विराटनगर– विराटनगर विमानस्थलाई अन्तर्राष्ट्रियस्तरमा विस्तारका लागि सम्भाव्यता अध्ययानको काम अघि बढेको छ।
रियल पार्ट कम्पनीलाई विराटनगर विमानस्थल विस्तारका लागि सम्भाव्यता अध्ययनको जिम्मेवारी दिइएको छ।
नागरिक उड्डयन प्राधिकरणका इन्जिनियरिङ डिपार्टमेन्ट प्रमुख धु्रव भोछिभयले प्राधिकरणले विराटनगर विमानस्थललाई अन्तर्राष्ट्रियस्तरको बनाउन सम्भाव्यता अध्ययनको काम अघि बढाएको बताए।
उनले भने, ‘डेढ महिनाभित्र सम्भव्यता अध्ययनको प्रतिवेदन आएपछि सबै कुुराको यकिन हुन्छ। तर, यो वर्ष अन्तर्राष्ट्रियस्तरको विमानस्थलका रुपमा विस्तार हुने कुरामा आर्थिक र प्राविधिक हिसाबले सम्भावना देखिँदैन।’
प्रदेश सरकारले विराटनगर विमानस्थलको धावनमार्गलाई पश्चिमतर्फ १ हजार ५ सय मिटर विस्तार गर्न संघीय सरकारलाई आग्रह गरेको छ।
प्रदेश १ का मुख्यमन्त्री शेरधन राईले पश्चिमतर्फ १ हजार ५ सय मिटर धावनमार्ग विस्तार गर्न संघीय सरकारलाई पत्राचार गरिसकेको जनाए।
विमानस्थलको धावनमार्ग हाल १ हजार ५ सय मिटर छ।
धावन मार्गलाई ३ हजार मिटरमा विस्तार गर्ने प्रदेश सरकारको योजना छ।
विमानस्थल स्तरोन्नतिका लागि आवश्यक पर्ने ७० बिघा जमिनको मुआब्जा उपलब्ध गराउन संघीय सरकार सैद्धान्तिक रूपमा सहमत रहेको मुख्यमन्त्री राईले बताए।
नागरिक उड्डयन प्राधिकरणक विराटनगरका प्रमुख टेकनाथ सिटौलाले विमानस्थलको पूर्वतर्फको साढे ४ बिघा जमिनको अधिग्रहणको प्रक्रिया सुरु गरिएको जानकारी दिए।
सिटौलाले धावनमार्गको थोरै विस्तार र ट्याक्सी पार्किङका लागि थप साढे चार बिघा जमिन अधिग्रहण गरिएको जनाए।
अधिग्रहणका लागि आवश्यक ७० करोड रुपैयाँमध्ये संघीय सरकारबाट ४५ करोड रुपैयाँ प्राप्त भएको उनले जानकारी दिए। विराटनगर विमानस्थल हाल १ सय १५ विघा क्षेत्रफलमा फैलिएको छ।
प्रमुख सिटौलाले अहिलेको अवस्थामा २५ सय मिटरको रन वे निर्माण गर्ने योजनाअनुसार काम भइरहेकाले ३ हजार मिटिर रन वे निर्माण गर्न थप २ सय ५० बिघा जमिन आवश्य पर्ने बताए।
विमानस्थलमा हाल एक ‘लिंक ट्याक्सी वे’ र ३ वटा मात्र जहाज पार्किङ गर्ने स्थल रहेको नागरिक उड्डयन प्राधिकरणले जनाएको छ।
प्रमुख सिटौलाले भने, ‘विमानस्थलभित्र थप दुई वटा लिंक ट्याक्सी वे र ६ वटा जहाज पार्किङ स्थल निर्माण गरिसकेपछि मात्र अन्तरदेशीय उडान सुरु गर्न सकिनेछ।’
प्रदेश सरकारले भने जस्तै अन्तर्राष्ट्रियस्तरको बनाउन अहिले ३० मिटर चौंडा र १५ सय मिटर लम्बाइको धावनमार्ग छ, जसको दुवैतर्फबाट ‘टेक अफ’ र ‘एप्रोज’ गर्न मिल्छ। विमानस्थलबाट स्थानीय केसलिया खोलासम्म बस्ती नबसिसकेकाले आवश्यक २ सय ५० बिघा जग्गा अधिग्रहण गर्न सकिने सम्भावना रहेको सिटौलाले बताए।
६ असार ०२५ मा तत्कालीन प्रधानमन्त्री सूर्यबहादुर थापाले उद्घाटन गरेको विमानस्थलको अहिलेसम्म स्तरोन्नति हुन सकेको छैन।
विराटनगर विमानस्थलबाट हाल दैनिक १५ उडान भइरहेको कार्यालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
