काठमाडाैं- उद्योग, वाणिज्य तथा आपूर्तिमन्त्री लेखराज भट्टले शैक्षिक संस्था बन्द गर्ने निर्णय नभएकाे बताएका छन्।
शनिबार बसेकाे कोभिड-१९ संकट व्यवस्थापन केन्द्र (सीसीएमसी)को बैठकमा विद्यालय बन्दसहितको ११ बुँदे निर्देशिका जारी गर्ने बिषयमा छलफल भएपनि निर्णयमा पुन नसकिएकाे उनले बताएका हुन्।
‘देशमा कोरोनाको नयाँ भेरिएन्ट (प्रजाति) को संक्रमण देखिन थालेपछि शैक्षिक संस्थालाई कसरी चलाउने भन्ने बिषयमा छलफल गरिएकाे हाे। याे छलफल सकिएकाे छैन। त्यही पनि निर्णय गर्ने अधिकार मन्त्रीपरिषद्लाई हुन्छ, हामीलाई हुँदैन,’ उनले भने।
शैक्षिक संस्था बन्द गर्न मन्त्रीपरिषद्मा सुझावसमेत नपठाइएकाे पनि उनले स्पष्ट पारे। ‘याे बिषय छलफलकै क्रममा रहेकाे छ। पहिला सचेत बनाउने काेसिस गर्छाैं तर, बन्द गर्ने निर्णय गरेका छैनाैं,’ उनले भने।
यता प्रधानमन्त्री तथा मन्त्रिपरिषद्का सचिव खगराज बरालकाअनुसार बैठकमा पछिल्लो संक्रमणकाे स्थिति तथा तयारीको विषयमा छलफल गरिएकाे हाे।
‘सीमा नाकामा रहेका स्वास्थ्य डेस्कलाई थप प्रभावकारी बनाउने, एन्टिजेन परीक्षण बढाउने लगायत बिषयमा छलफल गरिएकाे हाे,’ उनले भने।
यसअगाडि नै स्वास्थ्य तथा जनसंख्या मन्त्रालयले पछिल्लो समय १८ वर्षमुनिका व्यक्तिहरूमा कोरोना भाइरसको संक्रमण बढेको भन्दै विद्यालय ‘भर्चुअल’ माध्यमबाट सञ्चालन गर्न अनुरोध गरेको थियाे।
यस्तै स्वास्थ्य मन्त्रालयले काठमाडौं, पोखरालगायतका ठूला सहरमा विद्यालय जाने उमेर समूहमा पनि संक्रमण बढ्दाे क्रममा रहेकाले सबै शैक्षिक संस्थाहरूलाई उच्च सतर्कता अपनाउन अनुरोध गरेको थियो।
त्यसैगरी कन्ट्याक्ट ट्रेसिङ बढाउन, केस इन्भेस्टिगेसनका लागि एन्टिजेन तथा आवश्यकताअनुसार पीसीआर परीक्षण बढाउन पनि सबै स्वास्थ्य संस्था तथा स्थानीय तहहरूलाई मन्त्रालयले अनुरोध गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
