डब्लुडब्लुएफ नेपालको सद्भावना दूतमा आनी छोइङ डोल्मा

समाचार

रासस बुधबार, वैशाख १, २०७८ १३:३३

काठमाडौं–विश्व वन्यजन्तु कोष (डब्लुडब्लुएफ) नेपालले आध्यात्मिक गायिका एवं संरक्षणकर्मी आनी छोइङ डोल्मालाई सद्भावना दूत नियुक्त गरेको छ।

विश्वमा सयभन्दा बढी देशमा संयन्त्र विस्तार भएको यस संस्थाले हालै आनी छोइङलाई सद्भावना दूत नियुक्त गरेर वातावरण संरक्षणमा नेपालका प्रयास र नेपालले गर्नुपर्ने कार्यबारे विश्वव्यापी अभियानको थालनी गरेको जनाएको छ।

डब्लुडब्लुएफ नेपालले विगतमा विभिन्न अभियानमा विभिन्न व्यक्तिलाई अभियानदूतका रुपमा छनोट गरे पनि पहिलोपटक सद्भावना दूतको घोषणा गरी संरक्षण अभियानलाई विश्वव्यापी रुपमा सञ्चालन गर्न लागेको जनाएको छ।

सन्तुलित विकासका लागि अध्यात्मिक र धार्मिक मूल्यमान्यता एवं विश्वासलाई विस्तार गर्नु आवश्यक भएकाले लामो समयदेखि क्रियाशील रहेकी आनी छोइङलाई सद्भावना दूत नियुक्त गरिएको डब्लुडब्लुएफ नेपालका राष्ट्रिय प्रतिनिधि डा घनश्याम गुरुङले जानकारी दिए।

आधुनिकताको नाममा भएको वातावरण विनाश रोक्न र प्राकृतिक सम्पदाको संरक्षण गरी सुन्दर पृथ्वी भावी पुस्तालाई सुम्पिने अवस्था बनाउनु आजको मुख्य आवश्यकता रहेको सद्भावना दूत आनी छोइङले बताइन्। ‘प्रकृति र संस्कृतिप्रतिको प्रेमले नै मलाई यस अभियानमा लाग्न प्रेरित गरेको छ,’ उनले भनिन्, ‘राष्ट्रिय÷अन्तर्राष्ट्रिय स्तरमा सुरक्षित भविष्यका लागि जनचेतना अभिवृद्धिमा लाग्न थप जिम्मेवारी पाएकी छु।’

वनजंगल विनाशले गर्दा आज ८५ प्रतिशत स्वच्छ पानीका मुहान सुक्नुका साथै बाढी पहिरोजस्ता प्राकृतिक विपद्का घटनामा वृद्धि भएको बताउँदै उनले अहिले नै हामीले वातावरण संरक्षणमा ध्यान दिन नसके अनेक समस्या आउनसक्ने निश्चित रहेको चर्चा गरिन्।

बजारीकरणका नाममा बहुमूल्य जडीबुटीको लोप एवं दुर्लभ वन्यजन्तुको चोरीशिकारीका घटना बढ्दै गएको बताउँदै उनले खानपानमा विषादी तथा प्लाष्टिकजन्य वस्तुको बढ्दो प्रयोगले गर्दा मानव र प्रकृतिबीचको सन्तुलन खल्बिलिन जाँदा वातावरण र जनस्वास्थ्यमा अनेक समस्या आएको बताइन्।

यसबारेमा पनि विश्वव्यापी रुपमा जनचेतना बढाउन आवश्यक रहेको आनी छोइङको भनाइ छ। प्रकृति संरक्षणमा नेपालले गरेको सफल उदाहरण प्रचार हुनु आवश्यक रहेको बताउँदै उनले हाम्रो मौलिकतालाई मासिन नदिई विश्वका अन्य मुलुकका सिकाइलाई पनि हामीले आत्मसात गर्न सक्नुपर्नेमा जोड दिइन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।