सिनेमा

‘राधा’ लाई अलग बाटोबाट डोहोर्‍याइरहेका सुवर्ण

समर्पण श्री शनिबार, वैशाख ९, २०८० १६:३५

काठमाडौं– ‘राधा प्राविधिक पाटोबाट हेर्दा बलियो सिनेमा हो,’ फिल्म निर्देशक नवीन सुब्बाले केही महिनाअघि भनेका थिए। नेपालमा बनिरहेका फिल्ममध्ये निर्देशक सुब्बालाई उत्कृष्ट लागेको फिल्म थियो ‘द सिक्रेट्स अफ राधा।’

तर, त्यही ‘राधा’ १० भदौमा रिलिजको समय थुप्रै बाधा व्यहोर्नुपर्‍योे। फिल्मका निर्देशक सुवर्ण थापालाई ‘राधा’प्रति पूर्ण आत्मविश्वास थियो। नारीप्रधान फिल्म भएका कारण उनले ठानेका थिए, ‘तीजको समयमा फिल्म चल्छ।’

किनकि फिल्मको प्रोमोसनल गीत ‘पाउमा पाउजू छैन बरी लै’ तीजभरि गुन्जियो। तर, हलमा फिल्मले कमजोर व्यापार गर्‍यो। सुवर्णलाई लाग्यो, ‘टाइमिङ गलत पर्‍यो।’

लगत्तै उनले पत्रकारसम्मेलनमार्फत् फिल्म स्थगन गरे। त्यसयता धेरै नेपाली दर्शकले ‘राधा’लाई महसुस गर्न पाएनन्।

०००

गत चैत्रमा सम्पन्न अन्तर्राष्ट्रिय फिल्म फेस्टिभलमा फिल्म ‘राधा’ले जुरी अवार्ड पायो। श्यामश्वेत भर्सनमा देखाइएको ‘राधा’ले जुरी र दर्शकहरूबाट मीठा प्रतिक्रिया बटुल्यो। उसो त यसअघि बनेका सुवर्ण निर्देशित फिल्म ‘सुनगाभा’ र ‘मलामी’ आजसम्म पनि चर्चामो विषयमा पर्छन्।

सुवर्णलाई लाग्छ, ‘ यी फिल्मजस्तै राधाको आयु पनि लामो छ।’

केही दिनअघि मात्र उनले श्यामश्वेत भर्सनको विशेष स्क्रिनिङ गरे। त्यसयता ‘राधा’ले पुनः फिल्म पारखीमाझ चर्चा पाइरहेको छ।

फिल्म एउटी महिलाको कठोर संघर्षको कथामाथि बनेको छ। विदेश जान भनेर हिँडेका राधाका श्रीमान्को महिनौँसम्म फोन आउँदैन। गर्भमा सन्तान हुर्किरहँदाको पीडाका बाबजुत राधा श्रीमान् खोज्न सहर निस्कन्छिन्। सहर पुग्दा एकपछि अर्का रहस्यका पत्रहरू खुल्दै जान्छन्। ‘के राधाका हराएका श्रीमान् भेटिन्छन्?’ सस्पेन्सले फिल्म हेर्न बाँकी दर्शकहरूका निम्ति हलसम्म डोहोर्‍याउन सक्छन्।

फिल्ममा ‘राधा’ बनेकी सृष्टि श्रेष्ठ र श्रीमान्को भूमिका निर्वाह गरेका सौगात मल्ल, सुन्दर परियारको चरित्र निर्वाह गरेका खगेन्द्र लामिछानेको अभिनय अब्बल छ।

ध्वनि, पार्श्वध्वनि, सिनेमाटोग्राफी, कलर र पटकथा सबै कुराले अब्बल मानिएको ‘राधा’लाई फेरि हलमा लैजाने तयारी गर्दैछन् सुवर्ण।

‘राधा’को अलग बाटो

हलबाट ‘राधा’लाई निकालेपछि सुवर्णले सोचे, ‘यसलाई अलग बाटोबाट दर्शकमाझ पुर्‍याउँछु।’ त्यही क्रममा उनी फिल्मलाई लिएर अष्ट्रेलिया यात्रामा पनि निस्किए। ‘राधाको अष्ट्रेलिया यात्रा कस्तो भयो?’ सुवर्णलाई सोधेका थियौँ।

