काठमाडौं– मंसिर ४ गते भएको प्रतिनिधि सभा निर्वाचनको नतिजा आउनेक्रम जारी रहेको छ। हालसम्म नेपाली काग्रेसले ४४ स्थानमा जित हात पारेको छ। नेकपा एमालेले ३४ सिटमा जित हात पारेको छ।
माओवादी केन्द्रले १२ सिटमा जितेको छ। एकीकृत समाजवादीले १०, राष्ट्रिय स्वतन्त्र पार्टीले ७ र राप्रपाले ५ सिटमा जित हात पारेको छ। जसपाले र लोसपाले ३÷३ सिटमा जित हात पारेका छन्। प्रत्यक्ष तर्फसँगै समानुपातिक तर्फको मतगणना पनि जारी छ।
यस निर्वाचनमा स्थानीय तहको अनुभव लिएका प्रतिनिधिहरु सांसदका लागि चुनावी मैदानमा उत्रिएका थिए। २०७४ सालमा पालिका प्रमुख भएका उनीहरु यसपटक सांसद हुने चाहनाका साथ चुनावी प्रतिस्पर्धामा होमिएका थिए।
पालिका प्रमुखको अनुभव लिइसकेका १० जना प्रतिनिधि सभाका लागि उम्मवार बनेका थिए। तीमध्ये नेकपा एमालेबाट ७ जना, नेपाली कांग्रेसबाट–माओवादी र राप्रपाबाट एक÷एक जना पालिका प्रमुख भइसकेकाहरु संघीय संसदका लागि प्रतिस्पर्धामा थिए।
जसमध्ये तीन जनाले जित हात पारेका छन्। कांग्रेस, एमाले र राप्रपाबाटक एक–एक जना निर्वाचित भएका हुन्। जारी मतगणनमा नेकपा एमालेका एक पूर्व मेयरले अग्रता कायम गरिराखेका छन्।
सन्तोष चालिसे
चालिसे काठमाडौ–३ बाट प्रतिनिधि सभाका लागि निर्वाचित भएका हुन्। उनी २०७४ सालमा गोकर्णेश्वर नगरपालिका प्रमुख थिए। संविधान जारी भएपछिको पहिलो स्थानीय सरकारको निर्वाचनमा उनी एमाले उम्मेदवारलाई पराजित गर्दै पालिका प्रमुख बनेका थिए।
यसपटक प्रतिनिधि सभामा चालिसेले १५ हजार १ सय ५८ मत ल्याउँदै जित हात पारे। उनले नेकपा एमालेका कृष्ण राईलाई ३ हजार ९ सय ६२ मतले पराजित गरे। राईले ११ हजार १ सय ९६ मत मात्र प्राप्त गरे। २०७४ सालमा सोही क्षेत्रबाट नेपाली काग्रेसको उम्मेदवारलाई पराजित गरेर निर्वाचित भएका राई यो पटक असफल भए।
धवल शमशेर राणा
राणा नेपालगञ्ज उपमहानगर पालिकाका पूर्व मेयर हुन्। राष्ट्रिय प्रजातन्त्र पार्टीका महामन्त्री रहेका राणाले पार्टीलाई पुनः उदय गराउन भूमिका खेले। यसपटक उनले २० हजार ५ सय ७७ मत ल्याउँदै जित हात पारेका छन्।
२०७४ सालमा उनी लोकप्रिय मतका साथ मेयर भएका थिए। उनीसँग प्रतिस्पर्धा गरेका पूर्वमन्त्री मोहम्मद इश्तियाक राई २३ हजार ५ सय २० मत ल्याउँदै पराजित भए।
जसपाका राई २०७४ सालमा सोही क्षेत्रवाट सांसद बनेका थिए। यता राणा भने २०५४ को स्थानीय निर्वाचनमा एमालेबाटै नेपालगञ्ज नगरपालिकाको प्रमुखमा निर्वाचित भएका थिए। केही समय राजनीतिमा निष्क्रिय रहेका उनी २०६३ पछि पुनः राप्रपा प्रवेश गरेर राजनीतिक यात्रालाई अघि बढाइरहेका छन्।
२०६४ मा सम्पन्न पहिलो संविधान सभा निर्वाचनमा उनी राप्रपाबाटै बाँके–३ का उम्मेदवार भएका थिए। तर, उनी पराजित भए। २०७४ को स्थानीय तह निर्वाचनमा उनी पुनः राप्रपा उम्मेदवारकै रुपमा नेपालगंज उपमहानगरपालिकाको मेयरमा निर्वाचित भएका थिए।
बासुदेव घिमिरे
रुपन्देही–५ मा उम्मेदबार मनोनय गर्ने समयमा नेकपा एमालेबाट २ जनाले दर्ता गराए। पार्टी अध्यक्ष केपी शर्मा ओलीले सुरुमा तिलोत्तमा नगरपालिका पूर्व मेयर बासुदेव घिमिरले टिकट दिएका थिए।
तर, अन्तिम समयमा उक्त क्षेत्रमा आफू आधिकारिक उम्मेदवार भएको भन्दै खेमलाल भट्टराईले उम्मेवारी दिए। योसँगै उक्त क्षेत्रमा अन्योल सिर्जना भयो। निर्वाचन आयोगले सुरुमा उम्मेदवारी दर्ता गरेकाले घिमिरेले आधिकारिकता पाउने भन्दै भट्टराईको उम्मेदवारी खारेज गरिदियो।
घिमिरे अहिले प्रतिनिधि सभा सदस्यमा निर्वाचित भएका छन्। घिमिरेले ३६ हजार ८ सय २२ मत ल्याउँदै जित हात पारे। उनका प्रतिस्पर्धी कांग्रेसका भरतकुमार शाहले २७ हजार १२० मत पाएका छन्।
२०७४ सालको निर्वाचनमा उक्त क्षेत्रमा शाह निर्वाचित भएका थिए। उनी सांसद हुदै संसदको महत्वपूर्ण लेखा समितिको सभापतिसमेत भए। घिमिरले मेयर हुँदा उक्त नगरलाई देशकै नमुना नगरका रुपमा चर्चा गराएका थिए।
भलनाथ खनाललाई पछि पार्दै महेश बस्नेत
कुनै समय आफ्नै पार्टीका वरिष्ठ नेता रहेका झलनाथ खनाललाई इलाममा महेश बस्नेतले मतगणनाको सुरुदेखि नै पछि पारेका थिए। २०७४ सालमा इलाम नगरपालिको मेयर भएका बस्नेत एकीकृत समाजवादीका खनाललाई पछि छोडेर निर्वाचन आफ्नो पक्षमा पार्न अघि बढिरहेका छन्।
हालसम्म भएको मतगणनामा बस्नेतले १२ हजार २ सय ७५ मत ल्याएका छन्। उनका प्रतिस्पर्धी खनालले १० हजार ६ सय ३३ मत पाएका छन्। बस्नेत खनाल भन्दा १६ सय ४२ मतले अघि रहेका छन्। उक्त क्षेत्रमा मत गणना जारी रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
