिन्दै उनको फिल्म 'उन्निस बिज' मा पार्श्व गायकको रूपमा काम गर्ने मौका दिए। तर यो फिल्म चलेन।
यस फिल्ममा उनले आफ्नो आइडल मोहम्मद रफीसँग प्लेब्याक गाउने मौका पाएका थिए। करिब दुई वर्ष मुम्बईमा बसेपछि उनले पार्श्व गायक बन्न संघर्ष गर्न थाले। सबैले आश्वासन दिए तर काम गर्ने मौका दिएनन्। उदित नारायणले 'गेहरा जख्म', 'बडे दिल वाला', 'तन बदन', 'अपना भी कोई होता' र 'पट्टन की बाजी' जस्ता बी र सी ग्रेडका फिल्महरूमा पार्श्व गायन गरे तर खासै कमाइ गरेनन्।
मुम्बईमा झण्डै दश वर्ष संघर्ष गरेपछि, उदित नारायणले सन् १९८८ मा नासिर हुसैनको आमिर खान अभिनित फिल्म 'कयामत से कयामत तक' मा आफ्नो गीत "पापा कहते हैं बडा नाम करेंगे"बाट सफलता हासिल गरे।
‘कयामत से कयामत तक’ को सफलतापछि उदित नारायणलाई रामअवतार, त्रिदेव, महासंग्राम, दिल, सौगन्ध, फूल र कान्टे जस्ता ठूला बजेटका फिल्मको अफर आउन थाल्यो।
यी फिल्मको सफलतापछि उदित नारायणले सफलताको नयाँ उचाइ लिए। एकपछि अर्को गीत गाएर दर्शकलाई मन्त्रमुग्ध बनाए।
उदित नारायण अहिलेसम्म पाँच पटक फिल्मफेयर अवार्डबाट सम्मानित भइसकेका छन्। हिन्दी सिनेमा जगतमा उदित नारायणको महत्वपूर्ण योगदानलाई ध्यानमा राख्दै उनलाई सन् २००९ मा पद्मश्री पुरस्कारले सम्मान गरिएको थियो। सन् २०००२मा फिल्म ‘लगान’को ‘सुन मितवा’ गीतको लागि र २००३मा फिल्म ‘जिंदगी खुबसुरत है’को ‘छोटे छोटे सपने’ गीतको लागि उनलाई राष्ट्रिय पुरस्कार पनि प्रदान गरियो।
उनले १५ हजारभन्दा बढी गीत गाइसकेका छन्। उनले हिन्दी बाहेक उर्दू, तमिल, बंगाली, गुजराती, मराठी, तेलुगु, मलयालम, कन्नड, उडिया र नेपाली चलचित्रका गीतहरूमा पनि आफ्नो स्वर दिएका छन्।
उदित नारायणले नेपाली चलचित्रमा पनि अभिनय गरेका छन्।उनले अभिनय गरेको ‘कुसुमे रुमाल’ लोकप्रिय फिल्म हो। यस बाहेक उनले भोजपुरी सुपरहिट फिल्म ‘कब होई ग्वानवान हमारा’ पनि काम गरेका छन्।
उदित नारायणले भारतबाहेक अमेरिका, क्यानडा, वेस्ट इन्डिज र दक्षिण अफ्रिकामा पनि धेरै स्टेज कार्यक्रम प्रस्तुत गरेका छन्। आज पनि उदित नारायणले आफ्नो सुमधुर स्वरले संगीत जगतलाई सुन्दर बनाइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1677243823-1775234234-1789571125.jpg)
-1786602170.png)
