दाङ– दाङ घोराहीका मासु व्यापारीले ग्राहकलाई खसीको मासु भन्दै भेडा र बाख्रीको मासु बिक्री गर्ने गरेको पाइएको छ। घोराही उपमहानगरपालिका–१४, नयाँ बजारमा रहेको बधशालामा रहेका अधिकांश मासु व्यापारीले उपभोक्तालाई ठगी गर्दै खसीको मासु भन्दै बाख्री र भेडाको मासु बिक्री वितरण गर्दै आएको पाइएको हो।
मंगलबार बिहान करिब ६ बजे बधशाला पुग्दा काटेर तयार गर्न राखिएको अवस्थामा केही भेडा र बाख्री देखिन्थ्यो। काटिएका पशु भुइँमै असरल्ल तवरबाट वरपर मिल्काइएको थियो। नत सुरक्षित तवरबाट नै काटिएको थियो। मानौं की फोहर र झिँगा भन्किनु त्यस स्थानका लागि सामान्य कुरा हो। सो क्रममा एउटा पनि खसी काटिएको थिएन। नत कुनै तयारी नै थियो।
उता अधिकांश मासु व्यापारीले मुस्किलले दिनमा एक/दुई वटा खसी काट्ने र त्यसमा ५ देखि ७ वटासम्म भेडा र बाख्रीको मासु मिसाएर बेच्ने गरेको बधशाला वरपरका स्थानीय बताउँछन्। ‘बध गर्ने स्थान र बिक्री गर्ने स्थान फरक–फरक भएकाले सर्वसाधारणलाई थाहै हुन्न’, एक स्थानीयले भने, ‘भित्रैबाट तयार गरेर ल्याउँछन्, त्यसैले कसैलाई थाहै हुन्न। तर, १/२ वटा टाउको र केही खुट्टा खसीको देखाउनलाई राख्ने गरेका छन्।’
खसी मासुको मूल्य प्रतिकिलो ६ सय, बाख्री र भेडाको मासु ४ सय ५० रुपैयाँ कायम गरिएको छ। त्यसले गर्दा खसीको मूल्यमा भेडा र बाख्रीको मासु बिक्री गर्दा बढी फाइदा हुने भएकाले व्यवसायीले यस्तो काम गरेको प्रष्ट बुझ्न सकिन्छ। यसरी मासु व्यापारीले खुले आम ठगी गर्दा समेत यसतर्फ सरोकारवाला कसैको ध्यान पुग्न सकेको देखिँदैन।
व्यवसायी भन्छन्–बेचेका छैनौं
व्यवसायीले भने खसीको भन्दै भेडा र बाख्रीको मासु नबेचेको दाबी गर्छन्। भेडा र बाख्रीको मासु तोकिएको छुट्टाछुट्टै पसलबाट मात्र बेच्ने गरेको खसी मासु व्यवसायी संघका अध्यक्ष असलम कुरेशीले बताए।
असलमले भने, ‘एक/दुई जना व्यापारीले यस्तो गरेका पनि हुन सक्छन्। त्यसको आधारमा सबै व्यवसायीले गर्छन् भन्न मिल्दैन। यदी त्यसो गरेको पाइएमा हामी पनि उनीहरुलाई कारबाहीको दायरामा ल्याउँछौं।’
अनुगमन गर्छाैं : मेयर चौधरी
घोराही उप–उपमहानरपालिकाका मेयर नरुलाल चौधरीले यसबारेमा तत्काल अनुगमन गर्ने बताएका छन्। अखाद्य मासुका कारण सर्वसाधारणको स्वास्थ्य जोखिममा पर्नसक्ने भन्दै चौधरीले छिट्टै मासु पसलको अनुगमन गर्ने बताए।
सर्वसाधारणबाट यसबारेमा व्यापक जन–गुनासो आएको भन्दै तत्काल अनुगमन गरी सत्यतथ्य फेला परे व्यावसायीलाई कारबाही गर्ने मेयर चौधरीले प्रतिवद्धता जनाए।
‘नगरपालिकाले अधिकार दिए कारबाही गर्छु’
उता, दाङका प्रमुख जिल्ला अधिकारी गजेन्द्रबहादुर श्रेष्ठले अखाद्य मासु बेच्ने व्यापारीलाई कारबाही गर्ने बताएका छन्। बजार अनुगमनदेखि सम्पूर्ण अधिकार स्थानीय तहमा गएको बताउँदै प्रजिअ श्रेष्ठले नगरपालिकाले कारबाही गर्ने अधिकार दिए तत्काल प्रकृया शुरु गर्ने जानकारी दिए।
आफुले पनि यस बारेमा चासो दिएको बताउँदै प्रमुख जिल्ला अधिकारी श्रेष्ठले भने, ‘नागरिकको स्वास्थ्यमा प्रतिकुल असर पार्ने र मिसावट गर्ने व्यापारीलाई मुद्धा समेत चलाउन सक्छौं।’
अखाद्य मासु बेच्नेलाई ५ हजार जरिवाना
अखाद्य मासु बेच्ने व्यापारीलाई ५ हजार रुपैयाँसम्म जरिवाना हुने प्रावधान रहेको छ। यसका साथै अखाद्य मासु बिक्री वितरण गरेको भेटिए प्रमुख जिल्ला अधिकारीले तजविजका आधारमा हदैसम्मको कारबाही गर्ने प्रावधान समेत रहेको पशु चिकित्सक डा चन्द्रबहादुर राणा बताउँछन्।
राणाका अनुसार मासु काट्नु भन्दा पहिले पशुको स्वास्थ्य परिक्षण गर्नुपर्ने, काटेको मासु चिस्यान ‘डिप फ्रिज’मा राखेर मात्र बिक्री वितरण गर्न पाइने कानुनी व्यवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1786602170.png)
-1789631269.jpg)
