जाजरकोटमा लगाइएको अफिम प्रहरीले गर्‍याे नष्ट

समाचार

रासस मंगलबार, चैत ३१, २०७७ ०९:२६

जाजरकोट–प्रहरीले जाजरकोटको नलगाड नगरपालिकाका विभिन्न स्थानमा गरिएको अफिम खेती नष्ट गरेको छ।

प्रहरीले नलगाड–२ नहकुलीमा चार रोपनी, वडा नं ३ काक्रीमेलामा २५ रोपनी, डिम्रेनीमा साढे आठ रोपनी, द्वारेमा आठ रोपनी, वडा नं ६ को भारगाउँमा आधा रोपनी, सिर्पाचौरमा सात रोपनी, किटालेखमा साढे छ रोपनी र गर्छिनामा साढे ११ रोपनीमा लगाइएको अफिम खेती प्रहरीले नष्ट गरेको हो।

कानुनले प्रतिबन्ध गरेको अफिम खेती नष्ट गर्न प्रहरीले चार दिने अभियान चलाएको जाजरकोटका प्रमुख प्रहरी नायब उपरीक्षक मधुकुमार थापाले बताए। यसबारेमा थप अनुसन्धान भइरहेको उनको भनाइ छ।

घरेलु मदिरा नियन्त्रण, गाँजाखेती नष्ट, जुवातास नियन्त्रण तथा न्याय र शान्ति सुरक्षामा नकारात्मक असर पार्ने सबै प्रकारका गतिविधिविरुद्ध प्रहरी आक्रामकरूपमा लागेको उनले बताए। जनतासँगको सहकार्यले जिल्लामा अपराध र गैरकानुनी गतिविधि घटाउन मद्दत पुग्ने उनको भनाइ छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।