झापा- कोभिड-१९ सङ्क्रमणको दोस्रो लहर तीव्रगतिमा फैलिइरहेको छ। अन्य क्षेत्रभन्दा बढी जोखिम मोलेर स्वास्थ्यकर्मीले बिरामीको उपचार गरिरहेका छन्। ज्यानको प्रवाह नगरी अग्रभागमा खटिएका मेची प्रादेशिक अस्पतालका स्वास्थ्यकर्मीले पहिलो लहरकै बेलाको कोभिड जोखिमभत्ता पाएका छैनन्।
जोखिमको भयावहस्थितिमा सरकारले एक वर्षसम्म भत्ता दिने निर्णय गरेको थियो। जोखिममा काम गर्दा भत्ता नदिइएपछि मेची अस्पतालका स्वास्थ्यकर्मी तथा कर्मचारी निराश बनेका अस्पतालका सुपरिन्टेन्डेन्ट डा. पिताम्बर ठाकुरले बताए।
'कोभिड-१९ को पहिलो लहर सकिएर दोस्रो सुरु भयो, जोखिम उत्तिकै छ,' डा. ठाकुरले गुनासो गर्दै भने, 'गत वर्षको भत्ता समेत दिइएको छैन, स्वाथ्यकर्मी र कर्मचारी निराश छन्।' प्रदेश १ सरकारले गत आर्थिक वर्षको चार महिना र चालु आर्थिक वर्षको छ महिनाको जोखिमभत्ता दिनुपर्ने हो। गत आवको दुई महिना अर्थात् चैत र वैशाखको मात्र भत्ता सरकारले उपलब्ध गराएको थियो।
अस्पतालले गत आवको चार महिनाका लागि जोखिमभत्ता भुक्तानीका लागि सरकारसँग एक करोड २० लाख रुपैयाँ माग गरेको थियो। सरकारले दुई महिनाको ६० लाख रुपैयाँमात्र पठाइदिएको अस्पतालका लेखा अधिकृत मनोज पोखरेलले बताए। उनका अनुसार अग्रभागमा रहेर काम गर्ने ३२ जनाले एक सय प्रतिशत, मध्यभागमा रहेर काम गर्ने पाँच जनाले ७५ प्रतिशत र बाँकी १६९ जनाले ५० प्रतिशतका दरले दुई महिनाको मात्र भत्ता पाएका छन्।
खुला सीमानाका कारण झापामा कोरोना सङ्क्रमणका बिरामी दैनिक बढिरहेका छन्। अस्पतालमा ७५ बेडको छुट्टै कोभिड अस्पताल नै सञ्चालनमा रहेको छ। जिल्लामा दैनिक १२ देखि १५ जना कोभिडका सङ्क्रमणका बिरामी भइरहेको डा. ठाकुरको भनाइ छ। उनले अस्पतालको बेडमा भने हाल तीन जनामात्र बिरामी रहेको जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764598201.png)
-1764146706.png)
-1763721444.png)
-1763559424.jpg)
-1764080971.png)
