नेकपा एमालेको १० औं महाधिवेशनबाट चयन हुने नयाँ नेतृत्वका लागि नेता टंक कार्कीले सचिव पदमा उम्मेदवारी दिएका छन्। केपी शर्मा ओलीले प्रस्ताव गरेको केन्द्रीय कमिटीको सूचीमा सदस्यमा पनि नअटेपछि चीनका लागि नेपाली राजदूत रहिसकेका नेता कार्कीले सचिव पदमा उम्मेदवारी दिएका हुन्। टंक कार्कीसँग नेपाल लाइभले गरेको कुराकानी :
तपाईंले सचिवमा उम्मेदवारी दर्ता गर्नुभयो। त्यो असन्तुष्टी मात्रै हो कि अरु केही कारण छन्?
मैले सचिव पदमा उम्मेदवारी पहिलेदेखि दिने भनिराखेको थिएँ। मेरो चाहना सचिवमा उठ्ने भन्ने पहिला देखि नै थियो। यो कुनै पदको आशक्ति होइन। सम्भाव्य, उपयुक्त के हुन्छ भनेर म आफैंले इमान्दार भएर उम्मेदवारी दिएको हो। त्यो अस्वाभाविक हो भनेर कसैले भन्छन् जस्तो लाग्दैन।
तपाईंलाई अध्यक्ष केपी शर्मा ओलीले सचिवबाट उम्मेदवारी फिर्ता लिन आग्रह गर्नुभयो भने के गर्नु हुन्छ?
आग्रह भएपनि मेरो उम्मेदवारी कायम रहन्छ। म राजनीतिक प्रतिस्पर्धाको पक्षमा छु। त्यसले मात्रै हाम्रो राजनीतिक लिडरसिपको गुणस्तरलाई बढावा गर्छ भन्ने मान्यता राख्छु। हाम्रो अनुभवले पनि के भन्छ भने, सर्वसम्मतिले मात्रै पार्टीको एकतालाई बलियो बनाउँछ भन्ने छैन। हामी गएको नवौं महाधिवेशनमा दुई प्यानल भएर चुनाव लड्दा पनि त्यसले एउटा आदर्श लिडर चयन गरेको छ। हामीसँग त्यस्ता अनुभव पनि छन्। खाली एउटा भाष्य के भने प्रतिस्पर्धा भयो कि विभाजित हुन्छ भन्ने सन्त्रास छ। त्यसको पछाडिको कारण बुझ्न सकेको छैन। यसमा कसैको आफ्नो अदृष्य इच्छा छ, केही अदृष्य ‘स्वार्थ’ छ भन्ने देखाउँछ।
सर्वसम्मतिको प्रयास गर्दा एमाले महाधिवेशन नै लम्बियो। पछिल्लोपटक किन एमालेमा सर्वसम्मत नेतृत्व चयन गर्नुपर्छ भन्ने पक्ष बलियो भएको हो?
सर्वसम्मत गर्नुपर्ने एउटा राजनीतिक सन्दर्भ पनि छ। एमालेइतर शक्तिको पक्ष पनि छ। त्यसका बाबजुत पनि यो पार्टीको एकता, अखण्डता र शक्तिले नेपालको लोकतान्त्रिक प्रक्रियालाई कायम राख्न सकिन्छ भन्ने लाग्छ। एमाले बलियो पार्टी भयो भने मात्रै यो प्रणालीलाई बलियो बनाउन सकिन्छ। नेपालमा प्रणाली र संविधानमाथि प्रहार भइरहेको छ। त्यसका लागि सबल एमाले चाहिन्छ।
बन्दसत्रमा नाम घोषणा हुनुअघि शीर्ष नेताहरुसँग भेटघाट गर्नु भएको थिएन?
सामान्यतया म पावर सेन्टरकहाँ जान्न। मलाई कसेलै बोलाएको थिएन। मैले आफ्ना कुरा बैठकहरुमा राखिरहेको थिएँ।
प्रतिनिधिहरुसँग के भनेर भोट माग्नुहुन्छ?
मुलुक जुन चुनौतिपूर्ण अवस्थामा छ, त्यससँग मुकाविला गर्ने शक्ति एमालेलाई बनाउनु छ। अहिले हाम्रो संविधान र व्यवस्थामाथि एउटा शक्तिले चुनौति दिइरहेको छ। त्यो शक्तिसँग लड्न शक्ति आर्जन गर्नुपर्ने छ। दोस्रो, हामी दल बन्ने प्रक्रियामा छौं। अझै दल बनिसकेका छैनौं। दल भनेको सामूहिक भावनालाई प्रतिनिधित्व गर्ने संस्था हो। त्यसलाई खँदिलो, भरपर्दो बनायौं भने मात्रै तलदेखिको भावनालाई समेट्न सक्छौं। तेस्रो, राजनीतिक पार्टी र जनताबीचको दूरी बढ्दै गएको छ। त्यो दूरीलाई मेटाउनु पर्ने छ। जस्तै, आमसभामा चप्पल लगाएर हिँड्ने जनता र गाडीमा हिँड्ने हामीहरुबीचको त्यो ग्यापलाई कसरी मेटाउन सकिन्छ भन्ने छ। यो व्यक्तिगत रुपमा मात्रै सम्भव छैन। सामूहिक प्रयासले मात्रै सम्भव हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768716527.png)
-1768712852.png)
-1764146706.png)
-1768395492.png)
