प्रतिकात्मक तस्वीर
रसुवा– भारी वर्षासँगै आएको पहिरोका कारण रसुवाको धुञ्चे–ठूलोभार्खुबीचको पासाङल्हामु राजमार्ग अवरूद्व भएको छ। प्रमुख जिल्ला अधिकारी ईश्वरीप्रसाद ढकालका अनुसार धुञ्चेभन्दा पारिपट्टी खोपाङ पाखाको राजमार्गमा पहिरो जाँदा सवारी आवागमन पूर्णरूपमा बन्द भएको हो।
नेपाल चीनबीचको व्यापार व्यवसाय गर्ने एकमात्र अन्तर्राष्ट्रिय राजमार्ग भएका कारण छिटोभन्दा छिटो खुलाउन पहल कदमी सुरू भइरहेको बताइएको छ।
राजमार्ग अवरूद्ध हुँदा दर्जनौं सवारीसाधन बीच बाटामै अलपत्र परेका छन्। उत्तरी रसुवामा आकस्मिकरूपमा पर्ने बिरामीसमेत जिल्ला अस्पताल धुञ्चे ल्याउन समस्या उत्पन्न भएको छ।
आकस्मिक पहिरो पन्छाउने प्रयोजनका लागि सडक विभागले धुञ्चेमा राखिएको लोडर सञ्चालन गर्न अपरेटर नहुँदा पहिरो पन्छाउन समस्या उत्पन्न भएको ट्राफिक प्रहरीले जनाएको छ। धुञ्चेमा उपकरण भएको र चालक भने काठमाडौंतर्फ गएको ट्राफिक प्रहरीको भनाइ छ।
स्याफ्रुबेसीँमा रहेका एक सडक प्राविधिकले स्थलगत निरीक्षण गरी मंगलबारसम्म राजमार्ग सञ्चालन गराउने प्रतिबद्वता व्यक्त गरेको प्रमुख जिल्ला अधिकारी ढकालले जानकारी दिए। राजमार्ग खोल्नका लागि स्याफ्रुबेँसीतर्फ रहेका उपकरण ल्याउने तयारी भइरहेको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
