काठमाडौं– प्रतिनिधिसभा विघटनविरुद्ध अदालत जाने तयारीमा रहेका विपक्षी दलहरुले त्यसको तयारी थालेका छन्। प्रधानमन्त्री पदका दाबेदार शेरबहादुर देउवाको पक्षमा बहुमत रहेको दावीसहित विपक्षी गठबन्धन १४९ जना सांसदको हस्ताक्षरसहित अदालत जान लागेको हो।
त्यसका लागि सोमबार नेपाली कांग्रेसको संसदीय दलको कार्यालयमा कागजात तयारी भइरहेको छ। त्यस्तै माओवादी केन्द्रको संसदीय दलको कार्यालयमा पनि उक्त दलका सांसदहरु कागजपत्र तयार गर्न जुटेका छन्।
नेकपा एमालेका वरिष्ठ नेता माधव कुमार नेपाल पक्षका र जनता समाजवादी पार्टीका उपेन्द्र यादव पक्षका सांसदहरु भने उपस्थित भइसकेका छैनन्।
सबै सांसदहरु उपस्थित भएपछि कांग्रेस संसदीय दलमा जम्मा भइ रिट निवेदश पेश गर्न जाने तयारी गरिएको छ।
आइतबार नै अदालतमा रिट दर्ताको तयारी गरिए पनि सबै आवश्यक कागजातसहितको विवरण तयार पार्न ढिलाइ भएकाले आज रिट पेस गर्ने तयारी गरिएको थियो।
रिट दायर गर्नका लागि नेपाली काँग्रेस, माओवादी केन्द्र, जनता समाजवादी पार्टी, नेकपा एमालेको माधवकुमार नेपाल समूह तथा राष्ट्रिय जनमोर्चाका सांसदहरुको हस्ताक्षर संकलन गरिएको थियो। सांसदहरुलाई हस्ताक्षरका लागि अदालती फर्म्याट उपलब्ध गराइएको थियो।
कांग्रेस सांसद डिला संग्रौलाले संविधानको ७६ (५) अनुसार प्रधानमन्त्रीको दाबी गर्ने व्यक्तिको समर्थन दलको आधारमा नभई वैयक्तिक अधिकार भएकाले व्यक्तिरव्यक्तिको प्रमाणहरु पेस गर्न लागिएको जानकारी दिइन्।
शुक्रबार १४९ सांसदहरुको हस्ताक्षरसहित प्रधानमन्त्रीमा कांग्रेस सभापति शेरबहादुर देउवाले दाबी गरेका थिए। प्रधानमन्त्री केपी ओली पक्षबाट अर्को दाबी पनि आएकाले दुवैलाई राष्ट्रपतिले अस्वीकृत गर्दै निर्वाचनको मिति घोषणा गरेकी थिइन्।
शनिबार पाँच दलका शीर्ष नेताहरुको बैठकले प्रतितिनिधि सभा विघटन असंवैधानिक भएको निष्कर्ष निकाल्दै त्यसविरुद्ध १४९ जना सांसदलाई लिएर सर्वोच्च अदालत जाने निर्णय गरेको थियो।
प्रधानमन्त्रीमा केपी शर्मा ओलीको निरन्तरता नै असंवैधानिक रहेको ठहर गर्दै पाँच राजनीतिक दलसम्बद्ध गठबन्धनले उनले प्रतिनिधिसभा विघटनको सिफारिस गर्न नपाउने दाबी अघि सारेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768049575.png)
-1764146706.png)
