काठमाडौं–मेलम्ची खानेपानीको सुरुङमा आज (सोमबार)देखि पानी भरेर परीक्षण गरिने भएको छ। आवश्यक सम्पूर्ण प्राविधिक काम पूरा गरी परीक्षण गर्न लागेको आयोजनाले जनाएको छ।
आयोजनास्थलमै औपचारिक कार्यक्रम राखेर पानी भर्न सुरु गरिने बताइएको छ। खानेपानी मन्त्री मणि थापाको उपस्थितिमा सुरुङमा पानी हालेर परीक्षण गरिने मेलम्ची खानेपानी विकास समितिका प्रवक्ता राजेन्द्र पन्तले जानकारी दिए।
गत असारमा सुरुङ परीक्षणका क्रमम हेलम्बु गाउँपालिका–१,अम्बाथान अडिटको मुख्य गेट (नं १७) फुटेर निस्केको पानीले आयोजनाका एक इन्जिनियर र चालकलाई बगाएको थियो। त्यसपछि आयोजनाको मुख्य दातृ निकाय एशियाली विकास बैंक (एडिबी)को अनुदान सहयोगअन्तर्गत चार जना विशेषज्ञको टोलीले सुरुङ, मुहानस्थल, गेटलगायतका संरचनाको पुनः जाँच गरेको थियो।
विगतको जस्तो दुर्घटना नहोस् भन्नका लागि आयोजनाले यसपालि विशेष सतर्कता अपनाएको खत्रीको भनाइ छ। परीक्षणका क्रममा हेलिकप्टरलाई तयारी अवस्थामा राखिनुका साथै उद्धार योजना बनाएर धुलिखेलदेखि काठमाडौँस्थित विभिन्न अस्पतालसँग समन्वय गरिएको उनले बताए।
खत्रीका अनुसार सिन्धुपाल्चोकको मेलम्ची खोलादेखि काठमाडौँको सुन्दरीजलसम्मको साढे २६ किलोमिटर सुरुङ भर्न १६ दिन लाग्नेछ। सुरुआती चरण भएकाले सुरुङको क्षमताअनुसार पानी नछाडिने उनले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
