नेपाली कांग्रेसका सहमहामन्त्री बद्रीप्रसाद पाण्डेले मंसिर ४ मा हुने प्रतिनिधि सभा निर्वाचनका लागि बाजुराबाट उम्मेदवारी दिएका छन्। उनको प्रतिस्पर्धा नेकपा एमाले स्थायी कमिटी सदस्य कर्णबहादुर थापासँग हुँदैछ।
२०४७ सालदेखि सक्रिय राजनीतिमा रहेका पाण्डे विद्यालय स्तरदेखि नै राजनीतिमा लागेका हुन्। नेपाल विद्यार्थी संघ बाजुराको जिल्ला अध्यक्ष हुँदै नेविसंघको केन्द्रीय उपसभापति र महामन्त्री बनेका पाण्डे बाल्मिकी क्याम्पसको स्ववियु सभापति, स्ववियु परिषद्को केन्द्रीय सभापति समेत बनिसकेका छन्।
कांग्रेसको १२औं र १३औं महाधिवेशनबाट केन्द्रीय सदस्य निर्वाचित पाण्डे १४औं महाधिवेशनबाट सहमहामन्त्री बनेका हुन्। पाण्डेको संसदीय यात्रा भने २०७० देखि सुरु भएको हो। २०७० को संविधान सभा निर्वाचनमा समानुपातिक सांसद र २०७४ मा सुदूरपश्चिम प्रदेशबाट राष्ट्रिय सभा सदस्यमा निर्वाचित भएका थिए।
आसन्न निर्वाचनमा बाजुराबाट प्रतिनिधि सभामा प्रत्यक्ष निर्वाचन मा उम्मेदवार बनेका पाण्डेसँग चुनावी तयारी र मतदातामाझ प्रस्तुत गर्ने अजेण्डाका विषयमा नेपाल लाइभका भूपेन्द्र शाह ठकुरीले गरेको कुराकानी:
तपाईं राष्ट्रिय सभा सदस्य भइसकेको व्यक्ति, प्रतिनिधि सभामा किन उम्मेदवार बन्नुभयो?
म अहिले नेपाली कांग्रेसको केन्द्रीय पदाधिकारीमा छु। संसदमा पनि समानुपातिक बाटोबाट एक पटक र राष्ट्रिय सभामा दुई वर्षको कार्यकाल व्यतित गरेको छु। यसो हुँदा मलाई नेपाली कांग्रेस पार्टीको मात्र नेता भएजस्तो अनुभूति भयो।
कामका सिलसिलामा बाजुरा जिल्ला घुम्दा पनि त्यहाँका जनताले जनप्रतिनिधि त अर्कै छ भन्ने ढंगले हेरेको पाएँ। जनताले प्रत्यक्ष निर्वाचित सांसदलाई मात्रै जनप्रतिनिधिको रुपमा विश्वास गरे जस्तो लाग्यो।
मतदाताको भावनाअनुसार जनताको बीचमा जाने, जनताको भावनाअनुसार काम गर्ने इच्छा जागृत भयो। बाजुरावासीको प्रत्यक्ष निर्वाचित जनप्रतिनिधिका रुपमा काम गर्न सजिलो हुन्छ भन्ने हिसाबले पहिलोपटक प्रत्यक्ष निर्वाचनको मैदानमा उत्रिएको हुँ।
जनतासामु कस्ता किसिमका अजेण्डा लिएर जाँदै हुनुहुन्छ?
म निर्वाचनको मुखमा भावावेशमा आएर गर्न नसकिने कामका बारेमा बोल्दिनँ। गर्न सकिने कामका आधार हेरेर, बुझेर, महसुस गरेर आफ्ना अजेण्डा प्रस्तुत गर्छु।
हाम्रो केन्द्रीय घोषणापत्र छ। म आफैंले पनि संकल्पपत्र सार्वजनिक गरेको छु। जसमा मैले १० वटा विषयलाई मात्रै उठान गरेको छु। सडकको भौतिक पूर्वाधारको क्षेत्र, विद्युतीकरणको क्षेत्र, पर्यटनका पूर्वाधारहरु खडा गर्ने विषय, एकीकृत वस्ती विकासको अवधारणा समेटेको छु। शिक्षा, स्वास्थ्य लगायतका विषयमा मैले सूत्रवद्ध रुपमा १० वटा बुँदामा संकल्प प्रस्ताव सार्वजनिक गरेको छु। यसैमा टेकेर आफ्ना अजेण्डा जनताबीचमा प्रस्तुत गर्ने हो।
तपाईं जिल्ला नबस्ने नेता भन्ने आरोप छ। जित्ने आधार के छ? जनताले तपाईंलाई किन नै मत दिने?