सुवर्णले आशावादी हुँदै भनेका थिए, ‘यात्राले धेरैको मन जित्यो। फिल्मको महत्व अझ बढी थाहा पाएँ।’

अष्ट्रेलियाका सात सहरमा फिल्मको शो प्रदर्शन भएको थियो।

सुवर्णले उता जानुअघि केही शुभचिन्तकहरूलाई खबर गरे। यताबाट जाँदा साथीहरूले भन्थे, ‘टिकटको भाडा पनि उठ्दैन। दुःख नगर।’ उनीहरूको चिन्ता थियो, ‘अब अर्को फिल्म बनाए पनि हुन्थ्यो नि।’

‘तर एउटा फिल्म नसकी अर्को कसरी बनाउनू!’ सुवर्णको जिकिर थियो।

सुरुमा अष्ट्रेलियाको मुख्य सहरमा शो गर्ने योजना बनाए उनले। निर्देशक आफैं शो देखाउन खटिइरहेको देख्दा शुभचिन्तकहरूले भने, ‘तपाईं त आफैं आइरहनुभएको छ है। अरु त यसरी आउँछन्, रेड कार्पेट गर्छन्। झिलिमिली गर्छन्, जान्छन्।’

हुन पनि सुवर्ण आफैं हल बुक गर्थे, आफैं खटिन्थे।

पहिलो शो १७ डिसेम्बरमा सिड्नीमा भयो। त्यहाँ २० जना विदेशीहरू पनि दर्शक थिए। फिल्म हेरेपछि उनीहरूको प्रतिक्रिया थियो, ‘यतिको नेपाली फिल्म बन्छ भनेर सोचेकै थिएनौँ। खुसी लाग्यो।’

‘राधा’लाई विदेशका अब्बल फिल्मसँग तुलना गरेर प्रशंसा गरेको सुन्दा सुवर्ण पुलकित बने।

मध्य डिसेम्बरमा त्यो सहरमा विदा पर्ने रहेछ। क्रिसमस पनि त्यही बेला। त्यतिबेला हल अत्यन्तै महंगो हुनेरहेछ। ‘पहिला १० डरलमा पाउने सिटको २१ डलर तिर्नुपर्ने भयो। त्यतिबेलै अवतार पनि आउँदै थियो। तीन हप्ता त यसैमा गयो,’ फिल्म शो गराउँदाका अफ्ठ्याराहरू उनी सुनाउँछन्।

त्यहाँ बसेर नहुने देखिएपछि सुवर्ण मेलबर्न गए। मेलबर्नमा शो अपेक्षित भयो। त्यहाँ एउटा शो बाट १ हजार डलर कमाइ भयो। त्यसपवछि बाँकी सहररमा १२ वटा शो भयो।

सुवर्ण प्रत्येक फिल्म दर्शकसँगै बसेर हेर्थे। उनीहरूको प्रतिक्रिया प्रत्यक्ष सुन्न र देख्न पाउँथे। फिल्म हेरेपछि प्रायः दर्शकले सोध्थे, ‘यति राम्रो फिल्म कि चलेन?’

सुवर्ण भन्थे, ‘यसरी दर्शकसम्म पुर्‍याउन सकिएन।’

१२ मार्चमा अन्तिम शो सकाएर सुवर्ण १८ तारिकमा नेपाल फर्किए। ‘म अनिश्चित यात्रामा गएको थिएँ। कस्तो हुन्थ्यो, थाहा थिएन,’ यात्राबारे उनी सुनाउँछन्, ‘फर्केपछि लाग्यो मैले २५ प्रतिशत मात्र गर्न सकेछु। अझै धेरै गर्न सकिने रहेछ।’

सुवर्णले फिल्मलाई दुई भर्सनमा देखाएका छन्। एउटा रंगिन, अर्को श्यामश्वेत। ‘श्यामश्वेतचाहिँ फेस्टिचभलका लागि तयार पारेको हुँ, रंगिनचाँहि हलमा रिलिज गर्न,’ सुवर्ण भन्छन्।

फेस्टिभलमा अवार्ड जितिरहने ‘राधा’लाई नेपालका हलहरूमा दर्शकले पनि न्याय गर्छन् भन्ने आशामा छन् उनी। ‘त्यो उपयुक्त समय पर्खिरहेको छु,’ उनी निश्चिन्त भावमा भन्छन्।