काठमाडौं– काठमाडौंमा हुन गइरहेको बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास अर्थात् बिमस्टेक सम्मेलनमा सरकारले सार्वजनिक विदा दिनेबारे छलफल अघि बढाएको छ। दुई दिनका लागि सार्वजनिक विदा दिनुपर्ने प्रस्ताव गृह मन्त्रालयका अधिकारीले गरेका छन्।
गृह मन्त्रालयका एक अधिकारीका अनुसार उनीहरुको सवारी व्यवस्थापन तथा सुरक्षालाई ध्यानमा राखी सार्वजनिक विदा दिनेबारे छलफल अघि बढाइएको हो।
आगामी १४ र १५ भदौमा काठमाडौंमा बिमस्टेकको चौथो सम्मेलन हुँदैछ। सम्मेलनमा ५ देशका राष्ट्रप्रमुख तथा सरकार प्रमुखहरु आउँदैछन्।
बिशिष्ट व्यक्तिहरुको सवारीका कारण दुइ दिन राजधानीको सडक अस्तव्यस्त हुन सक्ने भएकाले दुई दिन सार्वजनिक विदा दिनेबारे छलफल अघि बढाइएको काठमाडौंका प्रमुख जिल्ला अधिकारी राम प्रसाद आचार्यले बताए। साथै केही दिन सडकमा जोर बिजोर प्रणाली लागू हुने समेत सम्भावना छ।
४ वर्षअघि काठमाडौंमा भएको सार्क सम्मेलनमा पनि सरकारले दुई दिन सार्वजनिक विदा दिएर सवारी साधनमा जोर विजोर प्रणाली लागू गरेको थियो। २०७१ सालको मंसिर १० र ११ गते सार्वजनिक विदा दिएर सडकमा जोर विजोर प्रणाली लागू गरेको थियो। अझ विद्यालय त ४ दिन बन्द गरिएको थियो। त्यसकारण यसपटक पनि सार्वजनिक विदा हुने सम्भावना छ।
सम्मेलनको तयारी अन्तिम चरणमा
सम्मेलनको तयारी अन्तिम तयारीमा पुगेको परराष्ट्र मन्त्रालयले जनाएको छ। सम्मेलनमा भारतका प्रधानमन्त्री नरेन्द्र मोदी, थाइल्याण्डका प्रधानमन्त्री प्रयुत चान–ओचा, भुटानका प्रधानमन्त्री छिरिङ तोब्गे, बंगलादेशकी प्रधानमन्त्री शेख हसिना, श्रीलंकाका राष्ट्रपति माइथरीपला सिरिसेना, बर्माका राष्ट्रपति विन माइन्ट नेपाल आउँदै छन्। उनीहरुमध्ये भारतका प्रधानमन्त्री मोदी र थाइल्याण्डका प्रधानमन्त्री चान–ओचना १४ गते बिहान चार्टड विमानबाट नेपाल आउँदैछन्। अन्य अतिथि आउने समय टुंगो लागिसकेको छैन।
महानगरीय ट्राफिक प्रहरी महाशाखाका प्रमुख एसएसपी बसन्त पन्त बिमस्टेक सम्मेलनको क्रममा जनतालाई पनि धेरै दुःख नहुने र पाहुनाहरुको पनि सहज हुने गरी व्यवस्थापनको योजना बनाउने काम भइरहेको बताउँछन्।
सम्मेलन सोल्टी होटलमा गर्न लागिएको छ। सबै पाहुनालाई सोही होटलमा राख्ने निर्णय भइसकेको छ।
भोलिपल्ट उनीहरुलाई गोकर्ण फरेस्ट रिसोर्टमा ‘रिट्रिट’ दिने सरकारी तयारी छ। तर, गोकर्णसम्मको सडक अवस्था राम्रो नभएकाले ‘रिट्रिट’ दिने स्थानमा अझै निर्णय भइसकेको छैन। त्यसअघि सडकका खाल्डा पुरिएमा र पानी नपरेका गोकर्ण लैजाने सरकारको तयारी छ।
त्यस्तै, पाहुनालाई पाटन पनि घुमाउन लैजाने योजना बनेको छ। पाटनको सवारीको क्रममा सडक नै खाली गर्नुपर्ने हुन्छ। त्यस्तै राष्ट्रपतिसँग समेत छुट्टाछुट्टै भेट हुने भएकाले सार्वजनिक विदा दिएरै सडक व्यवस्थापन सहज बनाउन लागिएको हो।
त्यसै त जाम हुने काठमाडौंमा दिनमा पटक पटक रुट खाली गराएर ट्राफिक व्यवस्थापन गर्न धेरै गाह्रो हुने भएकाले सार्वजनिक विदा नै उपयुक्त हुने गृहका अधिकारीहरुको भनाई छ।
सम्मेलनमा आउनेमध्ये श्रीलंकाका राष्ट्रपति सिरिसेना र म्यानमारका राष्ट्रपति माइन्टको भ्रमण द्धिवपक्षीय समेत हुने छ। उनीहरुको भ्रमण केही दिन लामो हुने छ। सरकारले टुँडिखेलमा उनीहरुलाई ‘गार्ड अफ अरर’ समेत दिने छ।
त्यसका लागि सडक पटक पटक खाली गराउनुपर्ने हुन्छ। राजकीय भ्रमणमा सडक खाली गराउने परम्परा छ।
त्यस्तै, श्रीलंका र थाइल्याण्डका प्रधानमन्त्री तथा म्यानमारका राष्ट्रपति लुम्बिनी भ्रमणमा जाने बताइएको छ।
सम्मेलनको तयारीका लागि मंगलबार सम्मेलनको मूल तयारी समितिको बैठक मंगलबार प्रधानमन्त्री केपी शर्मा ओलीको अध्यक्षतामा बसेको थियो।
बैठकले सम्मेलनका नारा, घोषणपत्र तथा नेपालका एजेन्डाहरुबारे टुंगो लगाएको थियो।
सार्क सम्मेलनमा भारतबाट बुलेटब्रुफ गाडीहरु ल्याइएको यसपटक नेपालमै व्यवस्थापन गर्न लागिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
