म्याद गुज्रिएको चियापत्ती बेच्‍ने युनिलिभरमाथि थप अनुसन्धान अगाडि बढाइयो

अर्थ समाचार

रासस बुधबार, असोज ६, २०७८ १७:१४

वीरगञ्‍ज- खाद्य प्रविधि तथा गुण नियन्त्रण कार्यालयले बहुराष्ट्रिय कम्पनी युनिलिभर नेपाल लिमिटेडमाथि थप अनुसन्धान प्रक्रिया अघि बढाएको छ।

यस अगावै बागमती प्रदेशको राजधानी हेटौँडास्थित उद्योग परिसरमा म्याद गुज्रेको चियापत्ती बरामद भएको विषयलाई लिएर विभागले थप अनुसन्धान गर्न निर्देशन दिएको थियो। त्यसका लागि एक जना खाद्य निरीक्षकलाई अनुसन्धान अधिकारीका रुपमा तोकेर थप अनुसन्धान प्रक्रिया अघि बढाइएको हो।

यद्यपि, तोकिएको अनुसन्धान अधिकारीको नाम गोप्य राखिएको छ। अनुसन्धानका क्रममा कुनै दबाब र प्रभाव नपरोस् भन्ने उद्देश्यले अनुसन्धान अधिकारीको नाम सार्वजनिक नगरिएको खाद्य प्रविधि तथा गुण नियन्त्रण कार्यालय मकवानपुरका प्रमुख सोमकान्त रिजालले जानकारी दिए। यस अगावै स्थानीय प्रशासनको नेतृत्वमा उद्योग परिसरमा छापा मारेर म्याद गुज्रिएको चियापत्ती बरामद गरेपछि त्यसको लेभलबारे थप अनुसन्धानका लागि विभागमा जाँच गर्न पठाइएको थियो।

सन् २०१९ मा उत्पादित चियापत्ती २०२० को जुन महिनाभित्र प्रयोग गरिसक्नुपर्ने जनाएको छ। यद्यपि, फेला परिएको चियापत्ती म्याद गुज्रिएको डेढ वर्ष भइसकेको चिया पुनः रिप्याकेजिङ गर्नु उपभोक्तामाथिको ठगी रहेको भन्दै सिलबन्दी गरिएको थियो। नेपाली आमजनताको भान्सामा बहुराष्ट्रिय कम्पनीको विश्वासका साथ प्रयोग गर्दै आएकामा यसले उद्योगको उत्पादनमाथि नै प्रश्न उठेको र नेपाली उपभोक्तालाई ठगी गरिरहेको उपभोक्ताकर्मीहरुको भनाइ छ।

बहुराष्ट्रिय कम्पनी युनिलिभरमा ३२ टन म्याद गुज्रिएको चियापत्ती बरामद गरेपछि स्थानीय प्रशासनले यही भदौ १७ गते सिल गरिएको थियो। हेटौँडा-३, बसामाडीमा रहेको बहुराष्ट्रिय कम्पनी युनिलिभर नेपाल लिमिटेडको चियापत्ती प्लान्टमा स्थानीय प्रशासनले सिल गरेको थियो। युनिलिभरमा ३२ टन चियापत्तीमा सिल गरिए पनि अरूसमेत गरेर म्याद गुज्रिएको तीन हजार बोरा चियापत्ती रहेको छ।

भारतबाट आयात गरिएको म्याद गुज्रिएको चियापत्तीलाई रिप्याकेजिङ गरी रेड लेबल चियाको ब्रान्डमा बजार पठाउने गरेको फेला पारिएसँगै सिल गरिएको थियो। विशेष सूचनाका आधारमा स्थानीय प्रशासन, खाद्य प्रविधि तथा गुण नियन्त्रण कार्यालय, उपभोक्ता हित संरक्षण मञ्चसहितको संयुक्त अनुगमन टोलीले उद्योग परिसरमा रहेको चियापत्ती प्लान्टमा अनुगमन गरेको बताइएको छ।

अनुगमनका क्रममा रिप्याकेजिङ गर्न तयार रहेको ३५ केजी तौलका ९२० बोरा (३२ टन २०० केजी) अन्य कम्पनीका मिश्रित तीन हजार बोराभन्दा बढी चियापत्ती फेला पारिएको थियो। युनिलिभरमा खाद्य प्रविधि तथा गुण नियन्त्रण कार्यालय हेटौँडाका प्रमुख रिजालसहितको टोलीले चियापत्ती उत्पादन गर्ने उद्योगमा सिल गरिएको थियो।

खाद्य प्रविधि तथा गुण नियन्त्रण कार्यालयले लेबल नभएको, म्याद गुज्रेको सामग्री उपभोक्तालाई बेच्नका लागि परेको अभियोगमा मुद्दा अघि बढाइएको छ। खाद्य प्रविधि तथा गुण नियन्त्रण विभागले म्याद गुज्रिएका, लेबल नभएका खाद्य सामग्री तत्काल नष्ट गर्न २०७६ साल कात्तिक १७ गते मातहत कार्यालयलाई निर्देशन दिएको छ। यसअघि मकवानपुरमा हुने गरेको संयुक्त अनुगमनका क्रममा म्याद गुज्रिएको सामग्री सोझै नष्ट गर्ने गरेको थियो।

युनिलिभरका म्याद गुज्रिएको चियापत्ती नष्ट नगरी परीक्षणका लागि विभाग पठाउनुले यो विषयलाई कमजोर बनाउन लागेको उपभोक्ताकर्मीको आरोप रहेको छ। यस विषयमा खाद्य प्रविधि तथा गुण नियन्त्रण कार्यालय मकवानपुरले मुद्दालाई थप बलियो बनाउन परीक्षण गर्न लागिएको दाबी गरेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।