काठमाडौं– बलात्कार आरोपी क्रिकेटर सन्दीप लामिछानेलाई राष्ट्रिय टिममा समावेश गरेको भन्दै समाजिक सञ्जालमा नेपाल क्रिकेट संघ क्यानविरुद्ध बाइकटक्यान (#BycottCAN) अभियान सुरु भएको छ।
सामाजिक सञ्जाल प्रयोगकर्ताहरुले ट्विटर र फेसबुकमा यो अभियान चलाएका छन्। ट्विटर प्रयोगकर्ता आन्विका गिरीले आरोपीको निलम्बन फुकुवादेखि राष्ट्रिय टिमसम्मको प्रवेशमा सरकार र प्रतिपक्षी पार्टी दुवैले मौनता साधेको आरोप लगाएकी छन्।
‘क्यानको अटेरीपनले सीमा नाघ्यो। तर, नागरिक मौन बस्दैनन्। अब हामी सडकबाट सोध्नेछौं, यो देशमा सर्भाइभरको सुरक्षा महत्त्वपूर्ण कि आरोपीलाई फूलमाला?’ उनले सोधेकी छन्।
त्यस्तै, बाबाजी नाम गरेका प्रयोगकर्ता लेख्छन्, ‘क्यान खासमा ‘क्यान नट’ भइसक्यो। अब यसलाई खारेज गरेर क्रिकेट बोर्ड अफ नेपाल गठन गर्नुपर्छ। यस्ता धतुरे भष्मासुरहरुलाई आजीवन क्रिकेट हेर्न समेत प्रतिबन्ध लगाउनुपर्छ।’
अमृता लम्साल लेख्छिन्, ‘हेलो क्रिकेटनेप बलात्कार तिम्रा लागि सामान्य घटना हो?’
पुस २९ गते आरोपित लामिछानेलाई उच्च अदालत पाटनले शर्तसहित २० लाख धरौटीमा रिहा गरेको थियो। एक किशोरीमाथि बलात्कारको आरोप खेपिरेहका लामिछाने बिहीबार क्यानको बन्द प्रशिक्षणमा सहभागी भएका छन्।
फागुन पहिलो साता घरेलु मैदानमा हुने आईसीसी विश्वकप लिग–२ अन्तर्गत नेपाल, नामिबिया र स्कटल्याण्डबीचको त्रिकोणात्मक एकदिवसीय सिरिजका लागि उनलाई बन्द प्रशिक्षणमा बोलाइएको हो। यसअघि मंगलबार पोखरामा भएको क्यानको बोर्ड बैठकले सन्दीपमाथि लगाइएको निलम्बन फुकुवा गरेको थियो।
#BycottCAN अभियानले शनिबार दिउँसो १ बजे माइतीघरमा भेला भएर क्यानको विरोधमा प्रदर्शन गर्न आह्वान पनि गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
