बाजुरा निर्वाचन : दुई ‘हेभिवेट’को रोचक भिडन्त

राजनीति

भूपेन्द्र शाह ठकुरी बिहीबार, कात्तिक १७, २०७९ १५:२९

काठमाडौं- मंसिर ४ गते हुने प्रतिनिधि सभा निर्वाचनमा बाजुराबाट दुई केन्द्रीय नेता प्रतिस्पर्धा गर्दैछन्। कांग्रेस नेता बद्रीप्रसाद पाण्डे र एमाले नेता कर्णबहादुर थापा चुनावी मैदानमा होमिएका छन्। कांग्रेस सहमहामन्त्री पाण्डे र एमाले पोलिटब्यूरो सदस्य थापाबीचको प्रतिस्पर्धा निकै रोचक हुने देखिएको छ।

को हुन् पाण्डे?
२०४७ सालदेखि सक्रिय राजनीतिमा रहेका पाण्डे विद्यालय स्तरदेखि नै राजनीतिमा लागेका हुन्। नेपाल विद्यार्थी संघ बाजुराको जिल्ला अध्यक्ष हुँदै नेविसंघको केन्द्रीय उपसभापति र महामन्त्री बनेका पाण्डे बाल्मीकि क्याम्पसको स्ववियू सभापति, स्ववियु परिषदको केन्द्रीय सभापति समेत बनिसकेका छन्।

कांग्रेसको १२औं र १३औं महाधिवेशनबाट केन्द्रीय सदस्य निर्वाचित पाण्डे १४औं महाधिवेशनबाट सहमहामन्त्री निर्वाचित भएका हुन्। पाण्डेको संसदीय यात्रा भने २०७० देखि सुरु भएको हो उनी। २०७० को संविधान सभा निर्वाचनमा समानुपातिक सांसद र २०७४ मा सुदूरपश्चिम प्रदेशबाट राष्ट्रिय सभा सदस्यमा निर्वाचित भएका थिए।

आफूलाई सामाजिक सद्भाव र सामाजिक न्यायको अभियान्ताको रुपमा परिचित गराउन चाहने पाण्डे राजनीतिसँगै अध्ययन अनुसन्धानमा समेत क्रियाशील छन्। उनी पहिलोपटक बाजुराबाट प्रत्यक्षतर्फ उम्मेदवार बनेका हुन्।

पाण्डे भन्छन्, ‘समानुपातिक र राष्ट्रिय सभामार्फत् सांसद भए पनि एक पटक बाजुरा जिल्लाबाटै जनताबाट अनुमोदित बनेर निर्वाचित बन्न चाहन्छु। मलाई एक पटक बाजुराली आम मतदाताले परीक्षणका लागि पनि निर्वाचित गराउनुहुन्छ भन्ने विश्वास छ।’

दोहोरिने दाउमा थापा
दोस्रो संविधान सभा निर्वाचन २०७० मा बाजुराबाट प्रत्यक्ष निर्वाचन जितेका थापा यसपटक दोहोरिने दाउमा छन्। नेपाली कांग्रेस बाजुराका तत्कालीन पार्टी सभापति मानबहादुर रावललाई पराजित गर्दै संविधान सभा सदस्य बनेका एमाले नेता थापा उद्योग मन्त्री समेत बनेका थिए।

थापा मन्त्री बनेको ६ महिनामै पदबाट हट्नुपरेको थियो। २०७४ सालमा समानुपातिकतर्फबाट सांसद बन्न चाहे पनि नसकेका थापा यसपटक प्रत्यक्षतर्फ उम्मेदवार बनेका हुन्।

नेकपा एमाले केन्द्रीय सदस्य हुँदै पोलिटब्यूरो र स्थायी कमिटी सदस्य बनेका थापा पार्टी अध्यक्ष केपी ओली निकट नेताका रुपमा परिचित छन्।

कुन पार्टीको अवस्था कस्तो?
स्थानीय तह निर्वाचन २०७९ मा बाजुराका ९ स्थानीय तहमध्ये ६ वटामा एमालेले जितेको छ। ३ नगरपालिका र ३ गाउँपालिकामा एमालेले जितेको हो। नेपाली कांग्रेसले भने १ नगरपालिका र २ गाउँपालिका गरी ३ वटामा चित्त बुझाउनु पर्‍यो।

निर्वाचन आयोगको तथ्यांकअनुसार वडाध्यक्षहरुको मत केलाउँदा एमालेले २७ हजार ६५५ मत ल्याएको छ। प्रतिस्पर्धी कांग्रेसको २४ हजार ४ सय ५७ मत छ। माओवादी केन्द्रले भने ३ हजार ९ सय ९२ मत प्राप्त गरेको छ। एकीकृत समाजवादीले १ हजार ३ सय ६४ मत पाएको छ।

मुख्य भिडन्त पाण्डे र थापाबीच हुने देखिए पनि राष्ट्रिय प्रजातन्त्र पार्टीबाट जंगकुमार गिरी, जनता समाजवादी पार्टीबाट रामबहादुर शाही र टेकबहादुर बडुवालले स्वतन्त्र उम्मेदवारी दिएका छन्।

प्रदेश सभा (१) मा गठबन्धन भित्रै विवाद
जिल्लाको प्रदेश सभा (१)मा गठबन्धनका तर्फबाट २ जनाको उम्मेदवारी परेको छ। नेकपा माओवादी केन्द्रबाट पूर्व सभासद केशव विक र नेकपा एकीकृत समाजावादीका तर्फबाट नरेश शाही प्रतिस्पर्धामा छन्।

केन्द्रमा गठबन्धनबीच सहमति भए पनि बाजुरा (१) प्रदेशबारे गठबन्धनले विवाद टुंग्याएको छैन। जसका कारण गठबन्धनका तीन दलहरु अलगअलग रुपमा चुनावी प्रतिस्पर्धामा देखिएका छन्। गठबन्धनबीचको विवाद समयमै नटुंगिने हो भने यसको प्रत्यक्ष फाइदा एमालेलाई हुने देखिन्छ। प्रदेश (१)मा एमालेका तर्फबाट पूर्व प्रदेश सभा सदस्य बलदेव रेग्मी चुनावी प्रतिस्पर्धामा छन्।

माओवादी र समाजवादीको भोट नै निर्णायक
जिल्लामा प्रत्यक्षतर्फ निर्वाचित हुनका लागि माओवादी केन्द्र र नेकपा एकीकृत समाजवादीको मत नै निर्णायक हुने देखिन्छ। गठबन्धन भित्र इमान्दारिता देखिएको अवस्थामा त्यसको फाइदा कांग्रेसले लिने देखिन्छ भने असमझदारी रहिरहेको अवस्थामा त्यसको फाइदा एमालले उठाउने आकलन गर्न सकिन्छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।