काठमाडौं– नेपाल राष्ट्र बैंकले मर्जर तथा प्राप्तिमा गएका बैंक तथा वित्तीय संस्थाको दोस्रो बजारमा कारोबार रोक्का गर्नुपर्ने व्यवस्था नेपाल धितोपत्र बोर्डलाई जिम्मा लगाएको छ।
राष्ट्र बैंकले मर्जर सम्बन्धी विनियमावली २०७३ मा पाँचौ संशोधन गर्दै नेपाल धितोपत्र विनिमय बजार लिमिटेडबाट गाभ्ने गाभिने वा लक्षित संस्थाको सेयर कारोबार रोक्का गरिएको पत्रसहित निवेदन दिनुपर्ने व्यवस्था हटाएको हो।
बैंक तथा वित्तीय संस्थाले मर्जर सम्झौता गरेपछि सैद्धान्तिक सहमतिका लागि केन्द्रीय बैंकमा निवेदन दिनुपर्ने व्यवस्था छ। यसअघि यसरी निवेदन दिँदा सम्बन्धित दुई वा सो भन्दा बढी बैंक वा वित्तीय संस्थाले आ–आफ्नो साधारण सभाको विशेष प्रस्ताव बमोजिम आ–आफ्नो सञ्चालक समितिबाट निर्णय गरी नेपाल धितोपत्र विनिमय बजार लिमिटेडबाट गाभ्ने तथा गाभिने वा लक्षित संस्थाको सेयर कारोबार रोक्का गरिएको पत्रसहित सैद्धान्तिक सहमतिका लागि राष्ट्र बैंकमा संयुक्त रुपमा निवेदन दिनु पर्ने व्यवस्था थियो।
यसले गर्दा अब बैंक तथा वित्तीय संस्था मर्जरमा जाँदा कारोबार रोक्का गर्ने/नगर्ने जिम्मा नेपाल धितोपत्र बोर्डलाई नै हुनेछ। बैंक तथा वित्तीय संस्थाले कारोबार रोक्का गरिएको पत्रबिना नै राष्ट्र बैंकमा सैद्धान्तिक सहमतिका लागि आवेदन गर्न सक्नेछन्। नेपाल धितोपत्र बोर्डले केही समय अघिदेखि नै मर्जरमा जाने कम्पनीको कारोबार नरोक्ने बताउँदै आएको थियो। तर, केन्द्रीय बैंकको मर्जर विनियमावलीमा भएको व्यवस्थाको कारण मर्जरमा जाने कम्पनीको कारोबार रोक्का नहुने व्यवस्था लागू गर्न सकेको थिएन।
अब भने गाभ्ने गाभिने तथा प्राप्ति प्रयोजनका लागि सेयर कारोबारको रोक्का तथा फुकुवा नेपाल धितोपत्र बोर्डले गरेको व्यवस्था बमोजिम हुने केन्द्रीय बैंकले जनाएको छ। यसैगरी, गाभ्ने गाभिने वा प्राप्ति कार्य सम्पन्न भएपश्चात् रोक्का रहेको सेयर कारोबारलाई आवश्यक प्रक्रियाबाट फुकुवा गर्ने व्यवस्था मिलाउनुपर्ने व्यवस्था रहेकोमा सो व्यवस्थालाई समेत हटाएको छ।
यस्तै, गाभ्ने तथा गाभिने वा प्राप्ति (एक्विजिसन) का कारण संस्थाको कर्जा निक्षेप अनुपात तोकिएको सीमाभन्दा माथि गएमा राष्ट्र बैंकको निर्देशन बमोजिम हुने गरी गाभिएको वा प्राप्ति (एक्विजिसन) कार्य सम्पन्न भएको बढीमा दुई वर्षभित्र तोकिएको सीमाभित्र ल्याउनुपर्ने व्यवस्था गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1693220145.jpg)
-1786602170.png)
