ईश्वर पोखरेलको घरदैलो अभियानमा केपी ओलीको गुणगान!

धनु विश्वकर्मा शुक्रबार, कात्तिक २५, २०७९ १६:४९

काठमाडौं– बिहान ९ बजेको छ। नेकपा एमालेका वरिष्ठ उपाध्यक्ष तथा काठमाडौं- ५ का प्रतिनिधि सभा उम्मेदवार ईश्वर पोखरेलको घरदैलो अभियानको टोली बुढानीलकण्ठ- ६ को खड्का भद्रकालीस्थित हात्तिगौंडा नजिकै पुगेको छ।

हात्तिगौंडास्थित भक्ति इन्टरनेसनल स्कूलका विद्यार्थीहरु मैदानमा खेलिरहेका छन्। रोडको छेउमै रहेको उक्त विद्यालय नजिक ईश्वरको समूह पुगेको छ।

घरदैलो अभियानमा बद्री पंगेनी र पूर्णकला बिसीको स्वर रहेको ‘म त यसै एमाले, मेरो देशै एमाले’ बोलको गीतमा कार्यकर्ता झुमिरहेका छन्। कोही नाँच्दै छन्, कोही सेल्फी खिच्न व्यस्त छन्।

साउण्ड बक्समा बजिरहेको गीतले विद्यार्थीको ध्यान एमालेको घरदैलो अभियानमा तान्यो। भोट माग्दै हिँडेका कार्यकर्ता ‘भोट केमा, सूर्यमा’ भन्दै नारा लगाइरहेका थिए। यत्तिकैमा विद्यालय हाता भित्रबाट विद्यार्थीले एकाएक ‘भोट केमा, सूर्यमा’ भन्दै नारा लगाए।

पोखरेल टक्क रोकिएर विद्यालयतिर फर्के। मुसुक्क हाँसे। तर कुनै प्रतिक्रया दिएनन्। विद्यार्थीले नारा लगाएपछि कार्यकर्ताले झनै चर्को स्वरमा नारा लगाए। विद्यार्थी नै नारा लगाउन थालेपछि विद्यालयका शिक्षक-शिक्षिका आएर वातावरणलाई शान्त पारे। ईश्वरको समूह भने अर्को गल्लीमा छिर्‍यो।

घरदैलो टोली घनगाउँ पुग्दा स्थानीय विष्णुमायाले ईश्वरलाई नचिने पनि उनको पार्टीलाई २०५६ देखि नै मत हाल्दै आएको बताइन्। ईश्वरसँगै रहेका प्रदेश सभाका उम्मेदवार दीपक निरौलालाई भने उनले चिनेकी रहिछन्। यो क्षेत्रमा विकास गरेकोले एमालेलाई भोट दिएको उनले बताइन्। विष्णुमायाले भनिन्, ‘बुढाबुढीले एमालेकै दानापानी त खाएका छन्।’

ईश्वरले मतदाताको दैलो-दैलोमा पुगेर मतको लागि अपिल गरे। उनले कुनै आश्वासन भने दिएनन्। मतदाताले पनि अजेण्डामा कुनै गुनासो गरेनन्। मत माग्ने क्रममा ईश्वर मतदातासँग निकै आत्मियता दर्शाइरहन्थे। वृद्धदेखि बच्चासम्मलाई नमस्कार गर्दै नजिकै गएर कुराकानी गरे।

विष्णुमायासँगै बसेकी मीना नगरकोटीले दुई वटा सयपत्रीको माला लगेर ईश्वर र दीपकलाई लगाइदिइन् र जितको शुभकामना दिइन्। उनले भनिन्न्, ‘मैले उहाँको लागि बिहानै पशुपति पुगेर पूजा गरी माला ल्याएकी हुँ।’

घर-घरमा खानेपानी नपुर्‍याए अर्कोपटक मत नहाल्ने
घनगाउँबाट ईश्वरको टोली गणेशस्थान पुग्यो। हामी उनको टोलीलाई पछ्याउँदै छौं। ६ र ७ वडाका चोकचोकमा रातो रङले सूर्य चिह्न बनाएर ईश्वरलाई स्वागत स्वागत गरिएको छ।

७९ वर्षीय रत्नप्रसाद बिडारी र उनकी बुहारी बिन्दु बिडारीलाई नमस्कार गर्दै ईश्वरले मत मागे। बिडारी सासुरा-बुहारीको पुर्ख्यौली घर र ईश्वरको पुराननो घर ओखलढुंगा भएकोले उनीहरुको चिनजान पनि लामै रहेछ। ईश्वरले भने, ‘म तपाईंहरुसँग मत माग्नभन्दा पनि शुभकामना र आशीर्वाद माग्न आएको हुँ।’

शिरमा हात राख्दैं रत्नप्रसादले देशले खोजेको नेता भन्दै जितका लागि ईश्वरलाई आशीर्वाद दिए। ‘जित पक्का छ तर, जनताको बाचालाई धोका नहोस्,’ रत्नप्रसादले भने। यो क्षेत्रमा खानेपानी बाहेक अरु कुनै ठूलो समस्या नभएको बिन्दुले बताइन्। उनले भनिन्, ‘उहाँले जनताको घर-घरमा खानेपानी पुर्याए पुग्छ।’

