फाइल तस्बिर।
काठमाडाैं- सत्ता समीकरण पेचिलो भइरहेको समयमा जनता समाजवादी पार्टीले सरकारमा जाने/नजाने भनि निर्णय गर्नका लागि डाकेको बैठक बिहान आकस्मिक रुपमा स्थगित गरेको छ।
अधिकांश नेताहरु पार्टी कार्यालय बालकुमारी पुगिसकेका बेला बैठक स्थगित भएको सूचना जारी गरिएको हो। अर्को बैठक कहिले बस्ने भन्ने मिति तोकिएको छैन। प्रधानमन्त्री केपी शर्मा ओलीविरुद्ध नेपाली कांग्रेस, माओवादी केन्द्र र जसपा मिलेर नयाँ सरकार बनाउने आकलन गरिरहेको समयमा जसपाले अनिश्चितकालका लागि बैठक स्थगित गरेका हो।
बैठक स्थगित भएपछि जसपाका अध्यक्ष महन्थ ठाकुरले तयारी नपुगेपछि स्थगित गर्नुपरेको बताए। उनले अर्को बैठक अब होलीपछि मात्र बस्ने जानकारी दिए। यस वर्षको होली चैत १५ र १६ गते परेको छ। किन आकस्मिक रुपमा बैठक स्थगित भयो भन्ने पत्रकारहरुको प्रश्नमा उनले तयारी नपुगेको जवाफ दिए। तुलसीलाल स्मृति प्रतिष्ठान, ललितपुरमा बस्ने तय भएको बैठक अचानक स्थगित भएको हो।
बिहीबार बिहान बसेको पदाधिकारी बैठकमा दुई पक्षबीच मतभेद बढेपछि कार्यकारिणी समितिको बैठक स्थगित भएको जसपाका एक नेताले बताए। जसपामा महन्थ ठाकुर र राजेन्द्र महतो पक्ष प्रधानमन्त्री ओलीसँग सहकार्य गर्नुपर्ने पक्षमा छन् भने बाबुराम भट्टराई, उपेन्द्र यादव र अशोक राई ओली सरकारको विकल्प खोज्नुपर्ने अडानमा छन्।
जसपा केन्द्रीय कार्यकारिणी समितिमा ५१ जना सदस्य छन्। जसमध्ये तत्कालीन राष्ट्रिय जनता पार्टी (राजपा) बाट २५ जना र तत्कालीन समाजवादी पार्टी नेपालबाट २६ जना रहेका छन्। दुई पक्ष आ आफ्नै अडानमा बसेपछि पार्टी फुटमा जाने खतराका कारण उनीहरुले तत्काल बैठक बसेर निर्णय नगर्ने रणनीति लिएको देखिन्छ। जसपाका नेता मनिषकुमार सुमनले विभिन्न समितिका प्रतिवेदन र तयारी नपुगेकाले बैठक स्थगित भएको र अर्को बैठक बस्ने कुनै मिति नतोकिएको बताए।
कांग्रेस र माओवादी हामीभन्दा जिम्मेवार छन्
जसपा नेता सुमनले सरकार बनाउने वा केपी शर्मा ओलीको विकल्प खोज्ने बारेमा निर्णय गर्ने विषयमा जसपा भन्दा नेपाली कांग्रेस र माओवादी केन्द्र जिम्मेवार रहेको टिप्पणी गरे।
सरकारमा जाने विषयमा तपाईंहरुको निर्णय कुरेको समयमा किन बैठक स्थगित भयो? भन्ने प्रश्नमा उनले जसपा संसदको चौंथो शक्ति भएकाले पहिलो, दोस्रो र तेस्रोले निर्णय गरेपछि आफूहरूले निर्णय गर्ने बताए। उनले अहिले केपी ओली बाहेक कुनै अर्को सरकार नभएको भन्दै माओवादीले सर्मथन फिर्ता लिएपछि मात्र सरकार नयाँ बनाउने छलफल हुने बताए।
‘पहिला माओवादी र नेकपा एमालेले आफैं निर्णय गर्न पर्यो ’ सुमनले भने ‘सत्ताको साँचो बोकेर हिँडेको नेपाली कांग्रेसले निर्णय गरेपछि हामीले गर्ने हो। हाम्रो अडान त सुनाएकै छौं नि!’
अहिले परिस्थिति धेरै परिपक्व नभएकाले जसपाले निर्णय गर्न नसकेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1773072269.png)
-1773054140.png)
-1773053162.png)
-1764146706.png)
-1772777462.png)
