पोखरा– पोखरा महानगरपालिकाले सडक निर्माण गर्दा ढलानलाई प्राथमिकतामा राखेर काम गरिरहेको जनाएको छ। पोखरामा बढी पानी पर्ने र त्यसले कालोपत्रेलाई समेत असर गर्ने भएकाले ढलानलाई महत्व दिँदै काम गरिररहेको महानगरका योजना शाखा प्रमुख शारदामोहन काफ्लेले बताए।
महानगरले सडक ढलान गर्न सञ्चालन गरेका योजना ८० प्रतिशत पूरा गरेको दाबी गरेको छ। विभिन्न वडामा गरी ५६ किलोमिटर बाटो ढलान गरेको महानगरपलिका योजना शाखा प्रमुख काफ्लेले सुनाए। महानगरले आर्थिक वर्ष २०७४/७५ मा स्थानीय भौतिक पूर्वाधार विकास अन्तर्गत बाटो ढलान योजना अगाडि बढाएको थियो।
‘पोखरा एकदमै पानी पर्ने ठाउँ हो। कुनै ठाउँमा पिच गर्दा पनि त्यो टिकाउ हुँदैन। बाटोको आयु लम्ब्याउन पनि महानगरले सकेसम्म ढलानलाई प्राथमिकतामा राखेको छ,’ काफ्लेले भने, ‘गत आर्थिक वर्षमा बाटो ढलान गर्न ३ सय ८० योजना ल्याएका थियौं, त्यसमध्ये ७७ वटा योजना मात्रै बाँकी रहेका छन्।’ महानगर क्षेत्रभित्र पर्ने विभिन्न सडक खण्डमा बाटो स्तरोन्नतिमात्रै नभएर ढलान गरी सुरक्षित बनाएको शाखा प्रमुख काफ्लेले दाबी गरे।
यस्तैगरी, गत आर्थिक वर्षमा महानगरभित्रका बाटो कालोपत्रे तथा पक्की गर्ने काम ७६ प्रतिशतमात्रै सकिएको छ। कतिपय वडासँग समयमै सम्झौता हुन नसकेको र जनसहभागितामा ढिलाई भएकाले निर्माण कार्यमा पनि असर परेको काफ्लेले प्रष्ट्याए। ‘कतिपय स्थानमा सम्झौता भएपनि बाटो चाक्लो बनाउने क्रममा स्थानीयले जग्गा छोड्न मान्नुभएन। कतै पानी ट्यांकी प¥यो। जसका कारण पनि काममा ढिलो भयो,’ उनले भने।
उता, महानगरले गतवर्ष ९१ किलोमिटर बाटो स्तरोन्नति गरेको छ। ‘महानगरले ८७ प्रतिशत सडक स्तरोन्नति गरेको छ। यसरी हेर्दा सडक स्तरोन्नति गर्ने भनि योजना बनाइएका धेरै काम सकिएको छ। केही काममात्रै बाँकी छन्। ती काम पनि यही आर्थिक वर्षमा पूरा गर्नेछौं,’ उनले भने। महानगरले १ सय ८० वटा सडक स्तरोन्नति गर्ने योजना अघि सारेको थियो। जसमध्ये अब काम सकिन २३ योजनामात्रै बाँकी छन्।
शाखा प्रमुख काफ्लेका अनुसार महानगरले नयाँ सडक पिच गर्ने ५० वटा र पुरानालाई मर्मत, गटर, पिचसँगै ढलान गर्ने ४१ वटा योजना बनाएको थियो। ‘पक्की तथा कालोपत्रे काम महानगरले ७६ प्रतिशत ग¥यो,’ उनले भने। महानगरले ढलानलाई नै प्राथमिकतामा राखेर काम गरिरहेकाले कालापत्रेको काम कम भएको योजना शाखा प्रमुख काफ्लेको भनाइ छ।
‘यसबीचमा महानगरभित्रका पुराना तथा भत्किएका बाटा मर्मत, गटर, पिचसँगै नाला निर्माण पनि गर्यौं,’ काफ्लेले भने, ‘३० किलोमिटर बाटो कालोपत्रे र पक्की बनायौं। २० फिटभन्दा माथि चौडाई भएका बाटामा मात्रै कालोपत्रे गरेका छौं।’ पुराना बाटालाई मर्मत गरेर कालोपत्रे गर्दा भने सानो चौडाइ भएको बाटोमा समेत कालोपत्रे गरिएको छ।
महानगरपालिकाले योजना बनाएका २६ वटै ग्राभेल बाटो निर्माण कार्य भने शतप्रतिशत पूरा भएको कार्यालयले दाबी गरेको छ। ग्राभेल बनाउने बाटोबारे योजना आकस्मिक हुने हुनाले सबै काम समयमै पूरा गरेको महानगरले जनाएको छ। महानगरले गत आर्थिक वर्षमा ५ किलोमिटर बाटो ग्राभेल गरेको थियो। ‘बाटो ग्राभेल गर्ने काम गुनासो आयो या आवश्यक प¥यो भने छिट्टै गर्नुपर्ने हुन्छ। यसलाई हामी आकस्मिक सेवा विधामा राखेर काम गर्दै आएका छौं, गुनासा तथा माग भएका सबै बाटो ग्राभेल गरिसक्यौं,’ काफ्लेले भने।
महानगरले गत आर्थिक वर्षमा ३५ किलोमिटर कच्ची बाटो र ४ किलोमिटर नयाँ ट्र्याक खोलेको थियो।
महानगरले गत आर्थिक वर्षमा गरेको स्थानीय भौतिक पूर्वाधार विकासः
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