६६ वर्षीया सुनमाया नगरकोटी र ५५ वर्षीया सुशीला थापा ईश्वरको पक्षमा मत माग्न पछिपछि हिँडेका छन्। ‘राजनीति खास्सै बुझेको छैन। तर पनि ईश्वरको लागि मत माग्न आएका हौं,’ उनीहरु भन्छन्।

यो क्षेत्रका जनतालाई पानी खुवाउन नसके भने अर्को पालि मत नहाल्ने सुशीला बताउँछिन्। यसका साथै शिक्षा र स्वास्थ्य नि:शुल्क गर्न सके मात्र देशको विकास हुने सुशीलाको भनाइ छ।

क्यान्सरपीडितलाई सहयोगको आश्वासन
घनगाउँ र गोल्फुटारको बीचमा पिपलबोट छ। पिपलबोटको दक्षिणतर्फ तीन वटा जस्ताका टहरा छन्। ईश्वरको समूह त्यही टहरोमा भोट माग्न पस्यो। भोट माग्ने क्रममा ईश्वर भुईंमा लम्पसार परेका अस्तराम नगरकोटी नजिकै गए। श्रीमती राममाया नगरकोटीले अस्तरामलाई ओछ्यानबाट उठाइन्।

६ महिनाअघि अस्तरामको घाँटीमा क्यान्सर भयो। अहिले उनको घाँटीमा पलाएको मासु काटिएको छ। क्यान्सरका साथै उनलाई टिबी पनि छ। ईश्वरलाई देख्नेवित्तिकै राममायाले सहयोगको अपिल गरिन्। उनले वडाध्यक्ष बसनारायण महर्जनसँग समन्वय गरेर आर्थिक सहयोग गर्ने आश्वासन दिए। राममायाको नजिकै गएर आजै बेलुका सहयोग गर्ने वाचा गर्दै ईश्वर गोल्फुटारतिर झरे।

ईश्वरको घरदैलोमा ओलीको गुणगान
घरदैलो अभियानलाई पछ्याउँदै गर्दा ईश्वरभन्दा पनि केपी ओलीलाई हेरेर मत दिने मतदाताको मनसाय देखियो। यहाँका मतदातासँग कुराकानी गर्दा ईश्वरलाई भन्दा प्रधानमन्त्री हुने भएकोले ओलीका लागि मत दिने प्रतिक्रिया बाक्लै सुनियो।

रत्नमाया महर्जन डढुँगाउँमा ईश्वरको समूहलाई कुरेर बसेकी थिइन्। घरदैलो टोली डढुँ पुग्नेवित्तिकै रत्नमायाले ईश्वरलाई माला र अबिर लगाइदिइन्। उनले पनि अबको ५ वर्ष नेपाली जनताले केपी ओलीलाई प्रधानमन्त्री हुने अवसर दिनुपर्ने तर्क पेस गरिन्। ‘केपी सरकारले नै हामीजस्ता बुढाबुढीलाई वृद्धभत्ता दिएको हो। फेरि ओली नै प्रधानमन्त्री बन्नुपर्छ,’ रत्नमायाले भनिन्।

सँगै रहेकी नातिनी बबितातर्फ देखाउँदै रत्नमायाले भनिन्, ‘भोलिका पुस्ताको भविष्य ओलीका हातमा छ।’ बबिताले पनि ओलीलाई सामाजिक सञ्जालमा पछ्याउँदै आएकी रहिछन्। नयाँ मतदाता बबिता भन्छिन्, ‘यो देशमा केपी ओली जस्तो देशलाई माया गर्ने अरु नेता छैनन्।’

७ नम्बर वडा कार्यालय नजिकै किराना पसलमा छिरेर ईश्वरले सन्तबहादुर छन्त्यालसँग मत मागे। सन्तबहादुरले ओली देश विकासमा लागेको मान्छे, फेरि प्रधानमन्त्री बन्नुहोस् भन्दै आशीर्वाद दिए।

अबको प्रधानमन्त्री ओली बने मात्र देशको समस्या समाधान हुने उनको दाबी छ। उनले भने, ‘ओलीले भारतलाई समेत घुँडा टेकाएका छन्। चुच्चे नक्सा, नाकाबन्दीको समयमा ओलीको अडान मलाई मन परेको छ। एमालेलाई मत हाल्ने पनि ओलीको काम देखेर नै हो।’

यो क्षेत्रमा एक जना मात्र स्वतन्त्र उठेको भए सहयोग गर्न तयार रहेको, तर स्वतन्त्रका नाममा कोही घण्टी, कोही सुई, कोही लौरो, कोही आमा, कोही सेलरोटी भन्दै मत माग्न आएपछि दिक्दार लागेको उनले बताए। छन्त्यालले भने, ‘स्वतन्त्र पनि एकै मात्र उठून् न। अनि हामी पनि मत बदल्छौं।’

काठमाडौं- ५ मा नेपाली कांग्रेसका प्रदीप पौडेल र नेकपा एमालेका ईश्वर पोखरेल मुख्य प्रतिस्पर्धी छन्।

२०७४ मा काठमाडौं महानगरपालिकाको मेयरमा उठेर चर्चामा आएकी रञ्जु दर्शनाको पनि त्यो बेलाको जस्तो क्रेज नभएको मतदाता बताउँछन्। छन्त्यालले भने, ‘पाँच वर्ष निदाउने अनि चुनावी आएपछि मात्र जाग्ने?’