काठमाडौं- नेकपा (एमाले) कर्णाली प्रदेश संसदीय दलका नेता यामलाल कँडेलले पार्टीमा समस्या भएपनि संसदीय दलमा नरहेको बताएका छन्। कर्णाली प्रदेश सभाको सातौं अधिवेशनमा बोल्दै उनले हरेक प्रदेशमा एमालेको संसदीय दल एकताबद्ध रहेको बताए।
कर्णालीमा मुख्यमन्त्री महेन्द्रबहादुर शाहीले विश्वास मत लिनुअघि बोल्दै उनले आफ्नो दल एकताबद्ध रहेका विश्वास व्यक्त गरेका हुन्। उनले यस्तो भनिरहँदा कर्णाली प्रदेशमा सांसदहरुले ‘फ्लोर क्रस’ गर्न सक्ने चर्चा चलिरहेको छ।
‘लोकतान्त्रिक अभ्यासमा बाकसमा थापेर नेतृत्व चयन गर्ने प्रणाली हुँदा एमाले पार्टीमा समस्या छन्। पार्टीमा समस्या भएपनि संसदीय दलभित्र एकता छ। नेकपा एमाले हरेक प्रदेशमा एकताबद्ध भएर अघि बढाइरहेको छ,’ उनले भने।
आफ्नो समस्यामा आफूलाई भन्दा बढी चासो अरुलाई रहेकोप्रति उनले कटाक्ष गरे। ‘हाम्रो समस्यामा हाम्रोभन्दा छिमेकीको चासो बढी देखिन्छ। आफ्नो घर सम्हालौं, छिमेकीको पीर नलिऔं। बर्बाद भइन्छ,’ उनले भने।
‘फ्लो क्रस’ हुने बजार हल्लाका लागि केही सक्रिय भइरहेको उनले आराेप लगाए। विभिन्न गतिविधि गरिरहेको बताउँदै त्यसले लोकतन्त्रलाई राम्रो नगर्ने उनको भनाइ छ।
‘नेकपा एमालेप्रति आँच पुर्याउने गरी, चरित्रहत्या गर्नेगरी जुन काम भइरहेको छ, त्यो निन्दनीय छ। त्यसले दलीय संस्कार राम्रो गर्दैन। दलीय सीमालाई मिचेर पार्टीका माननीयप्रति प्रतिष्ठामा आँच आउने काम भइरहेको छ, त्यसो नगरौं,’ उनले भने।
यसअघि एकसाथ रहेका आफूहरु सातौं महाधिवेशनमा एमाले र माओवादी केन्द्र हुनुपरेको बताउँदै यसलाई स्वीकार्नुको विकल्प नरहेको बताए। ‘न नेकपा बनाउँदा आमजनताबाट अनुमोदित भयो, न अहिले। यसलाई बेहोर्नुको विकल्प छैन। भिन्नताका बाबजुद एकता गरेर आफ्नो ठाउँको विकास र समृद्धि अघि बढाउनुपर्छ,’ उनले भने।
आफूलाई समर्थन गर्यो भने क्रान्तिकारी हुने नगर्दा अर्को शब्दले सम्बोधन गर्ने राजनीतिक परम्परा गलत रहेको उनले औंल्याए। उनले प्रश्न गरे, ‘के गर्दा क्रान्ति हुन्छ, के गर्दा प्रतिगमन हुन्छ? संवैधानिक र असंवैधानिक भन्ने विषयमा वहश गर्न सकिन्छ। अदालतबाट एउटा निर्णय भएको छ। विभिन्न घटनाहरु अदालतले फरक दृष्टिकोण राखेकोमा हााम्रो भिन्न मत छ। तर, स्वीकारेका छौं।’
उनले मन शान्तिका लागि त्यसलाई प्रतिगमन भन्दा हुने बताए। तर, प्रतिगमन हुँदा अवस्था र संरचना बदलिएको हुने उनको भनाइ छ। यस्ता विषयमा भन्दा कर्णालीमा के गरियो भन्ने विषयको छलफल सही हुने उनको भनाइ थियो।
‘आगामी दिनमा हार्दिकता साथ दलीय सम्बन्ध सुदृढ गर्ने कुरा र कर्णालीका समस्यालाई एउटै अजेन्डामा राख्ने मान्यता आज पनि कायम छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
