पोखरा– पोखरा संसारभरका पर्यटकले घुम्न आउने पर्यटकीय नगरी हो । तर, कमै देशका सरकार तथा राष्ट्र प्रमुखको पाइला यो सहरमा परेको छ। औँलामा गन्न सकिने ती भीभीआईपीमध्ये एक थिइन्, बेलायती महारानी एलिजाबेथ द्वितीय। सात दशक बेलायतकी महारानी रहेकी उनी नेपाल भ्रमणका क्रममा विसं २०१७ फागुन १९ मा पोखरा आएकी थिइन्। महारानीसँगै उनका श्रीमान् ड्युक अफ एडिन्बरा फिलिप पनि थिए ।
पोखरा विमानस्थलमा शाही पाहुनाको भव्य स्वागत गरिएको थियो। एलिजाबेथ र फिलिपको स्वागतका लागि पोखरा विमानस्थलमा २ सय भूतपूर्व गोर्खा सैनिक सहभागी थिए । पोखरामा देशैभरबाट गोर्खा पूर्वसैनिकहरु स्वागतका लागि पुगिसकेका थिए। उनीहरूको नेतृत्व भिक्टोरिया क्रस विजेता क्याप्टेन लालबहादुर थापाले गरेका थिए। स्वागतका लागि पोखरा विमानस्थलमा विद्यालयका छात्रछात्राहरुलाई पनि लगिएको थियो ।
‘पोखरा उपत्यकाका त्यतिबेलाका स्कुलका सम्पूर्ण विद्यार्थी, शिक्षकहरुसहित एयरपोर्टमा भेला हुने र स्वागत गर्ने लाइनमा बस्ने भन्ने दृष्टिकोणबाट सहभागी भएको हो,’ बाल्यकाललाई सम्झिँदै कृषि वैज्ञानिक अनिल सुवेदीले भने।
बेलायतमा सबैभन्दा लामो समय शासन गरेकी महारानी एलिजाबेथको ९६ वर्षको उमेरमा बुधबार निधन भएको छ। उनका श्रीमान् फिलिपको २०७७ चैतमा निधन भएको थियो। सुवेदीले सामाजिक सञ्जालमा महारानीको निधनप्रति श्रद्धाञ्जलि व्यक्त गर्दै उनको पोखरा भ्रमण पनि सम्झिएका छन्।
आफ्नी आमाले स्वागत समितिमा रहेर महारानीलाई स्वागत गरेको सुवेदी बताउँछन्। ‘मेरी आमा कृष्णकुमारी सुवेदी तत्कालीन समयमा कास्की जिल्ला महिला संगठनको सभापति हुनुहुन्थ्यो। स्वागत समितिमा मेरी आमा पनि सहभागी हुनुहुन्थ्यो। स्वागत समितिमा एकजनामात्र महिला मेरी आमा हुनुहुन्थ्यो, उहाँ चाहिँ एयरपोर्ट भित्रपट्टि स्वागत गर्न बस्नुभएको हो।,’ उनले भने ।
महारानी एलिजाबेथका श्रीमान् फिलिपलाई परिचय दिँदै आमा कृष्णकुमारीले स्वागत गरेको फोटो आफूसँग रहेको कृषि वैज्ञानिक सुवेदी बताउँछन्। ‘मेरी आमाले स्वागत गर्ने क्रममा त्यतिबेलाको फोटोग्राफीको स्थितिमा रानीसँगको फोटोग्राफी त भएन सायद छुट्यो होला,’ उनले भने, ‘तर महारानीका श्रीमान् फिलिपसँगको फोटोग्राफ अहिले पनि छ।’
महारानीको स्वागतका लागि एयरपोर्टमा गेट बनाउने, मञ्च सजाउने काम आफ्नो बाबुले गरेको इतिहास अध्येता सुनील उलक बताउँछन्। शाही दम्पतीको स्वागतका लागि स्वागतद्वारहरु बजारभरि बनाइएका थिए। भीमसेन टोलका स्थानीयहरुको सक्रियतामा बनाइएको सेलरोटीको स्वागतद्वारको चर्चा त्यो बेला निकै चलेको थियो,’ बाबु जगन्नाथ उलकलाई उद्धृत गर्दै सुनीलले भने।
आफ्नो बुबाले त्यसबेलाका फोटोहरु खिचेको सुनील बताउँछन्। ‘भीमसेन टोलमा भुत्तेको नामले प्रख्यात सिद्धिलाल चुल्याजुले सेलरोटी बनाएका थिए। सजाउने काम सबै टोलबासी मिलेर गरेका थिए। सोही दिन महारानीका तर्फबाट भारतीय पेन्सन क्याम्पमा पूर्व गोर्खा सैनिक पत्नीहरुलाई लुगा सिलाउने हाते मेसिन उपहार दिइएको थियो,’ सुनीलले फेरि आफ्नै बाबुलाई उद्धृत गर्दै भने।
महारानी एलिजाबेथले पोखरा टुँडिखेलस्थित तत्कालीन मिसन हस्पिटल पनि अवलोकन गरेकी थिइन्। त्यहाँबाट रानी एलिजाबेथ जिपमा र उनका श्रीमान् प्रिन्स फिलिप भने पैदल हिँडेर फर्किएका थिए। विन्ध्यावासिनीसम्मै उनी हिँडेर आउने इच्छा गरेपछि तत्कालीन युवराज वीरेन्द्रले साथ दिएको पुराना लिखतहरुमा भेटिन्छ। पोखराअघि महारानी एलिजाबेथ दम्पतीले चितवन भ्रमण गरेका थिए। एलिजाबेथ गोर्खा सैनिकलाई माया गर्ने राष्ट्र प्रमुखका रुपमा थिइन्।
बेलायतको दैनिक पत्रिका 'द गार्डियन' का अनुसार एलिजाबेथका जेठा छोरा ७३ वर्षीय चार्ल्स नयाँ राजा घोषित भएका छन्। नेपाल सरकारले संयुक्त अधिराज्य बेलायतकी महारानी एलिजाबेथ द्वितीयको निधनप्रति दुःख व्यक्त गर्दै उनको सम्मानमा तीन दिन शोक मनाउने भएको छ।
तस्बिर संकलक : सुनील उलक
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
