काठमाडौं- महालक्ष्मी विकास बैंकको शाखा कार्यालय कुमारीपाटी ललितपुरमा भएको घोटाला प्रकरणमा पक्राउ परेका आठै जनालाई धरौटीमा रिहा गर्न उच्च अदालत पाटनले आदेश दिएको छ।
अदालतको आदेशसँगै बैंकको शाखाका तत्कालीन शाखा प्रबन्धकद्धय पिंकु पालिखे र स्मृति राणा, हालसम्म शाखा प्रबन्धक नै रहेका अनिशसिंह सिजापति, उक्त शाखाका तत्कालीन अपरेशन प्रमुख सुजाता लामिछाने, ऋणी सन्दिप लिम्बू धरौटी तिरेर रिहा भएका हुन्।
पालिखेलाई २ लाख ५० हजार, राणालाई ७ लाख ८५ हजार, सिजापतिलाई ८ लाख ८५ हजार धरौटी माग गरिएको थियो। उनीहरुले अदालतको आदेश अनुसार सो बराबरको बैंक ग्यारेन्टी गरेपछि रिहा गरिएको केन्द्रीय अनुसन्धान ब्यूरो (सिआइबीका) डिआइजी सहकुल थापाले जानकारी दिए। सुजाता र सन्दिपले भने क्रमश ३ लाख र १ लाख नगद जम्मा गरेर रिहा भएका छन्।
बाँकी तीन जना बैंकका तत्कालीन सुन जाँचकी पदमचन्द्र ज्ञवाली, ऋणी पूर्ण राई, ऋणी देवानन्द राई भने धरौटी तिर्न नसकेपछि डिल्लीबजार कारागार चलान गरिएको डिआइजी थापाले जानकारी दिए। ज्ञवालीसँग १ करोड ५७ लाख, पूर्ण राईसँग २७ लाख र देवानन्दसँग ४९ लाख धरौटी माग गरिएको थियो।
बैंकका कर्मचारीकै मिलेमतोमा ७ करोड ४८ लाख रुपैयाँ बिगो बराबरको रकम घोटाला भएको थियो। कमसल र कम परिमाणको सुन राखेर बढी कर्जा प्रवाह गरी घोटाला भएको अनुसन्धानबाट खुलेको थियो। साढे १७ किलो भनेर राखिएको सुन जम्मा ५ किलोमात्रै सुन राखेर बढी कर्जा प्रवाह गरिएको थियो।
सुन जाँचकी पदमचन्द्र ज्ञवालीको ठाउँमा नयाँ सुन जाँचकी आएर बरबुझारथ गर्ने क्रममा साढे १७ किलो भनेर राखिएको सुन जम्मा ५ किलो मात्रै रहेको पाइएपछि घोटाला बाहिरिएको थियो।
थप समाचार
महालक्ष्मी बैंक घोटाला प्रकरण : धितोको सुन यसरी पारिन्थ्यो 'गायब'
महालक्ष्मी विकास बैंक घोटाला प्रकरणमा ८ जनाविरुद्ध मुद्दा दर्ता, बयान सुरु
महालक्ष्मी बैंककाे साढे ७ करोड घोटाला प्रकरण : सुन जाँचकी पक्राउ
महालक्ष्मी विकास बैंकका ३ शाखा प्रबन्धक पक्राउ
महालक्ष्मी विकास बैंकमा सुन घोटाला प्रकरण : मूल्यांकन गरियो १७ किलो, राखियो ५ किलो
३ वर्षदेखि महालक्ष्मी विकास बैंकमा घोटाला, कर्मचारी फरार
महालक्ष्मी बैंकको साढे ७ करोड घोटाला प्रकरण : प्रहरीको अनुसन्धानमा बैंकको हस्तक्षेप
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
