काठमाडौं– विशेष अदालतले किर्ते हस्ताक्षर र मिलेमतो गरी ८ करोडभन्दा धेरै रकम भ्रष्टाचार गरेका लेखा अधिकृत रविनचन्द्र ढकाललाई थुनामा राख्न आदेश गरेको छ।
थुनछेक बहसपछि बिहीबार विशेष अदालतका न्यायाधीश चण्डीराज ढकाल, प्रमोदकुमार श्रेष्ठ वैद्य र नारायणप्रसाद पोखरेलको इजलाशले उनलाई थुनामा राख्न आदेश गरेको हो।
उनीमाथि उदयपुर र इलामका नगरपालिकामा लेखा अधिकृत हुँदा भ्रष्टाचार गरेको आरोपत्रमा अख्तियार दुरुपयोग अनुसन्धान आयोगले विशेषमा आइतबार मुद्दा दायर गरेको थियो। विशेषले पहिलो सुनुवाइ गर्दै मुद्दाको किनारा नलागेसम्म ढकाललाई थुनामा राख्ने आदेश गरेको हो।
त्यस्तै, उनलाई भ्रष्टाचार गर्न सहयोग गरेको अभियोग लागेका इलाम माइ नगरपालिकाका कार्यकारी अधिकृत कालिदास ढकाललाई भने १५ लाख धरौटीमा छोड्न आदेश विशेषले सुनाएको छ विशेषले तोकेको रकम बुझाएर उनी रिहा भएका छन्।
विशेषले करिब ४ करोड भ्रष्टाचार गरेको आरोप लागेका कटारी नगरपालिकाको भ्रष्टाचारमा धरौटी माग्ने आदेश नगरी सिधै थुनामा पठाएको हो।
ढकालले बैंकको नाममा विभिन्न किर्ते पत्र तथा कागजात तयार गरी कटारी नगरपालिकाको सञ्चित कोष खाताबाट आफ्नो नाममा रहेको व्यक्तिगत बैंक खातामा बदनियतपूर्ण तरिकाले ३ करोड ९७ लाख ५० हजार र २०७४ माघ महिनाको दोहोरो तलब निकाली ३६ हजार ९ सय ७ तथा २०७४ चैत्र महिनाको तलबी भर्पाइ मिलाइ ५० हजार समेत गरी कुल जम्मा ३ करोड ९ लाख ३६ हजार ९ सय ८७ भ्रष्टाचार गरेका थिए।
अनियमित तरिकाले आफ्नो व्यक्तिगत खातामा जम्मा गरी उक्त रकम आफैंले खर्च गर्नुका साथै आफ्ना परिवार तथा आफन्तका सदस्यहरुको नाममा अचल सम्पत्ति घरजग्गा जमिनहरु खरिद गरेका थिए।
अख्तियारको आरोप पत्रमा भ्रष्टाचार ऐन अनुसार विगो जरिवाना र सजायको माग गरिएको छ। ढकालले भ्रष्टाचार गरी कमाएको रकमबाट खरिद गरिएको निजको श्रीमती रिना आचार्य, आमा प्रेम कुमारी दाहाल र काकी सावित्री प्याकुरेलको नाममा रहेको घरजग्गा तथा ढकालकी श्रीमती रिना आचार्य, आमा प्रेम कुमारी दाहाल, सासु तुलसादेवी आचार्य, काकी सावित्री प्याकुरेल र साथी प्रमिला भण्डारीको नाममा रहेको बैंक खाताहरुमा मौज्दात जफत हुनुपर्ने आरोप पत्रमा उल्लेख छ। त्यस्तै कटहरी सरुवा हुनुअघि इलामको माइ नगरको लेखा अधिकृत हुँदा पनि ढकालले ३ करोड २४ लाख ५६ हजार १ सय भ्रष्टाचार गरेको अख्तियारको आरोपपत्रमा उल्लेख छ।
माइ नगरपालिकामा रहँदा ढकालले बैंकमा रकम जम्मा गर्ने प्रयोजनका लागि पठाएको पत्रमा र कार्यालयमा रहने पत्रमा विवरण फरक पार्ने, कार्यकारी अधिकृतको हस्ताक्षर आफैंले गर्ने र राजश्व तिरेको भौचर खडा गरी भ्रष्टाचार गरेका थिए। बदनियतपूर्वक अनियमित तरिकाले आफ्नो व्यक्तिगत खातामा जम्मा गरी उक्त रकम आफैंले खर्च गर्नुका साथै आफ्नो तथा आफ्ना परिवारका सदस्यहरुको नाममा अचल सम्पत्ति जग्गा जमिनहरु खरिद गरेको आरोप पत्रमा उल्लेख छ।
प्रमुख प्रशासकीय अधिकृत कालिदास ढकालसँग मिलेमतोमा सरकारी रकम भ्रष्टाचार भएको भन्दै उनलाई पनि भ्रष्टाचार मुद्दा दायर गरेको थियो। तर उनीसँग विशेषले १५ लाख मात्र धरौटी माग गरेको छ।
अख्तियारले कालिदाससँग २ करोड ३४ लाख ४३ हजार १ सय असुल हुनुपर्ने माग गरेको थियो।
यसरी हिनामिना गरिएको रकम दुवै मिलेर जग्गा खरिद गर्ने गरेको अख्तियारको आरोपपत्रमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790060837.png)
-1786602170.png)
-1789631269.jpg)
