५ पुस २०७७ मा तत्कालीन प्रधानमन्त्री केपी शर्मा ओलीले प्रतिनिधि सभा विघटन गर्दा त्यतिबेलाको सत्तारुढ दल नेकपा स्पष्ट दुई ध्रुवमा विभाजित भएको थियो। एउटा ध्रुव (पुष्पकमल दाहाल 'प्रचण्ड'–माधवकुमार नेपाल) समूहले पार्टी अध्यक्ष ओलीलाई पदबाट मात्रै हैन, पार्टीको साधारण सदस्य नै नरहने गरी कारबाही गर्ने निर्णय गरेको थियो।
पछि सर्वोच्च अदालतको २३ फागुन २०७७ को फैसलाले नेकपा पार्टी नै विघटन भयो र साबिकका एमाले र माओवादी केन्द्र ब्युँतिए। अदालतको फैसलानुसार पुनर्स्थापना भएको ६ महिना नपुग्दै एमाले विभाजित भएको छ।
तर, नेकपा हुँदा ओलीलाई पार्टीको साधारण सदस्यसमेत नरहने गरी कारबाही गर्दा निर्णयमा साथ दिने र एमाले पुनर्स्थापना हुँदा नेता माधवकुमार नेपाललाई साथ दिएर समानान्तर गतिविधि गर्दै आएका १० जना नेता भने ८ महिनापछि मंगलबार ओलीले अध्यक्षता गरेको बैठकमा सहभागी भए।
माधव नेपालको साथ छोडेर ओलीसँग 'सहमति गर्दै' मूलधारमा फर्किएका नेतामध्येका एक सुरेन्द्र पाण्डेसँग नेपाल लाइभका लागि वीरेन्द्र ओलीले लामो समयपछि ओलीले बोलाएको बैठकमा सहभागी हुँदाको अनुभव, चर्चित १० बुँदे सहमतिको कार्यान्वयन र अबका योजनाबारे गरेको संक्षिप्त कुराकानीः
सर्वोच्च अदालतको फैसलानुसार नेकपा एमाले ब्यूँतिएपछि पहिलोपटक आज (मंगलबार) अध्यक्ष केपी शर्मा ओलीले बोलाएको बैठकमा जानुभयो। कस्तो अनुभुति भयो?
अनुभुति के हुनुपर्ने हो र! आफ्नै पार्टीको बैठक हो। हिजोका दिनमा पनि बैठकमा गएकै हो। कहिले संघर्ष (लडाइँ) हुन्छ, कहिले सहकार्य हुन्छ। आजको बैठक नर्मल नै भयो।
तपाईंहरुलाई आरोप त लागेको छ नि माधव नेपाललाई बीचमा उचाल्नुभो, पछि छोड्नुभो, धोका दिनुभो भनेर?
यो गलत कुरा हो। हामीले उचालेको होइन। उहाँले नै सहमतिका लागि भनेर वार्ता समिति बनाउनुभएको हो। वार्ता समिति हामीले बनाएको होइन नि! उचाल्या कसरी भन्ने? वार्ता समिति भन्या त वार्ता गरेर पार्टी मिलाउनलाई बनाएको होइन र? पार्टी मिलाउनलाई वार्ता समिति बनाउने अनि उचालेर छोडेको भन्ने? उहाँले भन्या कुरा त यो होइन होला। अरुले भन्या कुरा होलान्।
अहिले चाहिँ पार्टी अध्यक्ष केपी शर्मा ओलीसँग गरेको १० बुँदे सहमतिअनुसार नै घटनाक्रम अगाडि बढेका हुन्?
ओलीसँगको कुरा हैन नि यो, यो त पार्टीसँग पार्टीको कुरा हो नि। ओलीसँग निजी सम्झौता गरेको हो र? ओली वा कसैको कम्पनी हो र यो? यो त पार्टी हो नि।
बैठकको अघिल्लो दिन (सोमबार) अध्यक्ष ओली र तपाईहरुबीच बालकोटमा भएको वार्तामा पार्टी संरचनालाई २०७५ जेठ २ गतेको अवस्थामा फर्काउने र मंगलबारको बैठक पनि त्यही संरचनाअनुसार बस्ने सहमति भएको भनिएको थियो। तर, मंगलबारको स्थायी कमिटी बैठकमा त पूर्व माओवादी नेताहरु पनि सहभागी भए नि?
