काठमाडाैं- भूगर्भविद् डा रञ्जनकुमार दाहालले चार वर्षअघि नै मेलम्ची क्षेत्रका नदी किनारका बस्ती जोखिम रहेको जानकारी दिएकाे दाबी गरेका छन्।
आइतबार मेलम्चीमा भएकाे इन्द्रावती क्षेत्रको प्राकृतिक प्रकोप व्यवस्थापनसम्बन्धी विज्ञहरुसहितको अन्तक्र्रिया कार्यक्रममा भूगर्भविद् दाहालले मेलम्चीको घटना अस्वभाविक नभई समयान्तरमा यस्तो हुन सक्ने आफ्नो अध्ययनले बताएको जानकारी दिए।
पाँच–सात वर्षमा नदीले ल्याउने परिवर्तन सय–दुई सय वर्षमा हुने परिवर्तनलाई साधारणतः आकलन गर्न नसकिने उनकाे भनाइ छ। कार्यक्रममा साविक वस्तीमा पुनः बस्ती बसाल्नु खतरा हुने विज्ञको राय दिएका छन् ।
जलवायुविज्ञ डा रविन निरौलाले नदीका लागि ‘बफर जोन’ छाड्नुपर्ने बताए। उनले नदीको धार हालसम्म यकिन नभएकाले अझै जोखिम रहेको बताए ।
इसिमोडका जलवायु परिवर्तनविज्ञ अरुणभक्त श्रेष्ठले भू–उपग्रहमार्फत लिएको नक्सा अध्ययन गर्दा मेलम्ची नदीको मुहान क्षेत्रमा हिउँ तथा सानो हिमतालसमेत रहेको र अहिले हिउँ पग्लिएको साथै तालसमेत फुटेको जानकारी दिए।
काठमाडौं विश्वविद्यालयका रजिष्ट्रार डा सुवोध शर्माले अबका कदमका लागि अध्ययन समूह गठन गर्नुपर्ने प्रस्ताव गरेका छन्। सोहीअनुसार इसिमोडका जलवायु परिवर्तन विज्ञ श्रेष्ठको संयोजकत्वमा विभिन्न क्षेत्र र विज्ञ सम्मिलित ११ सदस्यीय समूह गठन गरिएको छ ।
विपद् व्यवस्थापनका लागि अबका दिनमा गर्नुपर्ने कामका बारेमा अध्ययन गरी यस समूहले सुझाव पेस गर्ने नगरपालिकाका प्रमुख प्रशासकीय अधिकृत अमृतकुमार धितालले जानकारी दिए।
कार्यक्रममा मेलम्ची नगरपालिकाका प्रमुख डम्बर अर्यालले विस्थापनमा परेकालाई व्यवस्थापनमा जोड दिइएको बताए।
मेलम्ची नगरपालिकाको आयोजनामा भएको सो कार्यक्रममा प्रकोपविज्ञ, जनप्रतिनिधि, पत्रकार, सुरक्षा निकाय प्रमुखको सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
