काठमाडौं– नेपाल आयल निगमले चुक्ता पुँजीलाई ठूलो अंकमा वृद्धि गर्ने निर्णय गरेको छ। शुक्रवार बसेको निगमको ३६औं वार्षिक साधारणसभाले चुक्ता पुँजी ११ अर्ब रुपैयाँ पुर्याउने निर्णय गरेको हो।
हाल निगमको चुक्ता पुँजी २९ करोड रुपैयाँ छ। उक्त चुक्ता पुँजीलाई एकैपटक ११ अर्ब रुपैयाँ पुर्याउने निर्णय गरिएको हो। हाल कायम रहेको सञ्चित मुनाफाबाट बोनस सेयर जारी गरी चुक्ता पुँजी वृद्धि गर्ने निर्णय सञ्चालक समितिले गरेको हो।
यस्तो सेयर हाल निगममा सेयर हिस्सा रहेका संस्थागत सदस्यले मात्र पाउनेछन्।
हाल निगममा ९९ प्रतिशत सेयर नेपाल सरकारकै छ। जसमा अर्थ मन्त्रालयको ७३ दशमलब ४१ प्रतिशत, उद्योग, वाणिज्य तथा आपूर्ति मन्त्रालयको २० दशमलब ३२ र वाणिज्य, आपूर्ति तथा उपभोक्ता हित संरक्षण विभागको ५ दशमलब ७३ प्रतिशत सेयर हिस्सा छ। त्यस्तै, नेसनल ट्रेडिङ लिमिटेडको ० दशमलब २६, राष्ट्रिय बीमा कम्पनी लिमिटेडको ० दशमलब १५, नेपाल बैंक लिमिटेडको ० दशमलब ०८ र राष्ट्रिय वाणिज्य बैंक लिमिटेडको ० दशमलब ०५ प्रतिशत सेयर हिस्सा छ।
आर्थिक वर्ष (आव) २०७३÷७४ सम्ममा निगमको सञ्चित मुनाफा १० अर्ब ८८ करोड रुपैयाँ छ। यही सञ्चित मुनाफाबाट १० अर्ब ७१ करोड रुपैयाँ बराबरको बोनस सेयर जारी गर्ने निगमले जनाएको छ। उक्त रकममा हाल कायम रहेको २९ करोड रुपैयाँ जोडेर चुक्ता पुँजी ११ अर्ब रुपैयाँ पु¥याउने निगमको भनाइ छ।
चुक्ता पुँजी वृद्धिका लागि रहेका विकल्प हकप्रद सेयर र साधरण सेयर (आइपिओ) लाई भने अहिले थाँती राखिएको छ।
पेट्रोलियम पदार्थमा स्वचालित मूल्य प्रणाली लागू गरेपछि आर्थिक अवस्था सहज हुँदै गएको र कारोबारको अनुपातमा पुँजी वृद्धि गर्नु आवश्यक भएको निगमको ठहर छ।
निगमले कम्पनी रजिस्ट्रारको कार्यालयबाट अधिकृत र जारी पुँजी ३० अर्ब रुपैयाँ पुर्याउने स्वीकृति पनि पाइसकेको छ।
यसैबीच, सञ्चालक समितिको बैठकले निगमको आव २०७३/७४ को वित्तीय विवरण पनि स्वीकृत गरेको छ। महालेखा परीक्षक कार्यालयबाट सिफारिस भएका लेखापरीक्षकलाई पनि सञ्चालक समितिले स्वीकृत गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
