काठमाडौं– आइतबार काँडाघारीबाट अपहरणमा परेका ११ वर्षिय बालक निसान खड्काको अपहरणको केही घन्टामै हत्या भयो। अपहरणकारी प्रहरी इन्काउन्टरमा मारिए,तर अपहरित बालकलाई प्रहरीले किन सकुशल उद्धार गर्न सकेन भन्ने प्रश्न प्रहरीमाथि तेर्सिएको छ।
प्रहरी अधिकारीहरुले अपहरणको केही घन्टामै हत्या भएकाले बालकको सकुशल उद्धार गर्न नसकिएको तर्क गरेका छन्।
तर, अनुसन्धानको क्रममा प्रहरीबाट पनि केही कमजोरी भएको स्रोत बताउँछ।
घटनाको अनुसन्धानको क्रममा प्रहरीबीच समन्वयको अभाव र अनुसन्धान प्रक्रियामा जति संवेदनशीलता अपनाउनुपर्ने हो त्यो प्रहरीबाट भएन भएन।
काठमाडौं जिल्लाको सुरक्षा हेर्ने निकाय महानगरीय प्रहरी परिसर काठमाडौं र महानगरीय अपराध महाशाखाबीच अनुसन्धानमा समन्वय भएको थिएन। दुवै निकायले आ– आफ्नो तरिकाले अनुसन्धान अघि बढाएका थिए। कतिसम्म भने प्राप्त सूचनाहरु समेत एक अर्कालाई ‘शेयर’ समेत गरेका थिएनन्। अनुसन्धानमा दुई निकायबीचको द्वन्द्व सतहमै देखिएको स्रोत बताउँछ। आफुले अनुसन्धानको जस लिने होडले अनुसन्धान प्रभावीत भएको थियो।
अर्काेतर्फ अनुसन्धानको प्रक्रियामा समेत त्रुटि भएको थियो। स्रोतका अनुसार काठमाडौं परिसरका प्रमुखले बोक्ने मोबाइलबाट आइतबार बेलुका नै ‘बच्चा तुरुन्त छाड नत्र तेरो दुर्दशा हुन्छ, एसएसपी काठमाडौैं’ भनेर फिरौती मागिएको नम्बरमा म्यासेज पठाइएको थियो।
डराएर अपहरणकारीले तत्काल बच्चा छाड्न सक्ने रणनीति अन्र्तगत त्यो म्यासेज पठाइएको थियो। जून गलत साबित भयो। प्रहरीले अनुसन्धान थालिसकेको र बालकले आफुहरुलाई चिन्ने भएकाले डराएर उनीहरु बच्चाको हत्या गरेको हुनसक्ने आँकलन गरिएको छ।
महानगरीय प्रहरी आयुक्त डिआइजी मनोज नेउपाने भनेर अनुसन्धानमा दुइ निकायबीच समन्वय नभएको आरोप लगाउनु गलत भएको दाबी गर्छन्। ‘दुवै कार्यालयले आ–आफ्नो तरिकाले काम गर्छन्, समन्वय थिएन भन्ने होइन।’
अपहरित बच्चा मृत भेटिएको करिब एक घन्टामा अपहरणमा संलग्न गोपाल तामाङ र अजय तामाङ प्रहरी मुठभेडमा मारिएका थिए।
निसानकै चिनजानका व्यक्ति गोपालले फकाएर आफ्नो कोठामा लिएर गइ उनलाई बन्धक बनाई उनकी आमा चमेलीसँग ४० लाख रुपैयाँ फिरौती मागेका थिए। बालकको आमाले सञ्चालन गरेको खाजा पसलका ग्राहक गोपाल तामाङको योजनामा अपहरण भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
