काठमाडौं- बढुवाका लागि भनेर विज्ञापन खुलाएको झण्डै एक महिना बित्न लाग्दा समेत सशस्त्र प्रहरी बल (एपीएफ) मा बढुवा हुन सकेको छैन। असारको अन्तिम दिन सशस्त्र हेडक्वाटरले सहायक हवल्दारदेखि एसएसपीसम्मको बढुवा लागि भन्दै फारम खुलाएको थियो।
बढुवाको फारम भर्ने म्याद दुई साता साउन १४ गतेसम्म राखिएको थियो। सो अनुसार बढुवाका आकांक्षीहरुले फारम पनि भरिकसकेका थिए। तर फारम भर्ने म्याद सकिएको १० दिन बितिसक्दा पनि सशस्त्रले बढुवा निकाल्न सकेको छैन।
बढुवाका लागि हुने आन्तरिक प्रतिस्पर्धा र चलखेलका कारण अहिलेसम्म बढुवा हुन नसकेको सशस्त्रका अधिकारी नै बताउँछन्। संगठन भित्र हुने अस्वभाविक चलखेल, लविइङ र बाहिरी दबाबका कारण अहिलेसम्म बढुवा हुन सकेको छैन।
बढुवाका लागि भन्दै सशस्त्र प्रहरी हेडक्वाटरको पहलमा १७५ जनाको दरबन्दी समेत थप भएको थियो। ९८ जना नयाँ दरबन्दी र ७७ जनाको समायोजनमार्फत मिलान गरी जम्मा १७५ जनाको दरबन्दी थप गरिएको थियो। उक्त दरबन्दी थप भएलगत्तै सशस्त्रले बढुवाका लागि सूचना निकालेको थियो। तर अस्वस्थ प्रतिस्पर्धाका कारण अहिलेसम्म बढुवा हुन सकेको छैन।
अहिले एसपीबाट एसएसपीमा १२ जना बढुवा हुने लाइनमा छन्। उनीहरु सि सं २ का एसपी हुन्। सि सं का एसपीहरु अहिले एसएसपी भएको अवस्थामा उनीहरुको डीआईजी बन्ने बाटो खुल्छ। यदि यो पटकको बढुवा समेत छुटेको अवस्थामा भने उनीहरु एसएसपीबाटै घर जानुपर्ने अवस्था आउँछ। जसकारण यो पटकको बढुवामा जसरी भए पनि छिरेर डीआईजी बन्ने बाटो खुला गर्न भन्दै एसपीहरुबीच अहिले चर्को प्रतिस्पर्धा छ।
दरबन्दी १२ जनाको तर प्रतिस्पर्धी धेरै हुँदा एसपीबाट एसएसपीमा बढुवा हुन सकेको छैन। अहिले एसपीबाट एसएसपी बन्न लागेकाहरु पनि सि सं २ बाट दोस्रो लटमा एसपी भएकाहरु हुन्। यसअघि सि सं २ का टोलीहरु २ पटक गरेर एसएसपीमा बढुवा भइसकेका छन् भने अब सि सं को २ टोली तेस्रो लटमा एसएसपी बन्ने तयारीमा छ।
बढुवाको पहिलो नम्बरमा राजेश उप्रेती रहेका छन्। उनी संगठन भित्र विवादित पात्रको रुपमा चिनिन्छन्। रुपन्देहीमा हुँदा अत्यधिक बल प्रयोग गरेको भन्दै उनको विरोध पनि भएको थियो। दोस्रो नम्बरमा रहेका गंगाराम श्रेष्ठ त सर्लाही हुँदा जुवा खेल्दै गरेको भिडिओ बाहिरिएपछि कारबाही समेत भोगेका थिए। त्यतिबेला उनलाई जिम्मेवारीबाट हटाइएको थियो।
अर्का भरत खनियाँ त शक्तिकेन्द्रको निकट रहेर सधैं इन्चार्च खाइरहने व्यक्ति हुन्। कतिसम्म भने सरुवा भएको ठाउँ जान भनेर प्लेन चढ्न लागेका एसपीलाई समेत रोकेर खनियाले यसअघि इन्चार्ज खाएका थिए।
अर्का प्रतिस्पर्धी एसपी तेजप्रसाद पोखरेल कमाण्ड कमजोर भन्दै पर्साबाट तानिएका व्यक्ति हुन्। १६ नम्बरका रहेका विकास घिमिरे पनि बढुवाको तीव्र लविइङमा छन्। रोल क्रममा पछि परे पनि शक्तिकेन्द्र रिझाएर जसरी भए पनि बढुवा हुने लाइनमा उनी रहेका छन्।
त्यसैगरी सि सं ३ का टोलीहरु डीएसपीबाट एसपी बन्दैछन्। सि सं ३ का सबै डीएसपीहरु एसपी बन्ने हुँदा यसमा खासै समस्या छैन। मात्रै रोल क्रममा को अगाडि आउने भन्ने प्रतिस्पर्धा यो टोलीमा छ। यो टोलीका केही अधिकृतहरु भने यसअघि नै एसपी भइसकेका छन्। २०६० सालमा भर्ना भएको सि सं ३ को सशस्त्र प्रहरी निरीक्षकको ठूलो टोली अहिलेसम्म डीएसपीमै रहेका छन्। अब उनीहरु एसपी बन्ने छन्।
त्यसैगरी सशस्त्रमा देखिएको बढुवाका अर्को समस्या भनेको इन्स्पेक्टरबाट डीएसपी बढुवा हो। अहिले सि सं ७ र सि सं ८ मा इन्स्पेक्टर भर्ना भएका टोलीहरुलाई एकै पटक एउटै विज्ञापनमार्फत डीएसपीमा बढुवा गर्न लागिएको छ। जसकारण सि सं ७ का टोलीहरु असन्तुष्ट छन्। सि सं ७ का ६६ जना र सि सं ८ का ११ जना अहिले डीएसपी बन्दैछन्। सि सं ८ मा जम्माजम्मी ११ जनाको मात्रै टोली छन्। उनीहरु सबै अहिले नै डीएसपी बन्दैछन्।
सि सं ७ र ८ सँग एकै पटक डीएसपीमा बढुवा गर्दा सिनियर ब्याचलाई समेत टप्न सक्ने र संगठनको चेन अफ कमाण्डमा समेत असर पर्ने भन्दै सि सं ७ को टोली कुनै पनि हालतमा एकै पटक बढुवा गर्न नहुने पक्षमा लविइङ गरिरहेको छ। सि सं ८ लाई एक दिन भए पनि ढिलो बढुवा गर्नुपर्ने सि सं ७ को टोलीको अडान छ।
यसअघि लेखा तथा कानुन समूहका ५ जना सि सं ३ को असई टोली डीएसपी भइसकेको छ। त्यस्तै सि सं ९ का इन्स्पेक्टरद्वय तुलसिंह केसी र सत्यदेवी बस्नेत सेवा परिवर्तन गरेर कानुनमा गएर यसअघि नै डीएसपी भइसकेका छन्। समूहका नाममा पछाडि भर्ना भए पनि छिटो बढुवा हुने प्रवृत्ति सशस्त्रमा छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
