जीपी फाउण्डेसन अनुसन्धान विभागको निर्देशकमा जगत नेपाल

समाचार

रासस सोमबार, असार २१, २०७८ २०:४७

काठमाडाैं- गिरिजाप्रसाद कोइराला फाउण्डेसनको विचार तथा अनुसन्धान विभागको निर्देशकमा पत्रकार जगत नेपाललाई नियुक्त गरिएको छ। नेपाली कांग्रेसका पूर्वसभापति एवं पूर्वप्रधानमन्त्री गिरिजाप्रसाद कोइरालाका स्मृतिमा स्थापित फाउण्डेसनको आज बसेको केन्द्रीय कार्यसमितिको बैठकले पत्रकार नेपाललाई दुई वर्षका लागि निर्देशकमा नियुक्त गरेको हो।

फाउण्डेसनका अध्यक्ष एवं पूर्वउपप्रधानमन्त्री सुजाता कोइरालाले नेपालको प्रजातान्त्रिक आन्दोलन र गिरिजाबाबुको योगदानका विषयमा अध्ययन अनुसन्धान गर्नका लागि अनुसन्धानकर्ता एवं पत्रकार नेपाललाई उक्त विभागको जिम्मेवारी प्रदान गरिएको जानकारी दिइन्। पत्रकार नेपालले गिरिजाबाबुको नेतृत्वमा भएको जहाज अपहरणलाई समेटेर ‘हाइज्याकिङ फर डेमोक्रेसी’ र ‘राजद्रोही राजनेता’ वृत्तचित्र निर्माण गरिकेका तथा नेपालको नेपालको राजनीतिलाई समेटिएका चार पुस्तक प्रकाशनमा ल्याइसकेका छन्।

पत्रकार नेपालले स्व कोइरालाको लाइभ अन्तर्वार्ता लिनाका साथै उनको जीवनीलाई समेटिएको पुस्तक ‘आफ्नै कुरा’ प्रकाशनमा ल्याइसकेका छन्। २०५४ सालदेखि पत्रकारितामा संलग्न नेपाल रत्नराज्यलक्ष्मी क्याम्पसका उपप्राध्यापकसमेत हुन्।

जीपी कोइराला फाउण्डेसनले पछिल्लो समय मुलुकको शिक्षा, स्वास्थ्य र पर्यटन क्षेत्रका विकासमा महत्त्वपूर्ण भूमिका खेल्दै आएको छ। फाउण्डेसनले नेपालबाहेक विभिन्न देशमा आफ्नो शाखा विस्तार गरी सामाजिक काम गर्दै आएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।