लमजुङ- गण्डकी प्रदेशका मुख्यमन्त्री पृथ्वीसुब्बा गुरुङले नेपाली कांग्रेस, नेकपा (माओवादी केन्द्र) र जनता समाजवादी पार्टी (जसपा)मिल्नु भनेको घाम र जुन मिल्नुजस्तै भएको बताएका छन्। मुख्यमन्त्री गुरुङले शुक्रबार बेसीसहर-१ उदिपुरमा आयोजित कार्यक्रममा तीन दलका आ-आफ्ना स्वार्थका कारण मिल्न नसक्ने बताए।
वर्तमान सरकारलाई हटाउन सजिलो नभएको भन्दै मुख्यमन्त्री गुरुङले भने, 'एमालेसँग तीन दलमध्ये जुन मिल्दा पनि बहुमत पुग्छ। उनीहरुको अवस्था सजिलो छैन।' उनले गण्डकी प्रदेश सरकार पनि बलियो रहेको बताए।
मुख्यमन्त्री गुरुङले २०४७ देखि २०७४ सम्म आइपुग्दा प्राप्त हुन नसकेको महत्त्वपूर्ण उपलब्धि वर्तमान सरकारले हासिल गरेको बताए। मुख्यमन्त्री गुरुङले भने, 'समृद्धिका लागि जग बसालेका छाैँ। थप नतिजा छिट्टै देखिन्छ।'
उनले गण्डकी प्रदेश सरकारले सभ्य समाज र समृद्ध प्रदेश बनाउने अभियानका साथ काम गरिरहेको बताए। ग्यासको सट्टामा बिजुलीको चुलो वितरण गर्न लागेको, प्रदेशमा चक्लाबन्दीको अभियान थाल्न लागेको उनको भनाइ छ।
मुख्यमन्त्री गुरुङले भने, '३५ अर्ब रुपैयाँमध्ये २० अर्ब भौतिक पूर्वाधार निर्माणमा प्रदेश सरकारले खर्च गर्दै बढीभन्दा बढी प्राथमिकतामा दिँदै आइरहेको छ। गण्डकी प्रदेशमा पाँच लाख ७८ हजार घरधुरी रहेकामा यसै वर्षभित्र विद्युत् नपुगेका घरधुरीमा विद्युत् पुर्याउँछौँ। अर्को वर्ष आधारभूत खानेपानी नपुगेका सबै घरधुरीमा एक घर एक धारा पुग्छ।'
मुख्यमन्त्री गुरुङले बेसीसहर नगरपालिकाले बेसीसहर-१ स्थित प्रवेशद्वारमा निर्माण गरेको प्रवेशद्वार, उदिपुर-डिही खानेपानी तथा सरसफाइ उपभोक्ता समितिले प्रदेश सरकार र स्थानीयवासीको सहकार्यमा निर्माण गरेको एक घर एक धारा र जनकल्याण माध्यमिक विद्यालयको चार कोठे भवनको एकै दिन उद्घाटन गरेका थिए। तीनवटै आयोजनाको उद्घाटनपछि संयुक्त रुपमा कार्यक्रमको आयोजना गरिएको हो।
बेसीसहर नगरपालिकाले करीब २२ लाख रुपैयाँ लागतमा डुम्रे-बेसीसहर सडकखण्डको उदिपुरमा प्रवेशद्वार निर्माण गरेको हो। त्यस्तै ६२३ घरधुरी लाभान्वित हुनेगरी निर्माण सम्पन्न भएको उदीपुर-डिही खानेपानी दुई करोड ९८ लाख ३६ हजार रुपैयाँको लागतमा सम्पन्न भएको हो। त्यसैगरी जनकल्याण माध्यमिक विद्यालयको चार कोठे भवन ६८ लाख ३२ हजार ९९१ रुपैयाँमा राष्ट्रिय पुनर्निर्माण प्राधिकरण, जिल्ला आयोजना कार्यान्वयन एकाइ (शिक्षा) लमजुङले निर्माण गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1764146706.png)
