काठमाडाैं- नेपाली कांग्रेसका सभापति शेरबहादुर देउवा र माओवादी केन्द्रका अध्यक्ष पुष्पकमल दाहाल ‘प्रचण्ड’बीच दुई प्रदेशमा सत्ता सहकार्य गर्ने सहमति भएको छ।
मंगलबार राति महाराजगन्जस्थित एक व्यापारीको घरमा भएको भेटमा उनीहरु बीच गण्डकी र लुम्बिनी प्रदेशमा सत्ता सहकार्य गर्ने सहमति भएको हो।
‘हिजो भएको भेटमा कांग्रेसलाई गण्डकी प्रदेशमा मुख्यमन्त्रीको लागि माओवादी केन्द्रले सघाउने र लुम्बिनीमा माओवादी केन्द्रलाई कांग्रेसले सघाउने सहमति भएको छ,’ कांग्रेसका एक नेताले भने।
योसँगै गण्डकीमा कांग्रेसबाट संसदीय दलका नेता कृष्णचन्द्र नेपाली मुख्यमन्त्री बन्ने भएका छन्। उनी त्यही समीकरण बनाउन काठमाडौं आएर फर्किएका छन्।
कांग्रेस र माओवादीबीच गठबन्धन बनेर अरु दलले समर्थन गरेपछि गण्डकी प्रदेशका मुख्यमन्त्री पृथ्वीसुब्बा गुरुङको सरकार ढल्ने निश्चित भएको छ। एमाले नेतृत्वको सरकारलाई दिएको समर्थन राष्ट्रिय जनमोर्चाले फिर्ता लिएसँगै मुख्यमन्त्रीविरुद्धको अंकगणित प्रस्ट भएको हाे।
गत बुधबार माओवादीको तर्फबाट मन्त्री बनेका हरिबहादुर चुमान र लेखबहादुर थापाले राजीनामा दिएका थिए।
जनमोर्चाको निर्णयलगत्तै कांग्रेसका वार्ता समिति संयोजक एवं प्रदेशसभा सदस्य कुमार खड्काले अब अंकगणित प्रस्ट भएको र भोलि जनमोर्चासहितका अन्य दलको संसदीय दलको नेतासँग छलफलपछि अविश्वासको प्रस्ताव अघि बढ्ने बताएका छन्।
गण्डकी प्रदेशसभाका ६० सांसदमध्ये मुख्यमन्त्री गुरुङको पार्टी एमाले पक्षमा २७ सांसद छन्।
यता, स्वतन्त्रमा मनाङ ‘ख’ बाट निर्वाचित दीपक मनाङेले एमालेलाई समर्थन गरेका छन्। योसहित एमालेका सांसद संख्या २८ हुन्छ। यसबाहेक माओवादी केन्द्रका १२, कांग्रेसका १५, राष्ट्रिय जनमोर्चाका ३ र जनता समाजवादी पार्टीका २ सांसद छन्।
यस्तै, नेकपा विभाजनपछि लुम्बिनीका मुख्यमन्त्री शंकर पोखरेलको सरकार पनि अल्पमतमा रहेको छ। लुम्बिनी प्रदेश सभामा ८७ सदस्य रहेकोमा माओवादीले दुईजनालाई निष्काशन गरेकाले अब ८५ सदस्यमात्र छन्। जसमध्ये अब एमालेका ४१ र माओवादीका १८ सांसद छन्।
बहुमत पुग्न अब ४३ जना आवश्यक पर्छ। माओवादीका १८ सांसदले मात्र साथ छाड्दा पोखरेल नेतृत्व गरेको सरकार अल्पमतमा परेको हाे।
तर, केन्द्रमा गृहमन्त्री रामबहादुर थापाले साथ दिएमा उनी पक्षका आन्तरिक मामिला तथा कानुनमन्त्री कुलप्रसाद केसीले सरकारको साथ दिनसक्ने झिनो सम्भावना छ। तर, एमालेका दुई जना माधवकुमार नेपाल पक्षमा छन्। अर्कोतर्फ माओवादीले केसीलाई नै मुख्यमन्त्रीका रुपमा अघि सार्ने सम्भावना बलियो छ।
प्रदेश सभामा कांग्रेसका १९, जसपाका ६ र जनमोर्चाका १ सांसद छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
