सिनेमा

प्रसाद २ : उही चरित्रमा बदलिएका अनुहार

समर्पण श्री बुधबार, वैशाख १३, २०८० ०८:३९

काठमाडौं– फिल्म निर्देशक दिनेश राउतले ‘प्रसाद’को निर्देशन गरेका थिए।

२०७५ सालमा रिलिज भएको उक्त फिल्मले व्यावसायिक हिसाबमा सन्तोषजनक कमाइ गर्‍यो। तर समीक्षकहरूबाट भने मिश्रित प्रतिक्रिया पायो।

समीक्षकहरूको टिप्पणी थियो, ‘बलात्कारबाट जन्मिएको सन्तानलाई प्रसादको रुपमा अर्पण गरियो। यो गलत छ।’ जातीय र महिला मुद्दामाथि बनेको फिल्मले बहस छेडिरह्यो।

‘के त्यतिबेलै सिक्वेल बन्छ भन्नेमा निश्चित हुनुहुन्थ्यो त?’ फिल्मका लेखक सुशील पौडेललाई सोध्यौँ। ‘यसका निर्देशक दिनेश राउतले प्रसादको कथा सकियो भन्नुभएको थियो। तर कथा बाँकी थियो,’ लेखक पौडेल भन्छन्।

एउटा लेखकका लागि कथा सकिएको थिएन। अन्तरजातीय विवाह गरेका बाबुराम र नारायणी समाजको बहिस्करणमा परेका थिए। १२ वर्षको अन्तरमा समाजमा धेरै कुरा परिवर्तन भए। त्यो परिवर्तनमा पात्रका कथा पनि बदलिन्छन्। सुशीलले यसकारण ‘प्रसाद’को सिक्वेल लेखे।

‘प्रसाद २’ आगामी शुक्रबारबाट हलहरूमा प्रदर्शन हुँदैछ। यसपटक फिल्मलाई सुदर्शन थापाले निर्देशन गरेका छन्। प्रायः लभ स्टोरी जनराका फिल्म निर्माण गरेका सुदर्शनका लागि ‘प्रसाद २’ नयाँ चुनौती हो।

पछिल्ला समय मुद्दाकेन्द्रित सिनेमामा ध्यान खिच्न थालेका सुदर्शन ‘प्रसाद २’ आर्ट र कमर्सियल भ्यालु दुवै मिसिएको फिल्म भएको बताउँछन्। ‘प्रसाद २ पनि कमर्सियल फिल्म हो। कुनै पनि आर्टले व्यावसायिक रुपमा सफलता हासिल गरेन भने आर्ट हैन। बिक्री भएको आर्ट पो आर्ट त,’ सुदर्शन भन्छन्।

उसो त ‘प्रसाद’को सिक्वेल बन्दा कथाको सिलसिला उही भए पनि निर्देशक फरक छन्। सुदर्शनले सिक्वेलमा आफूले अथक मेहेनतत गरेको बताउँछन्। ‘नारायणी,बाबुरामले प्रसादमा जे भोगे। जति संघर्ष गरे। १२ वर्षपछि उनीहरूले गरेका पारिवारिक, सामाजिक र राजनैतिक संघर्ष र उनीहरूले अधिकार प्राप्तिका लागि लडेको लडाइँका कुरा छन्। त्यसकारण यो वास्तवमै सिक्वेल बनेको छ,’ सुदर्शन भन्छन्।

लेखक पौडेलले ‘प्रसाद’मा खेप्नुपरेको आलोचनालाई यसपटक सचेततापूर्वक सुधारे होलान् त?

यसबारे उनी भन्छन्, ‘फिल्ममा लेखकको हिसाबमा प्रसादको कुरा बुझाउन सकिएन होला। वा बुझ्न सकिएन होला। एउटा बलात्कारीबाट जन्मेको बच्चालाई किन प्रसाद मान्ने भनिएको छ। फिल्म हेरिरहँदा बाबुरामको डाइलगको आशय छ–एउटा मन्दिरमा चढ्दै गर्दा प्रसाद कुन रुपमा थियो कसैलाइ मतलब हुन्न। जब प्रसादको रुपमा आउँदै गर्दा चोखो हुन्छ नि। नारायणको कोख त पवित्र हो नि। प्रसाद त बाबुरामले भनेको हो। यसकारण हामी गलत थिएनौं भन्ने लाग्यो।’

उही पात्र, अलग कलाकार
फिल्मका मुख्य पात्र बाबुराम उतिबेला अभिनेता विपीन कार्की थिए। अहिले पनि उनी नै छन्।

तर नारायणीको भूमिकामा देखिएकी अभिनेत्री नम्रता श्रेष्ठ विवादका कारण सुटिङस्थलबाट फर्किइन्। नम्रताले अस्वीकार गरेपछि नारायणीको भूमिकाका लागि अभिनेत्री केकी अधिकारी अनुबन्धित भइन्।

‘प्रसादमा नारायणी जुन सिद्धान्तलाई विश्वास गर्छे, सबै कुरा यथावत छन्। अनुहार मात्र परिवर्तन भएको हो,’ केकी भन्छिन्, ‘विविध कारणले एउटा कलाकारले नखेलेपछि मैले नारायणीलाई अपनाएँ। यो भन्दा ठूलो चुनौती त अरु थिए।’

नारायणी पात्र कस्तो छ त?

केकी सिक्वेलसम्म आइपुग्दा पात्रमा केही नयाँ आयाम थपिएको बताउँछिन्।

अभिनेता अर्पण थापा सिक्वेलमा रमेशको चरित्रमा छन्। यो चरित्र ‘प्रसाद’मा निश्चल बस्नेतले निर्वाह गरेका थिए। ‘यसमा अनुहार मात्र परिवर्तन भएको हो। कथाको विकास र पात्रमा हैन,’ अर्पण भन्छन्, ‘उसको हाउभाउ, सोच समान छन्। त्यसकारण फरक पात्र जन्माएको हैन, उही पात्रलाई फरक व्यक्तित्वले निभाएको हो।’