फाइल तस्बिर
डोटी–पछिल्लो समय भारतबाट रोजगारी छाडेर घर फर्किनेको लर्को लाग्न थालेको छ। भारतमा कोरोना भाइरसको संक्रमण पुनः बढेको तथा विशुपर्व नजिकिएकाले रोजगारीका लागि भारत पसेका सुदूरपश्चिमीले अहिले आ–आफ्ना घर फर्किन थालेका हुन्।
भारतबाट फर्कनेको संख्यासँगै कोरोना जोखिमसमेत बढेको छ। पछिल्लो पाँच दिनको अवधिमा भारतबाट आएका ११ व्यक्तिमा कोरोना संक्रमण देखिएको सुदूरपश्चिम प्रदेश स्वास्थ्य सेवा निर्देशनालय दिपायलले जनाएको छ।
रोजागारी छाडेर आउनेहरु सिधै गाउँ पस्न थालेका कारण यहाँका गाउँघरमा पुनः कोरोना संक्रमण फैलिने भन्दै स्थानीय प्रशासनले अनिवार्य क्वारेन्टिनमा बस्नुपर्ने नियम बनाएका छन्। उता गृह मन्त्रालयले समेत क्वारेन्टिन तयारी अवस्थामा राख्न निर्देशनसहितको पत्राचार गरेसँगै यहाँका स्थानीय तहमा सबैले क्वारेन्टिन निर्माणका लागि तयारी गर्न थालेको सुदूरपश्चिम गाउँपालिका अध्यक्ष महासंघ तथा जोरायल गाउँपालिकाका अध्यक्ष दुर्गादत्त ओझाले जानकारी दिए।
सुदूरपश्चिम प्रदेशका सीमा नाका कञ्चनपुरका गड्डाचौकी, त्रिनगर, दार्चुलाको धार्चुला तथा बैतडीको झुलाघाट क्षेत्रमा भारतबाट फर्किनेको भीड बढ्न थालेको प्रदेश प्रहरी कार्यालय दिपायलले जनाएको छ। अहिले यहाँका सीमा नाकाबाट दैनिक सयौंको संख्यामा मानिस भित्रिन थालेका छन्।
रोजगारीका लागि भारत गएका स्वदेश फर्कने क्रम बढेपछि सुदूरपश्चिममा पुनः कोरोना संक्रमण फैलिने जोखिम बढेकाले सावधानीका लागि सबै तयारी अवस्थामा राखिएको प्रदेश स्वास्थ्य निर्देशक डा गुणराज अवस्थीले बताए।
त्रिनगर र गड्डाचौकी नाकाबाट मात्रै दैनिक एक हजारभन्दा बढी हाराहारीमा नेपाली प्रवेश गरिरहेका छन्। प्रदेश प्रहरी कार्यालय दिपायलका अनुसार यी दुई नाकाबाट विगत १० दिनको अवधिमा कम्तीमा पनि आठ हजारभन्दा बढी नेपाली नेपाल भित्रिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
