फाइल तस्बिर
दार्चुला- महाकाली नदीमा जल सतह घट्दो क्रममा रहेको छ। शुक्रबार रातिसम्म बढ्दै गएको महाकाली नदीमा पानीको बहाव शनिबार बिहानदेखि घट्दै गएको हो।
सदरमुकाम खलङ्गा झोलुङ्गे पुलनजिक पानीको सतह घटेर ४.२ मा झरेको छ। गएराति १० बजे सो स्थानमा पानीको बहाव ४.५ मिटर पुगेको जिल्ला प्रशासन कार्यालय दार्चुलाले जनाएको थियो।
'पानीको बहाव कम हुँदै गएको छ,' जिल्ला प्रहरी कार्यालय दार्चुलाका प्रहरी निरीक्षक एवं सूचना अधिकारी नरेन्द्रबहादुर चन्दले भने, 'तर खतरा भने कायमै छ।' प्रहरीले निरन्तर नदी छेउछाउ गएर खतराको बारेमा जानकारी गराइरहेको छ। सर्वसाधारणलाई नदी किनारमा नजान आग्रह गरिरहेको उनको भनाइ छ। यस्तै प्रहरीले सबै क्षेत्रमा माइकिङ गर्दै सतर्कता अपनाउन आग्रह गरिरहेको उनले बताए।
दार्चुलाको महाकाली नगरपालिका तथा मालिकार्जुन, लेकम, व्यास र दुहुँ गाउँपालिकालगायत क्षेत्रमा महाकाली नदी किनारमा स्थानीयवासीलाई जान नदिन प्रहरीले सबै युनिटहरुलाई खबर गरेको छ।
यसैगरी स्थानीय प्रशासनले नदी छेउछाउमा नजान स्थानीयवासीलाई आग्रह गरेको छ। प्रमुख जिल्ला अधिकारी सिद्धराज जोशीले सूचना जारी गर्दै नदीमा पानीको मात्रा नघटेको भन्दै सतर्कता अपनाउन आग्रह गरेका हुन्। मनसुन जारी रहेकाले अहिले नै कम भयो भन्दै नदी किनारतिर काठ निकाल्न, बालुवा झिक्न र माछा मार्ने काम नगर्न नगराउन प्रजिअ जोशीले आग्रह गरेका छन्। शुक्रबार महाकाली नदी नियन्त्रण आयोजनाको बङ्गाबगड क्षेत्रको निर्माणाधीन तडबन्ध माथि नदी पुगेको थियो। महाकाली नदी निर्माणाधीन तटबन्धमा पुगे पनि क्षति नभएको महाकाली नदी नियन्त्रण आयोजना प्रमुख शोभाकर पौडेलले बताए।
खोतीला पहिरो कटान हुँदै
महाकाली नदीले धारचुलाको खोतीला पहिरो पनि कटान गर्दै लगेको छ। ०७३ साल असोजमा आएको सुख्खा पहिरो कटान थालेको छ। बंगागबडको पारिपट्टी रहेको खोतीला पहिरो कटान हुन थालेपछि भारतीय बाटो अवरुद्ध बनेको प्रहरी निरीक्षक चन्दले बताए।
यसअघि नेपालले निरन्तर खोतिला पहिरो हटाउन भारतलाई आग्रह गर्दै आएको थियो। पटक-पटक भारतले स्थलगत निरीक्षणसमेत गरेको थियो। तर भारतले उक्त पहिरो हटाउँदा भारततर्फ बढी क्षति हुने भन्दै हटाउन मानेका थिएन्। नेपालले भने पहिरोका कारण खलङ्गाको तटबन्ध र बजार क्षेत्र जोखिममा परेको भन्दै निरन्तर हटाउन आग्रह गर्दै आएको थियो।
नौगाडमा दुई घर भत्किए
पहिरोका कारण नौगाड गाउँपालिकामा दुई घर भत्किएका छन्। नौगाड गाउँपालिका-१ इयरकोटका सौडानका विरनसिह महता र प्रेम महताको घर भत्किएको हो।
घरमाथिबाट आएको पहिरोले पूरै घर क्षति भएको स्थानीयवासी आनसिंह बडालले बताए। पहिरोका कारण दुवै परिवार विस्थापित भएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
