पाेखरा– नारायणस्थान गुठीले विभिन्न व्यक्तिका नाममा भएको करिब ५० रोपनी जग्गा फिर्ता पाएको छ। नारायणस्थान देवालयमा कार्यरत पूजारी तथा केही व्यक्तिले आफ्नो नाममा जग्गा दर्ता गरेको पाइएपछि अख्तियार दुरुपयोग अनुसन्धान आयोगले छानबिन गरी गुठीलाई जग्गा फिर्ता गरेको हो।
गुठीको ४० रोपनी जग्गा विविध समयमा त्यहाँ कार्यरत पुजारी तथा १० रोपनी जग्गा व्यक्तिको नाममा दर्ता गरिएको आयोगले अदालतमा तथ्य पेश गरेको थियो। सो तथ्यका आधारमा गुठी संस्थानले साउन ३० मा व्यक्तिले दाबी गरेका जग्गा गुठीकै भएको ठहर गरेको हो। ‘२०७३ सालदेखि नै अख्तियारले अनुसन्धान र छानबिन गरिरहेको थियो। त्यसको २ वर्षपछि गुठीको संस्थानले जग्गा गुठी कै भएको ठहर गर्यो,’ नारायणस्थान धार्मिक क्षेत्र विकास समितिका अध्यक्ष महेश पराजुलीले भने।
गुठीको जग्गा २०३० सालपछि पुजारी तथा व्यक्तिले आफ्नो नाममा बनाउने काम तीव्र भएको शनिबार पोखरामा धार्मिक विकास समितिले जानकारी दिएको हो। ‘हामीलाई पनि थाहा थिएन तर, गुठीको जग्गामा संरचना बन्न लागेपछि यो तथ्य बाहिर आएको हो,’ पराजुलीले भने।
प्रतिवादीले ३५ दिनभित्र बदरका लागि मुद्दा नदिएमा लागत कट्टी भई गुठीको नाममा नयाँ पुर्जा बन्ने उनले जनाए।पोखरा–१४ मा रहेका गुठीको ९७५ कित्ता जमिन पुष्पलाल लामिछानेका नाममा छ। सोही स्थानको ९७६ नम्बरको विष्णुमाया आचार्यको नाममा छ। गुठीको ५८९, २३६ र ५९० नम्बर कित्ताको जग्गा तत्कालिन अधिकृतले पवित्रा पाध्या र गंगामाया पाध्याको नाममा गरेको पाइयो,’ समितिका सल्लाहकार रामचन्द्र पौडेलले भने।
५८९ र ५९० कित्ताको जग्गा पछि आएर धेरै व्यक्ति नाममा दर्ता भएको गुठीले जानकारी दिएको छ। २०६१ सालमा पुष्पराज लामिछानेले आफ्नो नाममा गुठीको जग्गा पार्न धेरै पहल गरेको देखिएको पौडेलले बताए। ‘गुठीका जग्गामध्ये सबैभन्दा पोखरा–१४ को जग्गा व्यक्तिका नाममा दर्ता भएको पाइयो,’ उनले भने।
गुठीको फिर्ता भएका जग्गा
ठेगाना कित्ता नम्बर क्षेत्रफल
पोखरा १४ ९७५ ८–७–२–१/४
पोखरा १४ ९७६ ६–२–१–०
पोखरा १४ ५८९ ३–२–२–३/४
पोखरा १४ ५९० ७–४–१–१/२
पोखरा १४ १ ३–१५–०–०
पोखरा १४ १०१ ०–२–३–१/४
पोखरा १६ २३६ १८–६–२–२
पोखरा १६ ८२ ०–६–१–०
पोखरा १३ ३३९ १–४–१–१–१/३
विसं १९४२ सालमा महिन्दर निर्माण गरी खेतमुरी १२० र पाखो ४० मुरी फिरन्ता ब्रह्मचारी गणेश गिरीले दान दिए। विसं १९४३ मा उनको मृत्यु भयो। विसं १९५८ मा देवीदत्त पाध्याले ‘मन्दिरको रेखदेख र पूजाआजा गर्न पुजारी कायम गरी पाऊँ’ भनि निवेदन दिए। तत्कालिन श्री ३ देवशमशेर र कमान्डर इन चिफ चन्द शमशेरले पाध्यालाई ‘मन्दिरमा आएका साधुसन्त र भक्तजनको सेवा गर्नु, देवालय भत्के बिग्रेको मर्मतसम्भार गर्नु’ भनि पुजारीको जिम्मा दिए।
पछि विसं १९९० को महाजाँचमा पाध्याले गुठीको जग्गा आफ्नो नाममा गरेको फेला परेको गुठीले जानकारी दियो। ‘विभिन्न समयमा काम गरेका पुजारीहरूले नै गुठीका जग्गा हिनामिना गरेका रहेछन्, हामीलाई थाहै छैन,’ समितिका वरिष्ठ सल्लाहकार शुक्रराज शर्माले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770871670.png)
-1770871503.png)
-1764146706.png)
-1770562345.jpg)
