काठमाडौं– नेपाल राष्ट्र बैंकले वाणिज्य बैंकहरुलाई वित्तीय विवरण प्रकाशन गर्ने समय थप गरिदिएको छ। बैंक तथा वित्तीय संस्थाहरुले प्रत्येक त्रैमास सकिएको १५ दिनभित्र वित्तीय विवरण सार्वजनिक गर्नुपर्ने व्यवस्था छ। तर, राष्ट्र बैंकले ‘क’ वर्गका वाणिज्य बैंकलाई भने अरु १५ दिन थप गरी ३० दिनभित्र वित्तीय विवरण प्रकाशन गर्न पाउने व्यवस्था गरेको हो।
नेपाल फाइनान्सिङ रिपोर्टिङ स्ट्यान्डर्ड (एनएफआरएस) विवरण प्रकाशन गर्न अनिवार्य भएकाले केन्द्रीय बैंकले समय बढाएको जनाएको छ। पहिलो चरणमा आर्थिक वर्ष २०७४/७५ देखि राष्ट्र बैंकले ‘क’ वर्गका वाणिज्य बैंकहरुमा एनएफआरएस लागू गरेको हो।
यसअघि नै नेपाल बैंक र सिटिजन्स बैंक इन्टरनेसनलले गत आर्थिक वर्षको चौथो त्रैमासको वित्तीय विवरण सार्वजनिक गरिसकेका छन्। केन्द्रीय बैंकको निर्देशन अनुसार अब यी २ बैंकले फेरि एनएफआरएस ढाँचा अनुसार वित्तीय विवरण सार्वजनिक गर्नुपर्ने हुन्छ। यद्यपि नेपाल बैंकले यसअघि नै पुनः नयाँ ढाँचा अनुसार विवरण सार्वजनिक गर्ने बताएको छ।
यो व्यवस्था आर्थिक वर्ष २०७४/७५ को चौथो त्रैमासदेखि २०७५/७६ को चौथो त्रैमाससम्मको वित्तीय विवरण प्रकाशनका लागि मात्र लागू हुने राष्ट्र बैंकले जनाएको छ। केन्द्रीय बैंकले जारी गरेको एकीकृत निर्देशन २०७४ मा बैंक तथा वित्तीय संस्थाले सम्पूर्ण शाखाहरुको कारोबार समावेश गरी वास्तविक एकीकृत वित्तीय विवरण लगायत प्रमुख वित्तीय सूचकहरु त्रैमास सकिएको मितिले १५ दिनभित्र राष्ट्रियस्तरको दैनिक पत्रिकामा अनिवार्य प्रकाशन गर्नुपर्ने व्यवस्था छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775566576.png)
-1764146706.png)
