काठमाडौं– आगामी मंसिर ४ मा हुने प्रतिनिधि सभा निर्वाचनमा एक मात्र क्षेत्र रहेको पाँचथरमा परिचित पूर्वमन्त्री र पुर्व सांसदकाबीच प्रतिस्पर्धा हुँदैछ। नेपाली कांग्रेसका नेता भीष्मराज आङदेम्बे र एमाले नेता बसन्तकुमार नेम्वाङ पाँचथरको चुनावी मैदानमा होमिएका छन्।
२०७४ सालमा पनि यी दुई चिरप्रतिद्वन्द्वीबीच प्रतिस्पर्धा हुँदा नेम्वाङले बाजी मारेका थिए। तत्कालीन समयमा नेकपा एमाले र माओवादी केन्द्रको वाम गठबन्धन थियो भने अहिले माओवादी र नेपाली कांग्रेसको गठबन्धन रहेको छ।
ह्याट्रिकको खोजीमा नेम्वाङ
गणतन्त्रअघि नेम्वाङले पाँचथरमा तीन पटक चुनावी प्रतिस्पर्धा गरिसकेका छन्। उनी २०४८ सालमा ३० वर्ष उमेर नपुग्दै पाँचथर- १ बाट प्रतिनिधि सभा सदस्य निर्वाचित भएर सांसद भएका थिए। २०५१ को मध्यावधि निर्वाचनमा उनी पराजित भए। तर २०५६ मा पुनः विजय हासिल गरे। गणतन्त्रपछि भएको निर्वाचनमा उनी उम्मेदवार हुन पाएनन्। एमालेबाट संविधान सभाका दुवै निर्वाचनमा पाँचथर– १ बाट गणेशकुमार काम्बाङलाई उम्मेदवार बनाइयो। पहिलो संविधान सभा निर्वाचनमा पराजित काम्बाङले दोस्रो संविधान सभामा जित हात पारे।
संविधान जारी भई मुलुक संघीय व्यवस्थामा प्रवेश गरेसँगै नेम्वाङ पुनः पाँचथर जिल्लाबाट २०७४ सालमा संघीय संसद् पुगे। लगत्तै उनी मन्त्री समेत भए। भौतिक पूर्वाधार तथा यातायात मन्त्री हुँदा राम्रो काम गरेको भन्दै प्रशंसा पनि पाएका थिए।
चौथो हार रोक्ने रणनीतिमा आङदेम्बे
आङदेम्बे नेपाली कांग्रेसका सहमहामन्त्री हुन्। पार्टीभित्र प्रमुख पदाधिकारीको रुपमा रहेकाले पनि उनलाई यस पटक आफ्नो परिचित प्रतिद्वन्द्वीलाई हराउनुपर्ने बाध्यता छ। आठ सहमहामन्त्रीमध्येका एक आङदम्बेलाई यस पटक नेकपा माओवादी र एमालेबाट विभाजन भएर बनेको एकीकृत समाजवादीले पनि साथ दिएका कारण उनी उत्साहसहित निर्वाचनको मैदानमा छन्।
कांग्रेस नेता आङदेम्बे २०७० मा एमालेका डम्बरसिंह सम्बाहाम्फेलाई पराजित गर्न सफल भए। त्यसअघि २०५६ र २०६४ मा सम्बाहाम्फेबाटै आङदेम्बे दुई पटक पराजित भए भने २०७४ मा नेम्वाङबाट पराजित भए।
यसरी विजय र पराजयको इतिहास बोकेका दुवै उम्मेदवारको चुनावी लडाइँ यस पटक पाँचथरमा रोचक हुने देखिएको छ।
२०७४ पछिका चिर प्रतिस्पर्धी
नेम्वाङका प्रतिस्पर्धी आङदेम्बे पनि २०५६ पछि भएका प्रतिनिधि सभा र संविधान सभा निर्वाचनमा निरन्तर उम्मेदवार छन् । हालसम्म ५ पटक कांग्रेसबाट टिकट पाएका आङदेम्बेसँग २०७० को संविधान सभा निर्वाचनमा एक पटक निर्वाचित भए पनि तीन पटक पराजित भएको इतिहास छ । उनलाई उक्त इतिहास मेटाउन र पार्टी राजनीतिमा पदाधिकारीको जिम्मेवारीमा समेत भएकाले पनि आवश्यक देखिन्छ।
