काठमाडौं– साढे ३३ किलो सुन तस्करी प्रकरणमा जिल्ला र उच्च अदालतबाट समान्य धरौटीमा रिहा भएका एक अभियुक्तकोे विरुद्ध सरकारी पक्षले सर्वोच्चमा दायर गरेको निवेदनको सुनुवाइ १८ पटकसम्म पेशी चढ्दै स्थगित हुँदै आएको छ।
विमानस्थलबाट सुन तस्करी गर्न मुख्यरुपमा सक्रिय रहेको आरोप लागेका त्रिभुवन विमानस्थलका कर्मचारी श्यामकृष्ण श्रेष्ठको मुद्दा पटक–पटक पेशी चढ्ने र थन्कने हुँदै आएको हो।
सुन तस्करीमा मुख्य अभियुक्तकै पक्षमा तल्ला अदातलले दिएको आदेश त्रुटीपूर्ण रहेको भन्दै महान्यायाधीवक्ताको कार्यालयले दर्ता गरेको निवेदनमाथि हालसम्म ३६ जना न्यायाधीशको इजलाश पार गरे पनि सुनुवाइ हुन नसकी सर्दै आएको हो। अन्तिम पटक बिहीबार उक्त मुद्दा कायममुकायम प्रधानन्यायाधीश ओमप्रकाश मिश्रसहितको इजलाशमा पेशी रहेको थियो। मिश्रसहित प्रकाशमानसिंह राउतको इजलाशको ‘ठ’ नम्बरमा पालो रहेको उक्त मुद्दा हेर्न नमिल्ने भन्दै पुनः स्थगित भएको हो।
सरकारी वकिलको कार्यालयले श्रेष्ठलाई पूर्पक्षका लागि थुनामा राखेर मुद्दाको किनारा हुनुपर्ने माग गर्दै २०७४ कात्तिक १२ गते निवेदन दर्ता गरेको थियो। उक्त निवेदनमा सर्वोच्चले अन्य सुन तस्करीका मुद्दासंगै राख्ने बाहेक अन्य आदेश गरेको छैन। जिल्ला अदालत काठमाडौंमा विचाराधिन मुद्दा फैसला हुने समय हुन लाग्दा समेत सर्वोच्चमा उक्त मुद्दाको सुनुवाइ हुन सकेको छैन।
धरौटीमा छोड्ने कि तारेखमा राख्ने विषयमा एक महिनामा निर्णय हुनुपर्ने भएपनि ९ महिनासम्म सुनुवाइ नै नहुनु आफैमा आश्चर्यजनक भएको एक सरकारी वकिलले बताए। एक वर्षमा मुद्दा फैसला भएको सर्वोच्चकै इतिहास हुदाँ सुन तस्करी गरेको आरोप लागेको व्यक्तिलाई धरौटीमा राख्ने कि नराख्ने विषय यति लामो समय रोकिनु पर्ने कुरा आश्चर्यजनक रहेको महान्यायाधीवक्ता कार्यालयका प्रवक्ता सञ्जिवराज रेग्मी बताउछन्।
सुन तस्करी र संगठित अपराधमा मुख्य अभियुक्त रहेको व्यक्ति जिल्ला र उच्च अदालतबाट धरौटीमा रिहा हुन नसक्ने जिकिर गर्दै सरकारी पक्षले सर्वोच्चमा निवेदन दर्ता गरेको थियो। उक्त निवेदनमा पहिलो सुनुवाइ गर्दै न्यायाधीश शारदाप्रसाद घिमिरेको एकल इजलासले जिल्ला अदालतको आदेश झिकाउने आदेश गरेको थियो। जिल्लाको फाइल सर्वोच्च आइपुगेको ५ महिना बितिसक्दा समेत उक्त मुद्दामा सुनुवाइ हुन नसकेको हो।
सरकारी पक्षले सुन ओसारपसारमा संलग्न भरियाहरु पूर्पक्षका लागि थुनामा रहेको अवस्थामा मुख्य अभियुक्त धरौटीमा रिहा हुन नसक्ने दावी निवेदनमा गरिएको छ। सरकारी वकिलको निवेदनमा मुख्य अभियुक्त अन्य देशमा भाग्ने खतरा भएकाले थुनामै राखेर मुद्दाको किनारा लगाउनुपर्ने माग गरिएको थियो।
सिआइबीले गत वर्ष २१ पुसमा त्रिभुवन विमानस्थलबाट भित्रिएको ३३ किलो ५ सय ७७ दशमलब ४० ग्राम सुन बरामद गरेको थियो। सुनसहित प्रहरीले तस्करीमा भरियाका रुपमा काम गर्ने दिलबन्धु थापा, सन्तोष काफ्ले र गोपालबहादुर शाहीलाई पक्राउ गरेको थियो।
विमानस्थलबाट सुन तस्करीमा सघाएको आरोपमा एसएसपी श्याम खत्री समेत पक्राउ परेका थिए। यस्तै, भन्सारका कर्मचारीहरु श्रीनारायण यादव, राजकुमार ढकाल र श्यामकृष्ण श्रेष्ठ पनि पक्राउ परेका थिए।
सिआइबीले करिब १७ करोड रुपैयाँको बिगो दावी गरी ३३ जना विरुद्ध मुद्दा दायर गरेको थियो। जसमध्ये तस्करीका नाइके भनेर प्रहरीले मुद्दा चलाएकाहरु सामान्य धरौटीमा छुटेका थिए भने भरियाका रुपमा काम गर्नेहरु पूर्पक्षका लागि थुनामा गएका थिए।
यसरी धरौटीमा छुटेकाहरुको मुद्दा सर्वोच्चमा विचाराधिन रहेको छ। सर्वाेच्चमा यी लगायत सुन तस्करीका अन्य घटनाहरु (३५ किलो, ३३ किलो र ७ किलो) मा धरौटीमा छुटेकाहरुको मुद्दा विचाराधिन रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790064844.png)
-1786602170.png)
-1789631269.jpg)
