कर्णाली– कर्णाली प्रदेशमा सुनको अभाव हुन थालेको छ। सुनको असमान वितरणका कारण कर्णालीमा सुन अभाव हुँदै गएको सुनचाँदी व्यवसायी संघ कर्णाली प्रदेशले जनाएको छ।
प्रदेशमा मागअनुसारको सुन आपूर्ति गर्न नसकेको संघको दाबी छ। यो बन्दाबन्दीको समयमा यहाँका सुनचाँदी व्यवसायी झनै ठूलो मर्कामा परेको संघका कर्णाली प्रदेश अध्यक्ष जनक सुनारले बताए।
अध्यक्ष सुनारका अनुसार नेपाल राष्ट्र बैंकले नेपाल सुनचाँदी व्यवसायी महासंघलाई दैनिक २० केजी सुन उपलब्ध गराउँदै आएकामा रत्न आभूषण तथा पत्थर व्यवसायी महास.घलाई ४० प्रतिशत र सुनचाँदी व्यवसायी महासंघलाई ६० प्रतिशत छुट्याउने गरिएको छ।
सुनचाँदी व्यवसायी महासंघले सुनचाँदी वितरण कार्यविधि, २०६८ का आधारमा त्यो ६० प्रतिशतलाई १०० प्रतिशत मानेर ६० प्रतिशत उपत्यका र ४० प्रतिशत बाहिर जिल्लामा पठाउँछ।
चालिस प्रतिशत सुन उपत्यकाबाहिरका महासंघ आबद्ध ४०–४५ जिल्लाका व्यवसायी संघलाई पठाउँदा मागअनुसारको पूर्ति हुन नसकेको अध्यक्ष सुनारले बताए।
कर्णालीमा मासिक १० केजीसम्म सुन आवश्यक पर्ने बताउँदै उनले मासिक एकदेखि तीन केजी सुन आउने गरेको जनाए। ‘यसले सुन वितरण प्रणालीमा विभेदीकरण बढ्दै गएको छ,’ उनले भने, ‘यो अवस्था हटाउन सातै प्रदेशस्थित संघका अध्यक्षहरुले स्थायी लेखा नम्बर (प्यान) का आधारमा सुन वितरण माग राख्दै आएका छौं।’
सरकारले महासंघलाई दैनिक ५० केजी सुन उपलब्ध गराउनुपर्ने उनको भनाइ थियो। सुन नभएकै कारण कर्णालीका व्यवसायीलाई यो दुई महिनाको अवधिमा ५० लाख रुपैयाँबराबरको घाटा भएको छ।
कर्णालीमा मासिक १० केजी सुन आउन सके करिब चार हजारलाई रोजगार दिन सकिने दाबीसमेत गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1791388337.png)
