नेपालगञ्ज- बाँकेका अस्पतालमा भर्ना भएका थप चार कोरोना सङ्क्रमितको गएराति मृत्यु भएको छ। मृत्यु हुनेमा बाँकेका तीन र बर्दियाका एक जना रहेको जिल्ला कोभिड संकट व्यवस्थापन केन्द्रका स्रोत व्यक्ति तेज वलीले बताए।
उनका अनुसार यही वैशाख १४ गते भर्ना भएका बैजनाथ गाउँपालिका-२ बाँके निवासी २० वर्षीय पुरुष र १७ गते भर्ना भएका राजापुर नगरपालिका-२ बर्दिया निवासी २७ वर्षीय युवाको शिक्षण अस्पताल कोहलपुरमा उपचारका क्रममा मृत्यु भएको हो।
यसैगरी, यही वैशाख १७ गते भर्ना भएकी कोहलपुर नगरपालिका–११ निवासी ४० वर्षीया महिलाको उपचारका क्रममा गएराति करीब ८ः०० बजे भेरी अस्पतालमा मृत्यु भएको थियो।
खजुरा गाउँपालिका–३ निवासी ५५ वर्षीय पुरुषको पनि गएराति नै मृत्यु भएको छ। वैशाख १७ गते गरिएको एन्टिजेन परीक्षणबाट उनलाई कोभिड पुष्टि भएपश्चात् गाउँपालिकाले खजुरामा बनाएको आइसोलेसनमा भर्ना गरिएको थियो। उनको उपचारकै क्रममा मृत्यु भएको स्रोत व्यक्ति वलीले बताए।
योसँगै बाँकेमा कोरोना भाइरस संक्रमणबाट १२३ र उपचारका क्रममा बाहिरी जिल्लाबाट आएका ११९ जनाको मृत्यु भएको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।