काठमाडौं– काँँडाघारीमा अपहरित बच्चाको आइतबार बेलुका नै हत्या भएको खुलेको छ। ११ वर्षिय निशान खड्काको शव ठिमीमा गाडिएको अवस्थामा भेटिएको हो।
अपहरणकारीले बालककी आमालाई २ पटक फिरौती माग्दै फोन गरेका थिए। पछिल्लो पटक उनीहरुले ४० लाख मागेका थिए। तर,फिरौती आउन नसक्ने देखेपछि आइतबार नै कोठामा लगेर हत्या गरेको र नजिकै लगेर गाडेका थिए। बालकको परिवारसँग चिनजान रहेको र पोल खुल्ने डरले बच्चाको अपहरणपछि हत्या गरेको हुनसक्ने अनुसन्धानमा आबद्ध एक प्रहरी अधिकारी बताउँछन्।
अपहरण र हत्या गर्ने अपहरणकारी पनि प्रहरी गोलीबाट मारिएका छन्। अपहरणकारी अजय तामाङ र गोपाल तामाङ मारिएका हुन्। दोहोरो फायरिङमा उनीहरुको मृत्यु भएको अपराध महाशाखाका एसएसपी धिरजप्रताप सिंहले बताए। भक्तपुरको सूर्यविनायकस्थित पाइलट बाबा आश्रम जाने जंगलमा इन्काउन्टर भएको हो।
अपहरणकारीमध्ये गोपाल बालकका चिनजानका व्यक्ति हुन्। उनी आइतबार दिउँसोदेखि नै बालकको आमाले चलाउने पसलमा गएर निशानसँग खेलेर बसेका थिए। साँझ उनले नै अपहरण गरी लगेका हुन्।
अपहरणपछि हत्या गरिएका बालकका बुवा विदेशमा छन्। आमा काँडाघारीमा खाजा पसल चलाउँदै आएकी छिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