म जिल्लामा धेरै नबस्नुको कारण कुनै व्यवसाय वा धन्दामा लागेर होइन। २०४७ सालदेखि आजका मितिसम्म पार्टीका लागि निष्ठापूर्वक क्रियाशील छु। ३६५ दिन नै नेपाली कांग्रेस पार्टीलाई सुदृढ बनाउने, पार्टीलाई मूल्य-मान्यतामा हिँडाउने र सिंगो राजनीतिलाई मूल्य-मान्यताको बाटोमा हिँडाउने काममा क्रियाशील छु।
बाजुरामा नहुँदा वा देशको जुनसुकै भूभागमा हुँदा म राजनीतिलाई सुधार गर्ने, राजनीति सुधार गरेर देश सुधार गर्ने, देश सुधार गरेर जनताको अनुहारमा हाँसो र खुसी थप्ने अभियानमा छु। जनताको मुहारमा हाँसो र खुसी थप्नु नै हाम्रो राजनीतिको ध्येय हो भन्ने मुल मन्त्रका साथ हिँडेको छु।
हो, म बाजुरामा कम छु। तर ७७ वटै जिल्लामा क्रियाशील छु। यसको पछाडिको कारण के हो भने, पार्टी सुधारका लागि देशैभरि प्रशिक्षण, भेला र आमसभाहरुमा म सक्रिय छु। देशको राजनीति सुधार गर्नु भनेको बाजुरालाई पनि फाइदा हुनु होइन र?
म बाजुराको चुनावी मैदानमा उत्रिनुको अर्थ चाहिँ अब मेरो ध्यान बढी बाजुरामा केन्द्रित हुन्छ भन्ने हो। जनप्रतिनिधिका रुपमा अब बाजुराको विकास-निर्माणदेखि सम्पूर्ण काममा जिल्लामै केन्द्रित हुनेछु। मेरो अनुभव र अध्ययनलाई आफ्नै क्षेत्रमा बाँड्छु भन्ने संकल्पका साथ चुनावी मैदानमा उत्रिएको हुँ।
दुई पटक सांसद भइसकेको व्यक्ति फेरि किन दोहोरिन खोज्नुभयो?
मैले अघि पनि भनें, यसअघि म समानुपातिकको बाटोबाट संविधान सभामा पुगे। राष्ट्रिय सभाको बाटोबाट म संघीय संसदमा पुगें। तर अब प्रत्यक्ष निर्वाचनबाट जनताको बीचबाट अनुमोदित हुन चाहन्छु। बाजुराको जनमतबाट अनुमोदित हुन चाहन्छु। जसले मेरो राजनीति एउटा सन्तुलनको बाटोमा पुगोस्। केन्द्रीय राजनीति त गरिराखेकै छु। जिल्लामा चाहिँ जन अनुमोदित भएको छैन भन्ने कतिपय मान्छेले भनेको सुनेको छु।
जिल्लाका ९ वटा पालिकामध्ये अधिकांशमा नेकपा एमालेले जित हासिल गरेको छ। स्थानीय तहको मत परिणामलाई कसरी विश्लेषण गर्नुभएको छ?
हामी अहिले गठबन्धनमा छौं। हामीलाई माओवादी र एकीकृत समाजवादीको साथ-समर्थन रहन्छ। अर्को, स्थानीय निर्वाचनको मतलाई मात्र हेरेर हुँदैन। जस्तो, २०७४ सालमा हामीले ६ वटा पालिका जितेका थियौं। तर प्रदेश र प्रतिनिधि सभाको निर्वाचन जित्न सकेनौं। यस पटक भने पहिलो पटक बाजुरामा आएको हुनाले एमालेका समेत थुप्रै मतदाता मलाई समर्थन गर्न तयार हुनुभएको छ। मप्रति भावना र सद्भाव दर्शाउनुभएको छ। सम्पूर्ण बाजुराबासीले मलाई जिताउनुहुन्छ भन्ने लाग्छ।
प्रतिस्पर्धीप्रति तपाईंको मूल्यांकन के छ?
उहाँहरु पटक-पटक निर्वाचनको मैदानमा आउनुभएको छ। जित्नु पनि भएको छ। मन्त्रीसमेत भइसक्नुभएको छ। उहाँहरुको मन्त्रीको कार्यकाल सुखद छैन। त्यस कारण युवा जमात र सचेत मतदाताले यस पटक मलाई परीक्षण गर्न खोज्नुभएको छ। मेरो काम हेर्न खोज्नुभएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
