'तुवाँलो अझै कायम रहन सक्छ'

समाचार

रासस सोमबार, चैत १६, २०७७ ११:४४

काठमाडाैं- विगत केही दिनदेखि काठमाडौं उपत्यकालगायत देशका विभिन्‍न भागमा एक्कासी देखिएको तुवाँलो अझै कायम रहने भएको छ। तुवाँलोको मुख्य कारण डढेलो नै रहेको मौसमविद् प्रतिभा मानन्धरले बताइन्।

उनका अनुसार पछिल्लो समय नेपाल तथा भारतको केही स्थानमा लागेको डढेलोको कारण प्रदूषणको कण वायुमण्डलमा नै जम्मा भएकाले धेरैजसो स्थानमा प्रदूषण बढ्न गई तुवाँलो देखिएको हो।

तुवाँलो हट्नका लागि वायुको वेग बढ्नुका साथै वर्षा हुनुपर्छ। 'भोलि अपरान्हपछि पश्चिमी वायु सक्रिय हुने देखिएको छ,' उनले भनिन्। यसले हावाको वेग बढ्नुका साथै फाटफुट वर्षाको सम्भावना देखिएकाले मौसम केही सफा हुने बताइएको छ।

हाल देशमा स्थानीय वायुसँगै पश्चिमी वायुकोसमेत आंशिक प्रभाव रहेको छ। दिउँसो प्रदेश १, बागमती र गण्डकी प्रदेशमा आंशिकदेखि सामान्य बदली रही देशको पहाडी भू-भागका एक,दुई स्थानमा मेघगर्जन र चट्याङसहित हल्का वर्षाको सम्भावना रहेको विभागले जानकारी दिएको छ।

मौसम पूर्वानुमान महाशाखाको पछिल्लो विवरणअनुसार आज काठमाडौं उपत्यकाको न्यूनतम तापक्रम १०.८ डिग्री र अधिकतम तापक्रम २४.८ डिग्री सेल्सियस रहेको छ।