हैन हैन, त्यो चाहिँ टेक्निकल (प्राविधिक) कुरा नै थियो। हामीले टेक्निकल कुरा मिलाएकै छौं। माइन्युटको कुरा गर्दा दुईटा माइन्युट हुन्छ। किनभने हामीले उठाएको त संवैधानिक र कानुनी प्रश्न पनि हो नि। ०७५ जेठ २ को कमिटी फर्काएपछि निर्वाचन आयोगले त्यसलाई मान्यता दिँदैन। भोलि ०७५ जेठ २ को कमिटीले उहाँहरुलाई नोमिनेट गरेको, कागजी रित पुर्याउँछौं हामी।
माधव नेपालले पार्टी दर्ता गर्न हुने सनाखतलाई प्रभावित गर्न मात्रै ओलीले तपाईंहरुसँग सहमति गरेका हुन्, पछि फेरि पुरानै प्रवृति दोहोरिन्छ भन्ने टिप्पणी पनि भइरहेको छ। तपाईंहरुलाई के लाग्छ?
तपाईंहरु जस्तोले उठाएको प्रश्न हो त्यो। किनभने कतिपय मान्छेलाई नेकपा एमाले मिलोस् भन्ने होइन कि फुटोस् भन्ने चाहना थियो क्या। हाम्रो पार्टी विभाजन हुँदा जसलाई फाइदा पुग्छ उनीहरुले यस्तो विश्लेषण गर्ने होला।
जे होस् पार्टीमा मन, चित्त मिलेर, एकढिक्का भएर काम गर्नुहुन्छ अब?
मिलाउनै पर्यो नि! मन भन्या के हुन्छ भने माधव कमरेडसँग नयाँ पार्टी दर्ता गर्न गएका साथीहरु, प्रचण्डजीको पार्टीमा सम्पूर्ण मन मिल्या छ? छैन नि। व्यक्तिपिच्छे दिमाग फरक फरक हुन्छ। सधैं मिल्छ भन्ने हुँदैन। कतिपय साझा कुरा हुन्छ, कतिपय हुँदैन। त्यसोहुनाले सहमति, असहमति भइरहन्छन्। हामीले बुझ्या छौं कि यहाँ सबै सहमति नै हुन्छ, असहमति केही पनि हुँदैन भन्ने पनि होइन। किनभने यस्ता कुरा हामीले झेल्दै पनि आएका छौं। झेल्दै आएका मान्छे पर्यौं हामी। सहमति, असहमति हुँदै जान्छ, तर हामी एउटा बिन्दुबाट ती कुराहरु फर्छ्यौट गर्छौं भन्ने हो।
माधव नेपालसहित उहाँसँग जाने नेताहरुको सन्दर्भमा के हुन्छ त तपाईंहरुको बुझाइ?
माधव कमरेडको हकमा त हाम्रो भनाइ स्पष्टै छ नि, उहाँले जानु हुँदैन थियो। हामीले त्यसका लागि अन्तिमसम्म कोशिष गरेको पनि हो। विभाजन नगरौं, एकै ठाउँमा बसौं, १० बुँदे सहमति गर्नका लागि हामीलाई निर्देशित गर्नुभयो। १० बुँदे त जम्मै हाम्रा माग थिए। सप्पै माग पूरा हुने, अनि हामी छाडेर हिँड्ने त हुँदैन नि।
अहिले उहाँ पार्टीमा बस्न सक्नु भएन। अलग पार्टी बनाउनुभो। भोलि पनि एकताको सम्भावना छ। आज विभाजित भएकाले भोलि एकता हुँदैन भन्ने हुन्न। विगतमा पनि हाम्रो पार्टी विभाजित भएको थियो, पछि पुनः एकता भयो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791196217.png)
-1791194094.png)
-1786602170.png)
-1791090469.jpeg)
