जुम्ला– जुम्लाको तातोपानी गाउँपालिका–६ रावतबाडा गाउँ एक साताका लागि सिल गरिएको छ। कोरोना संक्रमणले गाउँ नै प्रभावित भएपछि एक साता सिल गरिएको हो। गाउँपालिकास्तरीय कोभिड–१९ नियन्त्रण तथा व्यवस्थापन समितिको बैठकले यही जेठ १९ गतेदेखि जेठ २८ गतेसम्म सो गाउँ एक साताको लागि सिल गर्ने निर्णय गरेको गाउँपालिका अध्यक्ष नवराज न्यौपानेले बताए।
उनका अनुुसार बाहिरबाट आएको कुनै पनि व्यक्ति गाउँमा प्रवेश पाउने छैन। रावतबाडा र खड्काबाडाबीच आवतजावत पनि बन्द गरिएको छ। यी दुबै जोडिएका गाउँ हुन्। गाउँमा कोरोना संक्रमित बढ्न सक्ने भएकाले गाउँपालिकाले आइसोलेशन कक्ष थप गर्ने निर्णय गरेको अध्यक्ष न्यौपानेले बताए।
मंगलबार गाउँका २७ जनामा एन्टिजेन परीक्षण गर्दा नौ जनामा कोरोना संक्रमण पुष्टि भएको थियो। संक्रमित सबैलाई गाउँपालिकाले बनाएको आइसोलेसन केन्द्रमा चिकित्सकको प्रत्यक्ष निगरानीमा राखिएको छ।
गाउँपालिकाका स्वास्थ्य शाखा प्रमुख गुरुप्रसाद चौलागाईंले बुधबार गाउँका ५५ घरधुरीका १०९ जनाको पीसीआरका लागि स्वाब संकलन गरिएको बताए।
यसअघि रावतबाडा गाउँमा विवाहलगायत सामूहिक गतिविधि तीव्र भएका थिए। काठमाडौँ, सुर्खेत र भोजपुरलगायत जिल्लाबाट मान्छे भित्रिएका थिए। गाउँमा कोरोना लक्षणका बिरामी बढेको थाहा पाएपछि वडाध्यक्ष विशाल खड्काले स्वास्थ्यकर्मीसहित गाउँमा पुगेको बताए। उनका अनुसार बिरामीको अवस्थाबारे जानकारी लिएर पहिलो दिन एन्टिजेन परीक्षणका लागि कोभिड अस्पतालमा २७ जनालाई पठाइएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
