बाँके- कोरोना संक्रमणदर घटेसँगै यहाँका अस्पतालका शय्या खाली हुँदै गएका छन्। एक हप्ताअघिसम्म यहाँका कोरोना उपचार हुने अस्पतालमा शय्या नपाएर बिरामीलाई बरण्डामा राखेरसमेत बिरामी गर्नुपर्ने अवस्था रहेकामा अहिले सबै अस्पतालका शय्या खाली हुँदै गएका छन्।
दैनिक ठूलो संख्यामा संक्रमित भर्ना हुने बाँकेमा संक्रमण घटेपछि अहिले अधिकांश बाहिरी जिल्लाका बिरामी बाँकेका अस्पतालमा उपचारका लागि आउने गरेको जिल्ला कोभिड सङ्कट व्यवस्थापन केन्द्रका स्रोत व्यक्ति तेज वलीले बताए। उनका अनुसार संक्रमण दर घटेसँगै पश्चिम नेपालमै कोरोना उपचार केन्द्रका रुपमा रहेका नेपालगञ्जस्थित भेरी अस्पताल र कोहलपुरस्थित शिक्षण अस्पतालका कोभिड कक्षकै शय्यासमेत खाली भएका छन्।
मङ्गलबार भेरी अस्पतालको कोभिड वार्डमा ३०, नेपालगञ्ज मेडिकल कलेजको शिक्षण अस्पताल कोहलपुरमा २८, वेस्टर्न अस्पताल नेपालगञ्जमा १३, युनाइटेड अस्पताल नेपालगञ्जमा पाँच गरी ७६ शय्या खाली भएका वलीले जानकारी दिए।
कोरोना उपचार हुँदै आएका अस्पतालमा रहेका जम्मा ३६१ कोभिड शय्यामा मङ्गलबार २८५ व्यक्ति उपचाररत छन् भने ७६ शय्या खाली छन्। बाँकेमा अहिले संक्रमितभन्दा कोरोना जितेर घर फर्किनेको संख्या धेरै छ।
कोरोना संक्रमण रोकथामका लागि जारी निषेधाज्ञाको एक महिनापछि बाँकेमा संक्रमण र मृत्युदर घट्दै गएको छ। दैनिक १० जनाभन्दा धेरैको मृत्यु हुँदै आएकामा केही दिनयता मृत्युदरसमेत न्यून भएको छ। अस्पतालमा मृत्यु हुनेमा अधिकांश बाहिरी जिल्लाका रहेका बताइएको छ।
यसैबीच कोरोना संक्रमणबाट यहाँ हालसम्म ५४० जनाको मृत्यु भएको छ। कोरोना महामारी संक्रमणको एक वर्षको अवधिमा उपचारका लागि यहाँस्थित भेरी अस्पताल र शिक्षण अस्पताल कोहलपुरमा भर्ना भएका बिरामीको मृत्यु भएको हो। मृत्यु हुनेमा सबैभन्दा धेरै बाँकेका रहेको जिल्ला कोभिड सङ्कट व्यवस्थापन केन्द्रका स्रोत व्यक्ति वलीले जानकारी दिए।
उनका अनुसार हालसम्म कोरोना संक्रमणका कारण बाँकेका २८१ र अन्य जिल्लाबाट उपचारका लागि यहाँका अस्पतालमा भर्ना भएका २५९ गरी ५४० जनाको मृत्यु भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
