बैतडी- मालपोत कार्यालय बैतडीको राजस्व सङ्कलनमा वृद्धि भएको छ। कार्यालयले गत आर्थिक वर्षमा ८३ लाख ३६ हजार ११० रुपैयाँ राजस्व सङ्कलन गरेको छ।
आर्थिक वर्ष २०७६/७७ मा ६१ लाख २६ हजार २७९ रुपैयाँमात्र राजस्व सङ्कलन भएकामा गत वर्ष २२ लाख नौ हजार ८३१ रुपैयाँले बढी सङ्कलन भएको मालपोत कार्यालय बैतडीका कार्यालय प्रमुख दिलाराम भट्टले बताए।
कार्यालयले सबैभन्दा बढी रजिस्ट्रेसन शुल्कबापत ५३ लाख २७ हजार ४१३ रुपैयाँ, पुँजीगत लाभकरबापत १३ लाख ४५ हजार ७४२ रुपैयाँ, सेवा शुल्कबाट १६ लाख ५५ हजार ४०५ रुपैयाँ, पूर्जा बिक्रीबाट एक हजार २५० रुपैयाँ र बेरुजु असुलीबाट छ हजार ३०० रुपैयाँ सङ्कलन भएको हो।
जिल्लाका सबै स्थानीय तहमा सडक सञ्जालले जोडिएपछि र बैंकिङ सुविधा भएपछि जमिनको कारोबारमा वृद्धि भइरहेको छ। जमिन धितो राखेर बैंकबाट ऋण लिनेको सङ्ख्या बढेको छ।
कोभिड-१९ नियन्त्रणका लागि गरिएको लकडाउनले गर्दा भने तुलनात्मक रुपमा राजस्व सङ्कलन कमी आएको कार्यालयले जनाएको छ। घरेलु तथा साना उद्योग कार्यालय बैतडीको गत आर्थिक वर्षको राजस्व सङ्कलनमा ५० प्रतिशतले घटेको छ। उद्योग दर्ताको सङ्ख्यामा बढेको भए पनि कार्यालयको गत आर्थिक वर्षको राजस्वमा आव २०७६/७७ को भन्दा आधाले घटेको हो। राजस्व घटे पनि उद्योगको सङ्ख्यामा भने आव २०७६/७७ को भन्दा गत वर्षमा आधाभन्दा बढीले वृद्धि भएको पाइएको छ।
कार्यालयमा आव २०७६/७७ मा उद्योगतर्फको कूल राजस्व १६ लाख छ हजार २०० रुपैयाँ थियो भने गत वर्षमा घटेर आठ लाख ८० हजार ३५० रुपैयाँ मात्र सङ्कलन भएको छ। यस्तै वाणिज्यतर्फ पनि आव २०७६/७७ मा २० लाख १६ हजार ८०० रुपैयाँ छ भने गत वर्षमा घटेर नौ लाख ६५ हजार ५५० रुपैयाँ मात्र सङ्कलन भएको घरेलु तथा साना उद्योग कार्यालय बैतडीका प्रमुख अम्बादत्त जोशीले बताए।
आव २०७६/७७ मा उद्योगतर्फ २५६ उद्योग दर्ता भएका थिए भने गत वर्ष बढेर ८४९ उद्योग दर्ता भएका छन्। यसैगरी वाणिज्यतर्फ आव २०७६/७७ मा ३३१ उद्योग दर्ता भएका थिए भने गत वर्षमा बढेर ६८० उद्योग दर्ता भएका छन्। गत आवमा सरकारले उद्योग दर्ता गरेर काम गर्ने महिला र पुरुषलाई राजस्वमा छुट गरेको कारणले गत वर्षमा राजस्वमा कमी आएको हो।
गत आवदेखि एक लाख रुपैयाँसम्म पुँजी भएका महिलाको नाममा उद्योग दर्ता भएमा दर्ता शुल्क ६०० रुपैयाँ लाग्छ भने पुरुषको नाममा दर्ता भएमा एक हजार १०० रुपैयाँ दर्ता शुल्क लाग्नेछ। यस्तै १० लाख रुपैयाँदेखि ५० लाख पुँजी भएको उद्योग महिलाको नाममा दर्ता भएमा दुई हजार ६०० रुपैयाँ र पुरुषको नाममा दर्ता भएमा पाँच हजार १०० रुपैयाँ मात्र दर्ता शुल्क लाग्ने कार्यालयले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1771045886.png)
-1764146706.png)
-1770562345.jpg)