आङदेम्बे २०७४ अघिका सबै निर्वाचनमा साविक पाँचथर– २ बाट चुनाव लड्दै आएका थिए । मुलुक संघीय संरचनामा गएर प्रतिनिधि सभाका लागि एक सिट कायम भएपछि नेम्वाङ र आङदेम्बेकाबीच २०७४ मा पहिलो पटक चुनावी मैदानमा भेट भएको थियो । यस पटक उनीहरू दोस्रो पटक चुनावी मैदानमा छन् ।
अघिल्लो पटक माओवादी केन्द्रसँगको वाम गठबन्धनबाट जितेका नेम्वाङ यस पटक एमालेबाट कुनै दलसँग तालमेल नगरी चुनावी मैदानमा निस्केकाले कडा मिहिनेत गरिरहेका छन्।
आङदेम्बेलाई माओवादी केन्द्र र एकीकृत समाजवादी गठबन्धनको साथ भएकाले आन्तरिक रुपमा आउनसक्ने समस्या मिलाउनमा केन्द्रित रहेका छन्। २०७० को निर्वाचनमा संविधान सभा सदस्य चुनिएबाहेक आफूले समग्र जिल्लाबाट प्रतिनिधित्व गर्दै काम गर्ने अवसर नपाएकाले पुनः उम्मेदवार बनेर आएको भन्दै आङदेम्बे भोट मागिरहेका छन् । उनले विगतमा एमाले सरकारको समयमा जिल्लाले प्राथमिकता नपाएको र समग्र विकासका लागि आफ्नो जित आवश्यक भएको उनको दावी छ।
स्थानीय निर्वाचनको मतमा कांग्रेस भारी
२०७४ को प्रतिनिधि सभा निर्वाचनमा वाम गठबन्धनबाट उम्मेदवार बनेका नेम्वाङले ३८ हजार ६ सय ४१ मत पाउँदा कांग्रेसका आङदेम्बेले २८ हजार २५ मत प्राप्त गरेका थिए । १० हजार मतले आङदेम्बे पछि परेका थिए। तर यस पटक स्थानीय निर्वाचनको नतिजा हेर्दा का्रग्रेस आफैं बलियो देखिन्छ।
कांग्रेसले उक्त जिल्लामा ८ स्थानीय तहमध्ये पाँचमा प्रमुख जितेको छ। एमालेले एउटा मात्र जितेको छ। पाँचथरमा कुम्याक, तुम्वेवा, फालेलुङ, फाल्गुनन्द, फिदिम नगरपालिका, मिक्लाजुङ, याङवरक, हिलिहाङ गाउँपालिका रहेका छन्। स्थानीय चुनावमा जिल्लाभर कांग्रेसले ४१ हजार २ सय ५० पाएको थियो भने नेकपा एमाले ३४ हजार १ सय ६४ मत पाएको थियो। माओवादी केन्द्र २८ हजार मत पाउँदा एकीकृत समाजवादी ५ हजार मत पाएको थियो।
यसरी हेर्दा सत्ता गठबन्धन निकै अगाडि देखिन्छ। सत्ता गठबन्धनको मत जोगाउँदै आफू जित हात पार्ने आङदेम्बेको दावी छ। तर नेवाम्ङ भने माओवादी र एकीकृत समाजवादी भित्रको विवादका साथै राप्रपा र अन्य दलको मत आफूले पाउँदै जित हात पार्ने दाउमा रहेका छन्।
आफूले भौतिक पूर्वाधार मन्त्री हुँदा यस क्षेत्रमा धेरै विकासका कामहरुको थालनी गरेकाले त्यसलाई पूरा गर्न पनि जनताले जिताउने उनले बताए। अधुरा योजनाहरु पूरा गर्नका लागि पनि आफ्नो जितको आवश्यकता रहेको उनको दावी छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786875773.jpg)
-1786602170.png)
-1786513116.png)
