काठमाडौं– नेकपा माओवादी केन्द्रका उपाध्यक्ष कृष्णबहादुर महराका छोरा राहुल महराले अनुसन्धानका क्रममा नेपाल प्रहरीको केन्द्रीय अनुसन्धान ब्यूरोसँग आरोप अस्वीकार गरी बयान दिएका छन्। तर भन्सार प्रमुखको कार्यकक्षमा चिनियाँहरु लिएर गएको भने स्वीकार गरेका छन्।
‘दावाजिनसँग मेरो फोनमा कुराकानी हुँदा एक दिन दावाजिनले तपाईं नै भन्सारमा गएर बुझिदिनुपर्यो भनेकोले मैले पनि के भएको रहेछ बुझौं न त भनी म एअरपोर्ट गएको हुँ,’ बयानमा राहुलले भनेका छन्, ‘भन्सार कार्यालय अगाडि दावाजिन र उनका ड्राइभर लोकेन्द्रकुमार पौडेल र मैले नचिनेका दुई जना चिनियाँहरूसँग भेट भएपछि म लोकेन्द्र र तिब्बतीयन जस्तो देखिने नेपाली बोल्न जान्ने १ जना व्यक्तिसमेत हामी ३ जनालाई त्रिभुवन विमानस्थल भन्सार कार्यालयका प्रमुख भन्सार प्रशासक अरुण पोखरेलको कार्यकक्षमा गएको हो।’
अरुण पोखरेललाई उनको कार्यकक्षमा भेटी जफत भएको उक्त इलेक्ट्रिक सिगरेटलाई के गर्न सकिन्छ भनी कुराकानी हुँदा उक्त भेप लिलामी प्रक्रियामा जाने र भन्सार तिरेर लैजान नमिल्ने कुरा बताएछि आफू घर फर्केको दाबी उनले गरे। उनले चिनियाँ तस्कर दावाजिन वाङसँग ११ वर्ष पहिले नै चिनजान भएको बयानमा बताएका छन्। सन् २०११ मा पढ्न जाँदा चिनमै उनीसँग चिनजान भएको राहुलको बयानमा उल्लेख छ।
उनले आफूले गरेको एसएमएस गरेको र कति पटक फोन गरेको याद नभएको बताएका छन्। ‘मैले अरुण पोखरेललाई मोबाइल नम्बर ९८४१२९५...मा एसएमएस गरेको मलाई याद छैन। मेरो फोन के कति पटक भयो याद छैन,’ उनले बयानमा भनेका छन्, ‘मेरो आफ्नो काम विशेषले एक पटक अरुण पोखरेललाई भेट गरेको थिएँ। निज अरुण पोखरेललाई खुलाई लेखाई दिए जसरी उक्त भेपको विषयलाई लिएर निजको कार्यालयमा ६/७ पटक गई छुटाउनका लागि दबाब दिने काम गरेको थिएन, छैन।’
उनले भेपमा अवैध रुपमा सुन लुकाएर ल्याएको कुरा पछि पत्रपत्रिकाबाट आफूले थाहा पाएको दाबी गरेका छन्।
आइफोन फुट्यो, हुवाईको हरायो
राहुलले सीआईबी पुग्नुअघि आफ्नो एउटा मोबाइल फुटालेको र अर्को फर्म्र्याटसमेत गरेका थिए। सीआईबीले मोबाइलमा कुराकानी भएको देखिएकाले उक्त फोनबारे जानकारी माग गरेको थियो।
जवाफमा उनले फुटेको र हराएको भन्दै बयान दिए। ‘मैले प्रयोग गरेको मोबाइल आइफोन १३ प्रोम्याक्स फुटेर बिग्रियो। दुई तीन पटक बनाउँदा पनि नबनेपछि घरमा नै फालिदिएको थिएँ। आइफोन १४ प्रोम्याक्स मेरो साथी गोपाल शर्माको हो। उक्त मोबाइल मैले उसैलाई फिर्ता गरे,’ उनले बयानमा भनेका छन्, ‘हुवाईको फोन मैले घरमा नै राखेको थिएँ। मेरो आफन्तले घरमा खोज्दा ती फोन फेला नपरेको भनी मलाई जानकारी गराएकोले मैले उक्त मोबाइलहरू उपलब्ध गराउन सक्दिनँ।’
सुन प्रकरणमा प्रहरीले अनुसन्धान प्रतिवेदन जिल्ला सरकारी वकिल कार्यालयमा पेस गरेको छ। जिल्ला सरकारी वकिल कार्यालयले केही दिन अध्ययनपछि काठमाडौं जिल्ला अदालतमा मुद्दा दायर गर्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1786437116.jpg)
-1786513116.png)
