काठमाडौं– विनाशकारी भूकम्पले भत्काएको रातो मत्स्येन्द्रनाथको मन्दिर पुनर्निर्माणलाई प्राथमिकताका साथ अगाडि बढाइने भएको छ।
ऊर्जा, जलस्रोत तथा सिँचाइमन्त्री पम्फा भुसाल, प्रदेशसभा सदस्य जीवन खड्का, राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवाली, ललितपुर महानगरपालिकाका प्रमुख चिरीबाबु महर्जन, पुरातत्त्व विभागका महानिर्देशक दामोदर गौतमको उपस्थितिमा हालै सम्पन्न बैठकले पुनर्निर्माणलाई गति दिने निर्णय गरेको हो।
पुनर्निर्माणका लागि आर्थिक, भौतिक एवं प्राविधिक आवश्यकता जोहो गर्ने प्रतिबद्धता भएको छ। रातो मत्स्येन्द्रनाथ मन्दिर पुनर्निर्माण उपभोक्ता समिति र पुरातत्त्व विभागले कोभिड–१९ को जोखिमका कारण पुनर्निर्माणका लागि काठ, ढुङ्गा समयमै उपलब्ध हुन नसकेको जनाउँदै आएको छ।
विसं २०७२ वैशाख १२ को विनाशकारी भूकम्पले ललितपुर महानागरपालिका–२२ स्थित बुङ्गमतीस्थित मत्स्येन्द्रनाथको मन्दिरमा क्षति पुगेको थियो। यस मन्दिरको पुनर्निर्माणको शिलान्यास भूकम्प गएकै वर्षको माघ २ गते गरिएको थियो। पुनर्निर्माण सुरुआत भएको छ वर्ष पुग्दा पनि सम्पन्न भएको छैन।
मन्दिरको पुनर्निर्माण विशिष्ट प्रकारको भएकाले पनि चुनौती भोग्नुपरेको उपभोक्ता समितिका अध्यक्ष अमिर शाक्यको भनाइ छ।
पछिल्लो बैठकपछि पुनर्निर्माणले गति लिने विश्वास गर्दै अध्यक्ष शाक्य भन्छन्, ‘अर्को जात्राका अवसरमा काम पूरा हुनेछ।’
आम जनताको आस्था रहेको मत्स्येन्द्रनाथको मन्दिर पुनर्निर्माणका लागि सहयोग संकलन गर्ने र राज्यका निकायबाट प्राप्त हुन आर्थिक एवं प्रविधिक सहयोगलाई एकीकृत गर्ने मन्त्री भुसालले बताइन्।
पुनर्निर्माणका लागि आवश्यक पर्ने कलात्मक इँटा महँगो हुने गरेको छ। स्थानीय कच्चा पदार्थबाट एउटा इँटा निर्माणका लागि ९ हजार ८५० रुपैयाँसम्म लाग्ने देखिएको छ। मन्दिरको परम्परागत स्वरूपलाई कायम गर्नका लागि चुनौती भएको स्थानीय जानकारको भनाइ छ।
मन्दिर पुनर्निर्माण पूरा गर्नका लागि सरकारले रु तीन करोड आठ लाख बजेट विनियोजन गरेको थियो। पुरातत्त्वको महत्त्वअनुसार निर्माण गर्ने हो भने थप रु तीन करोडभन्दा बढी बजेट आवश्यक पर्ने जानकारले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764508750.jpg)
-1764146706.png)
-1763721444.png)
-1763559424.jpg)
-1764080971.png)
